Saturday, September 21

આગામી ર૪ કલાકમાં ભારે વરસાદની આગાહી : તંત્રને સાબદું કરાયું

વાયુ વાવાઝોડાનો ખતરો ટળી ગયા બાદ જાણે તંત્ર અને આમ જનતા હળવાફુલ બની ગયા હતાં પરંતુ હજુ ચોમાસાનાં દિવસોમાં સતત તકેદારી રાખવા માટેનાં પગલાં સંબંધિત તંત્ર દ્વારા લેવામાં આવી રહેલ છે. ચાલુ વીકમાં વરસાદ વિવિધ વિસ્તારોમાં બે થી પાંચ ઈંચ જેવો નોંધાયેલો છે અને વરાપ તેમજ વરસાદનાં આ સમયગાળામાં કયાંક ઝરમરીયો વરસાદ તો કયાંક ધોધમાર વરસાદ પડી રહ્યો છે. જૂનાગઢ અને સોરઠ પંથકમાં કેટલાંક વિસ્તારોમાં ઝાપટાથી લઈ અને ઝરમરીયા વરસાદ પડતો હોવાનાં અહેવાલો છે. તો બીજી તરફ હવામાન વિભાગ દ્વારા આગામી ર૪ કલાકમાં ભારે વરસાદની આગાહી કરી છે અને તંત્રને સાબદું કરવામાં આવેલ છે. સૌરાષ્ટ્રનાં તમામ જીલ્લાઓમાં સંબંધિત વિભાગોને સાવચેત કરી દેવામાં આવેલ છે. રાજયમાં વરસી રહેલા વરસાદે છેલ્લા ચોવીસ કલાક દરમ્યાન દક્ષિણ અને મધ્ય ગુજરાતમાં મેઘમહેર જારી રાખી છે. રાજ્યના વલસાડ જિલ્લાના વાપી તાલુકામાં ૨૦૪ મી.મી. એટલે કે આઠ ઇંચથી વધુ, પારડી તાલુકામાં ૧૮૦ મી.મી. એટલે કે સાત ઇંચથી વધુ, કપરાડા તાલુકમાં ૧૫૫ મી.મી. અને ઉમરગામમાં ૧૪૮ મી.મી. મળી કુલ બે તાલુકાઓમાં છ ઇંચ જેટલો વરસાદ વરસ્યો હોવાના અહેવાલો છે. રાજ્યના સ્ટેટ ઇમરજન્સી ઓપરેશન સેન્ટર દ્વારા મળેલા અહેવાલો મુજબ આજ તારીખ ૨૯ જુન ૨૦૧૯ને શનિવારના રોજ સવારે છ કલાક સુધીમાં વલસાડ તાલુકામાં ૧૩૭ મી.મી. એટલે કે પાંચ ઇંચ, કરજણ અને નવસારીમાં ૧૦૪ મી.મી., પલસાણામાં ૯૯ મી.મી. મળી કુલ ત્રણ તાલુકાઓમાં ચાર ઇંચ જેટલો તથા શિહોર-ગણદેવીમાં ૯૭ મી.મી., ધરમપુરમાં ૮૬ મી.મી., ઘોઘામાં ૮૪ મી.મી., લાઠીમાં ૭૯ મી.મી., ભરૂચમાં ૭૮ મી.મી., ખેરગામમાં ૭૭ મી.મી., ધોલેરામાં ૭૩ મી.મી. મળી કુલ આઠ તાલુકાઓમાં ત્રણ ઇંચ જેટલો વરસાદ વરસ્યો છે. આ ઉપરાંત ડભોઇ તાલુકામાં ૭૧ મી.મી., ચોર્યાસીમાં ૭૦ મી.મી., જલાલપોરમાં ૬૭ મી.મી., બાબરા-નેત્રંગમાં ૬૬ મી.મી., ગીરગઢડામાં ૫૩ મી.મી., ભાવનગરમાં ૫૧ મી.મી., માંડવી(સુરત)માં ૫૦ મી.મી. અને વાઘોડિયામાં ૪૯ મી.મી. મળી કુલ નવ તાલુકાઓમાં બે ઇંચથી વધુ વરસાદ વરસ્યો છે. સુરત શહેર, બોટાદ, મહુવા, હાંસોટ, ઉમરાળા, અંકલેશ્વર, ધોળકા, આંકલાવ, વિસાવદર, ધંધૂકા, ગઢડા, ચીખલી, લીલીયા, જેશર, તળાજા, જાંબુઘોડા, વાગરા, ઉના, સંખેડા અને ગારીયાધાર મળી કુલ ૨૦ તાલુકાઓમાં એક ઇંચથી વધુ જ્યારે અન્ય ૧૧ તાલુકાઓમાં અડધો ઇંચ કરતા વધ પાણી પડ્યું હોવાના અહેવાલો છે.
અત્રે ઉલ્લેખનીય છે કે, ૬.૦૦ થી ૮.૦૦ કલાક દરમ્યાન માત્ર બે કલાકના ગાળામાં ડાંગ જિલ્લાના વઘાઇ તાલુકામાં ૧૦૨ મી.મી. એટલે કે ચાર ઇંચથી વધુ, ખેરગામમાં ત્રણ ઇંચ, વડોદરા-વાસદામાં બે ઇંચ અને આંકલાવ, માંગરોળ, ધરમપુર, નવસારી અને કામરેજમાં એક ઇંચથી વધુ વરસાદ વરસ્યો હોવાના અહવાલો છે.
ઉપરાંત ૮.૦૦ થી ૧૦.૦૦ કલાક દરમ્યાન ખેરગામ, છોટાઉદેપુર, મહુવા, વઘાઇ અને તિલકવાડામાં બે ઇંચથી વધુ જ્યારે કપરાડા, જેતપુરપાવી, બારડોલી, પલસાણા, પારડી, સુબિર, ધરમપુર, વલસાડ અને ડાંગમાં એક ઇંચથી વધુ વરસાદ વરસ્યો છે.

Leave A Reply