જૂનાગઢ GMERSના ડૉ. એ. સી. કુબાવત વયમર્યાદાથી નિવૃત્ત, ભાવભર્યો વિદાય સમારોહ યોજાયો
લાંબા સેવાકાળ દરમિયાન દર્દીઓની આરોગ્યસેવામાં આપેલા યોગદાનને હોસ્પિટલ પરિવારે બિરદાવ્યું; સહકર્મચારીઓએ પાઠવી શુભેચ્છા
saurashtrabhoomi 
જૂનાગઢ તા. 11
જૂનાગઢની જીએમઇઆરએસ મેડિકલ કોલેજ અને હોસ્પિટલમાં લાંબા સમયથી ફરજ બજાવી આરોગ્યસેવા ક્ષેત્રે યોગદાન આપનાર ડૉ. એ. સી. કુબાવત વયમર્યાદાના કારણે નિવૃત્ત થતાં તેમના સન્માનમાં વિદાય સમારોહનું આયોજન કરવામાં આવ્યું હતું. આ પ્રસંગે હોસ્પિટલ પરિવાર દ્વારા તેમની લાંબી સેવાકીય કામગીરીને યાદ કરી નિવૃત્ત જીવન માટે શુભકામનાઓ પાઠવવામાં આવી હતી.
વિદાય સમારોહમાં જીએમઇઆરએસ મેડિકલ કોલેજ અને હોસ્પિટલના તબીબી અધિક્ષક ડૉ. કૃતાર્થ બ્રહ્મભટ્ટ, ઇન્ચાર્જ આર.એમ.ઓ. ડૉ. અલ્પેશ વૈષ્નાણી સહિત તબીબો, વહીવટી કચેરીના કર્મચારીઓ, નર્સિંગ સ્ટાફ તેમજ વર્ગ-૩ અને વર્ગ-૪ના કર્મચારીઓ મોટી સંખ્યામાં ઉપસ્થિત રહ્યા હતા.
આ પ્રસંગે તબીબી અધિક્ષક ડૉ. કૃતાર્થ બ્રહ્મભટ્ટે ડૉ. એ. સી. કુબાવતના સેવાકાળ અને તેમની કામગીરીને બિરદાવી હતી. તેમણે જણાવ્યું હતું કે ડૉ. કુબાવતે પોતાની ફરજ દરમિયાન દર્દીઓની સેવા અને માનવતાને મહત્વ આપ્યું હતું. દર્દીઓ પ્રત્યેનો સંવેદનશીલ અભિગમ, તબીબી સેવા પ્રત્યેની નિષ્ઠા, સહકર્મચારીઓ સાથેનો સહકાર અને જવાબદારીપૂર્વકની કામગીરી હોસ્પિટલ પરિવાર માટે પ્રેરણારૂપ રહી છે.
ડૉ. કુબાવતે પોતાના કાર્યકાળ દરમિયાન અનેક દર્દીઓને આરોગ્ય સેવાઓ પૂરી પાડી હતી. જરૂરિયાતમંદ દર્દીઓ પ્રત્યે સહાનુભૂતિપૂર્ણ વ્યવહાર અને દર્દીઓના હિતને પ્રાથમિકતા આપવાની તેમની કાર્યશૈલીને પણ ઉપસ્થિત તબીબો અને કર્મચારીઓએ યાદ કરી હતી. તેમના અનુભવનો લાભ હોસ્પિટલ અને સહકર્મચારીઓને લાંબા સમય સુધી મળ્યો હોવાનું આ પ્રસંગે જણાવાયું હતું.
સમારોહ દરમિયાન સહકર્મચારીઓએ ડૉ. એ. સી. કુબાવત સાથેના પોતાના અનુભવો પણ વ્યક્ત કર્યા હતા. અંતમાં જીએમઇઆરએસ હોસ્પિટલ પરિવાર દ્વારા તેમના લાંબા સેવાકાળ અને આરોગ્ય ક્ષેત્રે આપેલા યોગદાન બદલ આભાર વ્યક્ત કરી સ્વસ્થ, સુખમય અને આનંદમય નિવૃત્ત જીવન માટે શુભેચ્છાઓ પાઠવવામાં આવી હતી.
)
