અક્ષય કુમાર અને ભૂમિ પેડનેકરની જોડી ફરી સાથે, પ્રિયદર્શનની આગામી કોમેડી ફિલ્મમાં કરશે કામ
૧૯૭૦ના દાયકાની પૃષ્ઠભૂમિ ધરાવતી ફિલ્મમાં અક્ષય વાઘના શિકારીની ભૂમિકામાં જોવા મળશે; નવેમ્બર ૨૦૨૬ના અંતમાં શૂટિંગ શરૂ થવાની શક્યતા
saurashtrabhoomi 
મુંબઈ, તા. ૩
બોલિવૂડ અભિનેતા અક્ષય કુમાર અને અભિનેત્રી ભૂમિ પેડનેકરની જોડી ફરી એકવાર મોટા પડદા પર જોવા મળશે. દિગ્દર્શક પ્રિયદર્શનની આગામી કોમેડી ફિલ્મમાં બંને કલાકારો સાથે કામ કરવાના છે. આ ફિલ્મ તેમની સાથેની ત્રીજી ફિલ્મ હશે. અગાઉ બંને ‘ટોઇલેટ: એક પ્રેમ કથા’ અને ‘રક્ષાબંધન’માં સાથે જોવા મળ્યાં હતાં. વર્ષ ૨૦૨૨માં રિલીઝ થયેલી ‘રક્ષાબંધન’ના ચાર વર્ષ બાદ તેમની જોડી ફરી એકવાર સાથે જોવા મળશે.
અહેવાલો અનુસાર, ભૂમિ પેડનેકરને આ ફિલ્મમાં મુખ્ય અભિનેત્રી તરીકે પસંદ કરવામાં આવી છે. દિગ્દર્શક પ્રિયદર્શને પણ તેમના કાસ્ટિંગની પુષ્ટિ કરી હોવાનું જાણવા મળ્યું છે. પ્રિયદર્શન દિગ્દર્શક તરીકેની પોતાની ૯૯મી ફિલ્મમાં અક્ષય કુમાર સાથે કામ કરશે.
ફિલ્મની વાર્તા ૧૯૭૦ના દાયકાની પૃષ્ઠભૂમિ પર આધારિત હોવાનું કહેવાય છે. તેમાં અક્ષય કુમાર વાઘના શિકારીની ભૂમિકામાં જોવા મળશે. જોકે, ફિલ્મની વાર્તા અને અન્ય પાત્રો અંગેની વિગતો હાલ ગુપ્ત રાખવામાં આવી છે. આ ફિલ્મને તે સમયગાળાની પૃષ્ઠભૂમિ ધરાવતી કોમેડી તરીકે રજૂ કરવામાં આવશે તેવી ચર્ચા છે.
અગાઉના અહેવાલોમાં ફિલ્મમાં કોમેડીની સાથે વન્યજીવ સંરક્ષણ અને થ્રિલરનાં તત્ત્વો પણ જોવા મળવાની શક્યતા વ્યક્ત કરવામાં આવી હતી. જોકે, નિર્માતાઓ તરફથી આ અંગે હજુ સુધી સત્તાવાર વિગતો જાહેર કરવામાં આવી નથી. અહેવાલો મુજબ, અશુ કપૂર અને રાજપાલ યાદવ પણ ફિલ્મનો હિસ્સો બની શકે છે, પરંતુ તેમના પાત્રો અંગે કોઈ સત્તાવાર જાહેરાત થઈ નથી.
ફિલ્મનું શૂટિંગ નવેમ્બર ૨૦૨૬ના છેલ્લા સપ્તાહમાં શરૂ થવાની શક્યતા છે. શૂટિંગનો સમયગાળો આશરે ત્રણ મહિનાનો રહેવાની ધારણા છે. રાજસ્થાન અને મુંબઈ ઉપરાંત ભોપાલમાં પણ ફિલ્મનું શૂટિંગ કરવામાં આવી શકે છે. અક્ષય કુમાર અને ભૂમિ પેડનેકરની ફરી એકવાર સાથે જોવા મળનારી જોડીને લઈને ચાહકોમાં ઉત્સુકતા જોવા મળી રહી છે.
)
