Saturday, October 19

બ્રાઝિલનાં બે વૈજ્ઞાનિક આજે ગિર ગાયનાં સંરક્ષણ ક્ષેત્રનું કામ કરતાં જામકા ગામની મુલાકાતે

બ્રાઝિલનાં બે પશુ વૈજ્ઞાનિકો જૂનાગઢ જીલ્લાનાં જામકા ગામની મુલાકાતે આજે જઈ રહ્યાં છે. ગીર-ગાય સંવર્ધનથી પ્રભાવિત આ વૈજ્ઞાનિકો વિશેષ જાણકારી અને માહિતીની આપ-લે કરનાર છે. વર્ષોથી જૂનાગઢ જીલ્લાનું જામકા ગામ ગિર ગાયનાં સંરક્ષણ અને સંવર્ધન ક્ષેત્રે ખુબ જ સારૂ કાર્ય કરે છે. દરમ્યાન ગઈકાલે કૃષિ યુનિવર્સિટી ખાતે મિટીંગ હોલમાં જૂનાગઢ કૃષિ યુર્નિ.નાં પદાધિકારીઓ, વૈજ્ઞાનિકો અને બ્રાઝિલનાં વૈજ્ઞાનિકો સાથે એક મહત્વની બેઠક તેમજ પત્રકારો સાથે પણ ચર્ચા-સભા યોજાઈ હતી અને આ બેઠકમાં એવું તારણ નીકળ્યું હતું કે ગીર-ગાય દુધ ઉત્પાદન, ગુણવતા અને આબોહવામાં માફક આવવા માટે વિશ્વનું શ્રેષ્ઠ પ્રાણી છે. બ્રાઝિલમાં ગીર ગાયની ર૧.૬૦ કરોડ વસ્તી હોવાનું જાણવા મળે છે. ૧૯૬૦માં ભાવનગરનાં મહારાજા કૃષ્ણકુમારસિંહજીએ બ્રાઝિલમાં મોકલેલા ગીર ગૌવંશ અને સાંઢની સતત સંવર્ધનથી બ્રાઝિલમાં ર૧ કરોડ ૬૦ લાખ ગીર ગાયોની વસ્તી હયાત છે. બ્રાઝિલને સમૃધ્ધ કરનાર ગીર ગાયનું મુળ ભાવનગરમાં હોય ગીરગાય અને પશુ સંવર્ધન સાથે સંકળાયેલ બ્રાઝિલની નિષ્ણાંતોની ટીમ ભાવનગર અને જૂનાગઢની એગ્રીકલ્ચર યુર્નિ.નાં પશુ સંવર્ધન કેન્દ્રની મુલાકાતે આવ્યા હતાં. ગઈકાલે પત્રકારો સમક્ષ બ્રાઝિલનાં ડો.ફર્નાન્ડો ટેનસ અને જોજ ઓટાવીયો લીમોસ અને નિષ્ણાંતોએ ભારતની પશુ સંવર્ધનની પ્રક્રિયામાં તફાવત અંગેની ચર્ચાઓ કરી હતી. આ તકે કૃષિ યુર્નિ.ખાતે પશુ નિષ્ણાંત ડો.સવાણી, પશુ વિભાગનાં નિયામક ડો.ચોવટીયા અને જામકાનાં પરસોતમભાઈ સિધ્ધપુરા સહિતનાં ગીર ગૌવંશ સાથે સંકળાયેલાં નિષ્ણાંતો ઉપસ્થિત રહ્યાં હતાં. જૂનાગઢ તાલુકાનાં જામકા ગામે રહેતાં પરસોતમભાઈ ગીર ગોપી ફાર્મ નામે ગીર ગાય સંવર્ધન કેન્દ્ર ચલાવે છે. તેમનાં ગીર ગાયોનાં સંવર્ધનથી પ્રભાવિત થઈને બ્રાઝિલનાં બે વૈજ્ઞાનિકો ડો.ફર્નાન્ડો ટેનસ અને જાજ ઓટાવીયો લીમોસ આજે બપોરે જૂનાગઢ કૃષિ યુનિવર્સિટી ખાતે આવી પહોંચ્યા હતા. તેમણે અહીંના વૈજ્ઞાનિકો સાથે ગીર ગાય અને બ્રાઝિલની ગાયો વચ્ચે શું સામ્યતા અને અને શું વિરોધાભાસ છે તે અંગે વિસ્તૃત ચર્ચા કરી હતી.
બંને વૈજ્ઞાનિકોએ જણાવ્યું કે બ્રાઝિલમાં ગાયો માટે સરકાર ખુબ જ પ્રોત્સાહન આપે છે. બ્રાઝિલની ગાય ગીરની ગાય કરતાં બમણું દુધ આપે છે. ત્યાંની ગાયો ૩૦પ દિવસમાં પ હજારથી ૧૭ હજાર લીટર દુધ આપે છે. ત્યાં એક વ્યકિતને ગાય સંવર્ધન માટે ૩૦ એકર જમીન આપવામાં આવે છે. ત્યાં આશરે ર૧ કરોડ ૪૦ લાખ ગાયોની વસ્તી છે. ત્યાંનું વાતાવરણ અને હવામાનનાં કારણે ગાયોને અનેક પ્રતિકુળતા છે. ભારતની જેમ ત્યાં ગાય આધારિત ખેતી કે તેનાં છાણનો બહુ ઉપયોગ થતો નથી. ભારતમાં ગાયનાં ધી થી અનેક મીઠાઈઓ બને છે ત્યાં ગાયોનાં ઘીમાંથી કોઈ મીઠાઈ બનાવતા નથી. ત્યાંની ગાયોનો વ્યાપ વધારવા અંદરો અંદર જ બ્રીડીંગ કરાવવામાં આવે છે. જેથી વધુ સફળતા મળે છે. એક ગાય પાછળ અનેક ટેકનોલોજીનો વધુ ઉપયોગ કરવામાં આવે છે. આજે જામકા મુકામે આ બંને વૈજ્ઞાનિકો ગાયોનાં સંવર્ધન કેન્દ્રમાં ગાયો વિષે વધુ જાણકારી મેળવશે તે સમયે ગુજરાતનાં ગાય સંવર્ધન કરતા ખેડુતો અને તજજ્ઞો ઉપસ્થિત રહેશે. જામકા ગિર ગાયનાં સંવર્ધન ક્ષેત્રે સારી કામગીરી કરે છે. દરેક ખેડૂતો ગાયો પાળે છે અને ગોબરનો ઉપયોગ ખેતીમાં કરીને ઓર્ગેનિક અનાજ પકાવે છે.

Leave A Reply