અક્ષય કુમાર-શ્રદ્ધા કપૂરની બીજીવારની બોક્સ ઓફિસ ટક્કર ટળી, ‘ઈઠા’ને 4 ડિસેમ્બરે મળી શકે સોલો રિલીઝ
અજય દેવગણની ‘રેન્જર’ બાદ અક્ષય કુમારની અનીસ બઝમી દિગ્દર્શિત ફિલ્મની રિલીઝ પણ બદલાવાની ચર્ચા; ‘ઈઠા’માં મહારાષ્ટ્રની વિખ્યાત તમાશા કલાકાર વિઠાબાઈ નારાયણગાંવકર બનશે શ્રદ્ધા
saurashtrabhoomi 
મુંબઈ, તા.૨૫
શ્રદ્ધા કપૂરની આગામી ફિલ્મ ‘ઈઠા’ માટે 4 ડિસેમ્બરની રિલીઝનો માર્ગ મોકળો બનતો જોવા મળી રહ્યો છે. અગાઉ આ જ તારીખે અજય દેવગણ અને અક્ષય કુમારની ફિલ્મો પણ રિલીઝ થવાની ચર્ચા હતી, પરંતુ હવે બંને ફિલ્મોની રિલીઝ તારીખમાં ફેરફાર થવાના અહેવાલ સામે આવતાં શ્રદ્ધાની ‘ઈઠા’ને બોક્સ ઓફિસ પર સોલો રિલીઝ મળી શકે છે.
‘છાવા’ ફેમ દિગ્દર્શક લક્ષ્મણ ઉતેકરના નિર્દેશનમાં બની રહેલી ‘ઈઠા’માં શ્રદ્ધા કપૂર મહારાષ્ટ્રની જાણીતી તમાશા કલાકાર વિઠાબાઈ નારાયણગાંવકરની ભૂમિકામાં જોવા મળશે. ફિલ્મની રિલીઝ અગાઉ પણ એકથી વધુ વખત આગળ ધકેલાઈ હોવાના અહેવાલો વચ્ચે હવે તેને 4 ડિસેમ્બરે સિનેમાઘરોમાં લાવવાની તૈયારી ચાલી રહી છે.
અગાઉ અજય દેવગણની ‘રેન્જર’ પણ 4 ડિસેમ્બરે રિલીઝ થવાની ચર્ચા હતી. જોકે હવે આ ફિલ્મને પાછળ ધકેલીને 2027માં રિલીઝ કરવામાં આવે તેવી માહિતી સામે આવી છે. પરિણામે ‘ઈઠા’ સામેની એક મોટી બોક્સ ઓફિસ ટક્કર પહેલેથી જ ટળી ગઈ હોવાનું માનવામાં આવી રહ્યું છે.
આ ઉપરાંત અક્ષય કુમાર, વિદ્યા બાલન અને રાશિ ખન્નાને મુખ્ય ભૂમિકામાં દર્શાવતી અનીસ બઝમી દિગ્દર્શિત ફિલ્મ પણ 4 ડિસેમ્બરે રિલીઝ થવાની ચર્ચામાં હતી. સૂત્રોના જણાવ્યા અનુસાર હવે આ ફિલ્મની રિલીઝ તારીખમાં પણ ફેરફાર થઈ શકે છે. ફિલ્મ સમયસર તૈયાર થઈ જાય તો તેને નવેમ્બરમાં રિલીઝ કરવાની શક્યતા છે, અન્યથા તેની રિલીઝ 2027 સુધી પાછળ ધકેલાઈ શકે છે. જોકે ફિલ્મની નવી રિલીઝ તારીખ અંગે સત્તાવાર જાહેરાતની રાહ જોવાઈ રહી છે.
આ ફેરફારને કારણે શ્રદ્ધા કપૂર અને અક્ષય કુમાર વચ્ચે થનારી બીજી બોક્સ ઓફિસ ટક્કર પણ ટળતી જોવા મળી રહી છે. અગાઉ શ્રદ્ધાની હોરર-કોમેડી ‘સ્ત્રી 2’ અને અક્ષય કુમારની ‘ખેલ ખેલ મેં’ એક જ સમયગાળામાં બોક્સ ઓફિસ પર સામસામે આવી હતી. તેથી બંને કલાકારોની ફિલ્મો ફરી એક જ દિવસે રિલીઝ થશે કે કેમ તેના પર ફિલ્મરસિકોની નજર હતી.
હવે અક્ષયની ફિલ્મની તારીખ બદલાવાના અહેવાલ અને અજય દેવગણની ‘રેન્જર’ 2027 સુધી પાછળ ધકેલાવાની ચર્ચા વચ્ચે 4 ડિસેમ્બરે ‘ઈઠા’ માટે મોટી હિન્દી ફિલ્મની સીધી ટક્કર ટળી શકે છે. જોકે સંબંધિત ફિલ્મોની અંતિમ રિલીઝ તારીખો અંગે નિર્માતાઓની સત્તાવાર જાહેરાત બાદ જ સ્થિતિ સંપૂર્ણપણે સ્પષ્ટ થશે.
