‘સ્ત્રી 2’ પછી શ્રદ્ધાએ ઉતાવળે ફિલ્મો સાઇન કરવાનું ટાળ્યું
અનેક ઓફર ઠુકરાવી મનપસંદ વાર્તાની રાહ જોઈ; હવે ‘ઈથા’માં લોકકલાકાર વિઠાબાઈની ભૂમિકામાં જોવા મળશે
saurashtrabhoomi 
મુંબઈ તા.7
‘સ્ત્રી 2’ની શાનદાર સફળતા બાદ અભિનેત્રી શ્રદ્ધા કપૂરે ઉતાવળમાં કોઈ નવી ફિલ્મ સ્વીકારવાને બદલે પોતાની પસંદગીની વાર્તાની રાહ જોવાનો નિર્ણય લીધો હતો. આ સમયગાળા દરમિયાન તેને અનેક ફિલ્મોની ઓફર મળી હતી. કેટલીક ફિલ્મો માટે આકર્ષક ફીની ઓફર પણ કરવામાં આવી હતી, પરંતુ શ્રદ્ધાએ મનને ગમે તેવી વાર્તા ન મળે ત્યાં સુધી નવી ફિલ્મ સાઇન ન કરવાનું નક્કી કર્યું હતું. લાંબી રાહ જોયા બાદ હવે તે દિગ્દર્શક લક્ષ્મણ ઉટેકરની આગામી ફિલ્મ ‘ઈથા’માં મુખ્ય ભૂમિકામાં જોવા મળશે.
શ્રદ્ધાએ ‘સ્ત્રી 2’ પછીના પોતાના નિર્ણય અંગે જણાવ્યું હતું કે તેને ઘણી ફિલ્મોની ઓફર મળી હતી, પરંતુ તેણે ઉતાવળ કરવાને બદલે ધીરજ રાખી અને પોતાના મનનો અવાજ સાંભળ્યો. તેણે કહ્યું હતું કે જે વસ્તુની ખૂબ ઇચ્છા હોય તેની રાહ જોવી મુશ્કેલ હોય છે, પરંતુ આજે તેને પોતાના નિર્ણય પર ગર્વ છે. તેના મતે, ક્યારેક હૃદયનો અવાજ સાંભળવો મુશ્કેલ બને છે, પરંતુ અંતે તે નિર્ણય સાર્થક સાબિત થાય છે.
‘ઈથા’ મહારાષ્ટ્રની પરંપરાગત તમાશા અને લાવણી કલાને સમર્પિત બાયોગ્રાફિકલ મ્યુઝિકલ ડ્રામા છે. આ ફિલ્મ લોકકલાકાર વિઠાબાઈ નારાયણગાંવકરના જીવન પર આધારિત છે, જેમાં શ્રદ્ધા કપૂર વિઠાબાઈની મુખ્ય ભૂમિકા ભજવી રહી છે. લક્ષ્મણ ઉટેકરના દિગ્દર્શન અને ક્ષિતિજ પટવર્ધનના લેખન હેઠળ તૈયાર થઈ રહેલી આ ફિલ્મમાં વિઠાબાઈની ગ્રામીણ લોકમંચથી લઈને રાષ્ટ્રપતિ ભવન સુધીની સફર રજૂ કરવામાં આવશે. આ ઉપરાંત ફિલ્મમાં જાતિભેદ, લિંગભેદ અને તેમના જીવનના વ્યક્તિગત સંઘર્ષ જેવા મહત્ત્વના મુદ્દાઓને પણ વણી લેવામાં આવ્યા છે.
દિનેશ વિજાનની મેડોક ફિલ્મ્સ અને કટપૂતલી ક્રિએશન્સ દ્વારા નિર્મિત આ ફિલ્મમાં રણદીપ હૂડા, મોહમ્મદ ઝીશાન અય્યુબ અને સિદ્ધાર્થ જાધવ પણ મહત્ત્વની ભૂમિકાઓમાં જોવા મળશે. ફિલ્મનું સંગીત અજય-અતુલ દ્વારા તૈયાર કરવામાં આવ્યું છે. ‘ઈથા’ આગામી 4 ડિસેમ્બર, 2026ના રોજ દેશભરના સિનેમાઘરોમાં રિલીઝ થવાની છે. આમ, લાંબી રાહ બાદ શ્રદ્ધા કપૂર એક અલગ વિષય અને પડકારજનક પાત્ર સાથે મોટા પડદા પર પરત ફરશે.
