રિલીઝ પહેલાં જ ‘Toxic’નો દબદબો, એડવાન્સ બુકિંગમાં ૮ કલાકમાં ૯૧ હજારથી વધુ ટિકિટ વેચાઈ
યશની ફિલ્મે પહેલા જ દિવસે બોક્સ ઓફિસ પર ધમાકેદાર શરૂઆતના સંકેત આપ્યા, એડવાન્સ બુકિંગમાં કરોડોની કમાણી
saurashtrabhoomi 
મુંબઈ, તા. ૨૨:
કન્નડ સુપરસ્ટાર યશની મોસ્ટ અવેટેડ ફિલ્મ ‘Toxic’ રિલીઝ પહેલાં જ ચર્ચામાં આવી ગઈ છે. ફિલ્મનું એડવાન્સ બુકિંગ શરૂ થતાં જ દર્શકોનો જબરદસ્ત પ્રતિસાદ જોવા મળી રહ્યો છે. ટિકિટ બુકિંગની શરૂઆતના થોડા કલાકોમાં જ હજારો ટિકિટ વેચાઈ જતા ફિલ્મના બોક્સ ઓફિસ કલેક્શનને લઈને પણ અપેક્ષાઓ વધી ગઈ છે.
‘Toxic’નું એડવાન્સ બુકિંગ શુક્રવારે સવારે ૮ વાગ્યાથી શરૂ કરવામાં આવ્યું હતું. ત્યારબાદ દર્શકોમાં ફિલ્મને લઈને જોવા મળેલી ઉત્સુકતાની સીધી અસર ટિકિટ વેચાણ પર જોવા મળી હતી. સૈકનિલ્કના રિપોર્ટ અનુસાર, બુકિંગ શરૂ થયાના માત્ર ૮થી ૯ કલાકમાં જ ફિલ્મની ૯૧ હજારથી વધુ ટિકિટ વેચાઈ ગઈ હતી.
અહેવાલ મુજબ સાંજે ૫ વાગ્યા સુધીમાં ‘Toxic’ની કુલ ૯૧,૩૦૧ ટિકિટનું વેચાણ થઈ ચૂક્યું હતું. આ દરમિયાન ફિલ્મને કુલ ૫,૩૬૦ શો મળ્યા હતા. શરૂઆતના આંકડા જોતા ફિલ્મને લઈને દર્શકોમાં કેટલો ક્રેઝ છે તેનો અંદાજ લગાવી શકાય છે.
એડવાન્સ બુકિંગમાંથી ફિલ્મે અત્યાર સુધીમાં આશરે ૪.૩૬ કરોડ રૂપિયાનો બિઝનેસ કર્યો હોવાનું સામે આવ્યું છે. જ્યારે બ્લોક સીટની કમાણીનો સમાવેશ કરવામાં આવે તો આ આંકડો આશરે ૯.૪૭ કરોડ રૂપિયા સુધી પહોંચી જાય છે. ફિલ્મની રિલીઝ પહેલાં જ આટલી કમાણી થતાં ટ્રેડમાં પણ ‘Toxic’ને લઈને ચર્ચા તેજ બની છે.
યશના ચાહકો લાંબા સમયથી આ ફિલ્મની રાહ જોઈ રહ્યા છે. ફિલ્મના પોસ્ટર, ટીઝર અને અન્ય અપડેટ્સને પણ સોશિયલ મીડિયા પર સારો પ્રતિસાદ મળ્યો છે. હવે એડવાન્સ બુકિંગના આંકડાઓએ ફિલ્મની રિલીઝને લઈને ઉત્સાહમાં વધુ વધારો કર્યો છે.
‘Toxic’ એક એક્શન થ્રિલર ફિલ્મ છે, જેમાં યશ સાથે કિયારા અડવાણી, નયનતારા, હુમા કુરેશી અને તારા સુતરિયા જેવા કલાકારો મહત્વની ભૂમિકામાં જોવા મળશે. ફિલ્મને લઈને પહેલેથી જ મોટું બઝ જોવા મળી રહ્યું છે અને હવે એડવાન્સ બુકિંગના આંકડા ફિલ્મની ઓપનિંગને લઈને નવી ચર્ચા ઊભી કરી રહ્યા છે.
જો એડવાન્સ બુકિંગની આ જ ગતિ રિલીઝ સુધી જળવાઈ રહેશે તો ‘Toxic’ને બોક્સ ઓફિસ પર શાનદાર શરૂઆત મળી શકે છે. જોકે, ફિલ્મ રિલીઝ થયા બાદ દર્શકોનો પ્રતિસાદ અને વાસ્તવિક કલેક્શન જ તેની સફળતાની સાચી તસવીર રજૂ કરશે.
