કંગના રણૌતનો બાબા રામદેવ અને સેલેબ્સ પર આકરો પ્રહાર, કહ્યું- ‘મારી 1% સફળતા પણ મેળવી નથી તો જ્ઞાન ન આપો’
‘મહિલા અંગે આવી ટિપ્પણી શરમજનક’, કંગનાએ આશુતોષ રાણા, સોનુ સૂદ, રાખી સાવંત અને તાપસી પર પણ સાધ્યું નિશાન
saurashtrabhoomi 
મુંબઈ, તા.૨૫
અભિનેત્રી અને ભાજપના સાંસદ કંગના રણૌત ફરી એકવાર પોતાના નિવેદનોને કારણે ચર્ચામાં આવી છે. ‘Gen Z’ આંદોલનને લઈને કંગનાએ કરેલી ટિપ્પણી બાદ બાબા રામદેવ સાથે શરૂ થયેલો વાક્યુદ્ધ હવે વધુ ઉગ્ર બનતો જોવા મળી રહ્યો છે. બાબા રામદેવના તાજેતરના નિવેદન બાદ કંગનાએ તેમના પર આકરો પ્રહાર કર્યો છે.
કંગનાએ બાબા રામદેવની ટીકા કરતાં મહિલાઓ અંગે કરવામાં આવેલી તેમની ટિપ્પણીઓને લઈને સવાલ ઉઠાવ્યા છે. કંગનાનું કહેવું છે કે સનાતન સાથે જોડાયેલા વસ્ત્રો ધારણ કરનાર વ્યક્તિ દ્વારા મહિલાઓ વિશે કરવામાં આવતી આવી ટિપ્પણીઓ આશ્ચર્યજનક અને શરમજનક છે.
બાબા રામદેવે રવિવારે પોતાના વિશે કહ્યું હતું કે તેઓ કોણ છે તે આખો દેશ જાણે છે. આ નિવેદનના જવાબમાં કંગનાએ કહ્યું કે બાબા રામદેવે તમામ મર્યાદાઓ વટાવી દીધી છે. તેમના મતે, કોઈ મહિલા અંગે આ પ્રકારની ટિપ્પણી કરવામાં આવે તે યોગ્ય નથી અને આવા નિવેદનથી સમગ્ર સમાજ શરમ અનુભવે છે.
કંગનાએ આ મુદ્દે માત્ર બાબા રામદેવને જ નહીં પરંતુ બોલિવૂડની અન્ય કેટલીક હસ્તીઓને પણ નિશાન બનાવી હતી. તેમણે આરોપ લગાવ્યો કે કેટલાક લોકો મીડિયામાં ચર્ચામાં રહેવા માટે તેમના વિશે નિવેદનો કરતા રહે છે.
કંગનાએ આશુતોષ રાણા, સોનુ સૂદ, રાખી સાવંત અને તાપસી સહિતના કલાકારોના નામ લઈને તેમના અગાઉના નિવેદનોનો ઉલ્લેખ કર્યો હતો. કંગનાએ કહ્યું કે જો કોઈ વ્યક્તિએ તેની સફળતાનો એક ટકા હિસ્સો પણ હાંસલ કર્યો નથી તો તે આવા લોકો પાસેથી કોઈ જ્ઞાન કે સલાહ લેવા તૈયાર નથી.
અભિનેત્રીએ વધુમાં દાવો કર્યો હતો કે કેટલાક લોકો પોતાની ચર્ચા જાળવી રાખવા માટે તેના પર સતત ટિપ્પણીઓ કરતા રહે છે. કંગનાએ સ્પષ્ટ કર્યું કે તે પોતાની કરતાં વધુ સફળ અને અનુભવી વ્યક્તિઓની સલાહને જ મહત્વ આપશે.
બાબા રામદેવને લઈને કંગનાએ ફરી કહ્યું કે સનાતનના વસ્ત્રો પહેરવા છતાં મહિલાઓ પ્રત્યે વિવાદાસ્પદ ટિપ્પણીઓ કરવી યોગ્ય નથી. આ બાબતને તેમણે આશ્ચર્યજનક અને શરમજનક ગણાવી છે.
આ સમગ્ર મામલે કંગનાના નિવેદન બાદ સોશિયલ મીડિયા પર પણ ચર્ચા શરૂ થઈ છે. બાબા રામદેવ અને કંગના રણૌત વચ્ચે ચાલી રહેલા આ વાક્યુદ્ધમાં આગામી સમયમાં બંને તરફથી વધુ નિવેદનો સામે આવે છે કે કેમ તેના પર હવે સૌની નજર છે.
.jpg)
