માળિયા હાટીના તાલુકાના તમામ PHCમાં CPR અને ફર્સ્ટ રિસ્પોન્ડન્ટ તાલીમ, કટોકટીમાં જીવન બચાવવાની અપાઈ પ્રાયોગિક સમજ
‘સેવા સંકલ્પ અભિયાન’ અંતર્ગત આરોગ્ય વિભાગની પહેલ; હાર્ટ એટેક, કાર્ડિએક અરેસ્ટ અને માર્ગ અકસ્માત જેવી સ્થિતિમાં એમ્બ્યુલન્સ પહોંચે તે પહેલાં પ્રાથમિક જીવનરક્ષક સહાય કેવી રીતે આપવી તેનું માર્ગદર્શન
saurashtrabhoomi 
જૂનાગઢ તા.૨૪
રાજ્ય સરકાર દ્વારા આયોજિત ‘સેવા સંકલ્પ અભિયાન: સેવા મેરા યોગદાન’ અંતર્ગત જૂનાગઢ જિલ્લાના માળિયા હાટીના તાલુકામાં CPR અને ‘ફર્સ્ટ રિસ્પોન્ડન્ટ ટ્રેનિંગ’ કાર્યક્રમનું આયોજન કરવામાં આવ્યું હતું. તાલુકાના તમામ પ્રાથમિક આરોગ્ય કેન્દ્રો એટલે કે PHC ખાતે યોજાયેલી આ તાલીમમાં કટોકટીની સ્થિતિમાં સમયસર પ્રાથમિક સહાય આપીને દર્દીનો જીવ બચાવવાના પ્રયાસો અંગે પ્રાયોગિક માર્ગદર્શન આપવામાં આવ્યું હતું.
તાલુકા હેલ્થ ઓફિસર ડૉ. ડાભીના સીધા માર્ગદર્શન હેઠળ આયોજિત કાર્યક્રમમાં તાલુકાના તમામ PHCના મેડિકલ ઓફિસર્સ, આયુષ મેડિકલ ઓફિસર્સ, કોમ્યુનિટી હેલ્થ ઓફિસર્સ તેમજ અન્ય હેલ્થ સ્ટાફે સક્રિય રીતે કામગીરી બજાવી હતી. તાલીમ દરમિયાન સ્થાનિક નાગરિકોને પણ કટોકટીના સમયે ‘ફર્સ્ટ રિસ્પોન્ડન્ટ’ તરીકે તેમની ભૂમિકા અંગે સમજ આપવામાં આવી હતી.
ખાસ કરીને કોઈ વ્યક્તિને કાર્ડિએક અરેસ્ટ થાય અથવા માર્ગ અકસ્માત જેવી ગંભીર ઘટના સર્જાય ત્યારે તબીબી મદદ પહોંચે તે પહેલાં આસપાસ હાજર વ્યક્તિ દ્વારા તાત્કાલિક અને યોગ્ય પ્રાથમિક સહાય મહત્વપૂર્ણ બની શકે છે. આ માટે CPR એટલે કે કાર્ડિયોપલ્મોનરી રિસસિટેશન કેવી રીતે આપવામાં આવે તેની પ્રાયોગિક ડેમોન્સ્ટ્રેશન સાથે તાલીમ આપવામાં આવી હતી.
કાર્યક્રમમાં કટોકટીની સ્થિતિ ઓળખવી, તાત્કાલિક મદદ માટે સંપર્ક કરવો અને પ્રશિક્ષિત રીતે જીવનરક્ષક પ્રાથમિક સહાય આપવાના મુદ્દાઓ અંગે જાગૃતિ કેળવવામાં આવી હતી. ખાસ કરીને એમ્બ્યુલન્સ અને તબીબી ટીમ સ્થળ પર પહોંચે ત્યાં સુધીના શરૂઆતના મહત્વપૂર્ણ સમયમાં સ્થાનિક લોકો અસરકારક ‘ફર્સ્ટ રિસ્પોન્ડન્ટ’ બની શકે તે માટે જરૂરી સમજ પૂરી પાડવામાં આવી હતી.
તાલીમમાં સ્થાનિક અગ્રણીઓ, યુવાનો અને સામાન્ય નાગરિકોએ પણ ઉપસ્થિત રહી CPR તથા પ્રાથમિક કટોકટી પ્રતિસાદ અંગે માર્ગદર્શન મેળવ્યું હતું. આરોગ્ય કર્મચારીઓ દ્વારા પ્રાયોગિક રીતે આપવામાં આવેલી સમજને કારણે ઉપસ્થિત લોકોને આવી પરિસ્થિતિમાં શું કરવું અને કેવી રીતે તાત્કાલિક મદદરૂપ થવું તે અંગે જાણકારી મળી હતી.
માળિયા હાટીના તાલુકા હેલ્થ ઓફિસ અને સ્થાનિક આરોગ્ય વિભાગના સંકલનથી તાલુકાના વિવિધ આરોગ્ય કેન્દ્રોમાં યોજાયેલા આ કાર્યક્રમ દ્વારા આરોગ્ય સેવાઓની સાથે કટોકટી વ્યવસ્થાપન અને માર્ગ સલામતી અંગે પણ જાગૃતિ ફેલાવવાનો પ્રયાસ કરવામાં આવ્યો હતો.
‘સેવા સંકલ્પ અભિયાન’ અંતર્ગત યોજાયેલી આ તાલીમનો મુખ્ય હેતુ આરોગ્ય કર્મચારીઓ ઉપરાંત સામાન્ય નાગરિકોમાં પણ જીવનરક્ષક પ્રાથમિક સહાય અંગે સમજ વધારવાનો હતો, જેથી અચાનક સર્જાતી ગંભીર પરિસ્થિતિમાં તબીબી મદદ પહોંચે ત્યાં સુધી યોગ્ય અને સમયસર પ્રાથમિક પ્રતિસાદ આપી શકાય.
