લગ્ન પહેલાં જ IVF દ્વારા માતા બનવા માંગતી હતી સ્વરા ભાસ્કર, બે વખત પ્રયાસ કર્યો પણ ન મળી સફળતા
ફહાદ અહમદ સાથે લગ્ન પહેલાં સિંગલ મધર બનવાનો નિર્ણય લીધો હોવાનો અભિનેત્રીનો ખુલાસો; માતા-પિતાએ સામાજિક પડકારો અંગે સમજાવ્યા બાદ પણ આપ્યો હતો સાથ
saurashtrabhoomi 
મુંબઈ, તા.૨૯
બોલિવૂડ અભિનેત્રી સ્વરા ભાસ્કરે પોતાના અંગત જીવનને લઈને એક મહત્વપૂર્ણ ખુલાસો કર્યો છે. સ્વરાના જણાવ્યા પ્રમાણે ફહાદ અહમદ સાથે લગ્ન પહેલાં એક સમયે તેણે માની લીધું હતું કે કદાચ તે ક્યારેય લગ્ન નહીં કરે. જોકે લગ્ન થાય કે ન થાય, પોતે માતા જરૂર બનવા માગતી હતી અને તેના માટે IVFનો માર્ગ અપનાવવાનો નિર્ણય પણ કરી લીધો હતો.
‘રાઇઝ એન્ડ ફોલ સિઝન 2’માં અન્ય સ્પર્ધકો સાથે વાતચીત દરમિયાન સ્વરાએ પોતાના જીવનના આ તબક્કા વિશે વાત કરી હતી. તેણે જણાવ્યું કે લગ્ન પહેલાં જ તેણે સિંગલ મધર બનવા માટે IVF દ્વારા માતૃત્વ મેળવવાનો નિર્ણય કર્યો હતો. આ નિર્ણય માત્ર વિચાર પૂરતો મર્યાદિત નહોતો, પરંતુ તેણે તેના માટે પ્રક્રિયા પણ શરૂ કરી દીધી હતી.
સ્વરાના જણાવ્યા પ્રમાણે જ્યારે તેણે લગ્ન કર્યા વિના માતા બનવાના નિર્ણય અંગે પોતાના માતા-પિતા સાથે વાત કરી ત્યારે શરૂઆતમાં તેઓ ચોંકી ગયા હતા. તેમને આ નિર્ણય સમજવા અને સ્વીકારવામાં થોડો સમય લાગ્યો હતો. જોકે સ્વરા આ બાબતે ગંભીર હોવાનું સમજાયા બાદ માતા-પિતાએ તેના નિર્ણયને સ્વીકાર્યો હતો.
સાથે જ તેના માતા-પિતાએ ભારતમાં સિંગલ મધર તરીકે બાળકનો ઉછેર કરવામાં આવી શકે તેવા સામાજિક અને વ્યવહારિક પડકારો અંગે પણ તેને સમજાવ્યું હતું. સ્વરાના કહેવા પ્રમાણે આ તમામ બાબતોની ચર્ચા બાદ પણ માતા-પિતાએ તેની ઇચ્છાને માન આપીને તેને સાથ આપવાનો નિર્ણય કર્યો હતો.
અભિનેત્રીએ વધુમાં ખુલાસો કર્યો કે તેણે ડોનરની મદદથી IVF પ્રક્રિયા દ્વારા માતા બનવા માટે બે વખત પ્રયાસ પણ કર્યો હતો. જોકે બંને પ્રયાસ સફળ થયા નહોતા. બે વખત નિષ્ફળતા મળ્યા બાદ એક સમયે સ્વરાને લાગવા લાગ્યું હતું કે સિંગલ મધર બનવાનું તેનું સપનું કદાચ સાકાર નહીં થઈ શકે.
આ દરમિયાન સ્વરાના અંગત જીવનમાં મોટો બદલાવ આવ્યો. તેના જણાવ્યા પ્રમાણે જાન્યુઆરી 2020માં તેની મુલાકાત ફહાદ અહમદ સાથે થઈ હતી. શરૂઆતમાં બંને વચ્ચે મિત્રતા હતી અને ત્યારબાદ આ સંબંધ પ્રેમમાં બદલાયો હતો.
સ્વરા અને ફહાદે 16 ફેબ્રુઆરી, 2023ના રોજ કોર્ટ મેરેજ કર્યા હતા. ત્યારબાદ પરિવારજનો અને મિત્રોની હાજરીમાં લગ્ન સંબંધિત પરંપરાગત કાર્યક્રમો પણ યોજાયા હતા. લગ્નના થોડા મહિનાઓ બાદ સ્વરાનું માતા બનવાનું સપનું પણ સાકાર થયું.
સ્વરાએ સપ્ટેમ્બર 2023માં દીકરીને જન્મ આપ્યો હતો. આમ એક સમયે લગ્ન વિના IVF દ્વારા માતા બનવા માટે પ્રયાસ કરી રહેલી સ્વરાના જીવનમાં ફહાદના આગમન બાદ પરિસ્થિતિ બદલાઈ અને લગ્ન બાદ તે માતા બની હતી.
પોતાના અંગત જીવનના આ અનુભવો વિશે વાત કરતાં સ્વરાએ માતૃત્વ મેળવવાની પોતાની લાંબા સમયથી રહેલી ઇચ્છા અને તે માટે લીધેલા નિર્ણય અંગે ખુલીને વાત કરી છે. ખાસ કરીને લગ્ન પહેલાં IVF માટે કરેલા બે પ્રયાસ અને આ નિર્ણય અંગે માતા-પિતા સાથે થયેલી ચર્ચાનો ખુલાસો તેના ચાહકો માટે અત્યાર સુધી ઓછી જાણીતી બાબત હતી.
