પ્રાંચી તીર્થ ખાતે અમાસે મોક્ષ પટ્ઠીપળે પાણી રેડવા ભાવિકોનો ભારે ધસારો જોવા મળશે
મધરાત્રીથી જ પિતૃ તર્પણનો પ્રારંભ થશે : ૧૦૮ પ્રદક્ષિણા સાથે વિવિધ ધામિર્ક વિધિમાં ભાવિકો જોડાશે
saurashtrabhoomi 
(પ્રતિનિધિ દ્વારા)
પ્રાચી તીર્થ તા.૧૦
સુપ્રસિદ્ધ પ્રાચી તીર્થ પિતૃ તર્પણ, શ્રાદ્ધ અને પિંડદાન જેવી ધામિર્ક વિધિઓ માટે વિશેષ આસ્થાનું કેન્દ્ર માનવામાં આવે છે. અમાસના પવિત્ર દિવસને લઈને પ્રાચી તીર્થ ખાતે આવતીકાલે મોટી સંખ્યામાં ભાવિકો ઉમટી પડવાની સંભાવના છે. ખાસ કરીને સુવિખ્યાત મોક્ષ પીપળે પાણી રેડવા માટે વહેલી સવારથી જ ભાવિકોનો ભારે ધસારો જોવા મળશે. પિતૃઓની આત્માની શાંતિ અને સદગતિ માટે ભાવિકો શ્રદ્ધાપૂર્વક વિવિધ ધામિર્ક વિધિઓ કરશે. પ્રાચી તીર્થ ખાતે અમાસના દિવસે પિતૃકાર્યનું વિશેષ મહત્વ હોવાથી દૂર-દૂરના વિસ્તારોમાંથી શ્રદ્ધાળુઓ પોતાના સ્વજનો તથા પિતૃઓના સ્મરણાર્થે અહીં પહોંચે છે. અનેક ભાવિકો દ્વારા મધરાત્રીથી જ પિતૃઓને પાણી અર્પણ કરવાની વિધિનો પ્રારંભ કરવામાં આવે છે. પવિત્ર સ્થળે સ્નાન કરી સંકલ્પ સાથે મોક્ષ પીપળાની પૂજા-અર્ચના કર્યા બાદ પાણી રેડવામાં આવે છે. મોક્ષ પીપળે પાણી અર્પણ કર્યા બાદ ભાવિકો ૧૦૮ પ્રદક્ષિણા ફરી પોતાના પિતૃઓની શાંતિ માટે પ્રાર્થના કરે છે. ત્યારબાદ યથાશક્તિ દાન-દક્ષિણા અર્પણ કરી ધામિર્ક વિધિ પૂર્ણ કરવામાં આવે છે. પ્રાચી તીર્થમાં પિતૃ તર્પણ સાથે શ્રાદ્ધ, પિંડદાન સહિતની વિવિધ પૌરાણિક ધામિર્ક વિધિઓ પણ કરવામાં આવે છે. પ્રાચી તીર્થ ખાતે પિતૃઓની શાંતિ માટે નારાયણબલી, પ્રેતબલી, નાગબલી, ત્રિપિંડિ સહિતની શાસ્ત્રોક્ત વિધિઓ થતી હોવાનું તીર્થસ્થળની માહિતીમાં પણ જણાવાયું છે.
માધવરાયજી સહિત પૌરાણિક મંદિરોમાં દર્શનનો લાભ
પિતૃકાર્ય પૂર્ણ કર્યા બાદ ભાવિકો પ્રાચી તીર્થમાં આવેલા શ્રી માધવરાયજી પ્રભુ અને લક્ષ્મીજી મંદિરના દર્શન કરી ધન્યતા અનુભવે છે. ઉપરાંત શીતળા માતાજી મંદિર તથા પ્રાચીન શિવ મંદિરો સહિતના વિવિધ ધામિર્ક સ્થળોએ દર્શન-પૂજન કરવામાં આવે છે. પ્રાચી તીર્થમાં પવિત્ર નદી, કુંડ, મોક્ષ પીપળો તથા અનેક પ્રાચીન ધામિર્ક સ્થળો આવેલા હોવાથી એક જ યાત્રામાં અનેક પૌરાણિક સ્થળોના દર્શનનો લાભ ભાવિકોને મળે છે.
બજારમાં મેળા જેવો માહોલ સર્જાશે
અમાસના દિવસે મોટી સંખ્યામાં ભાવિકો પ્રાચી તીર્થ ખાતે ઉમટી પડતા સમગ્ર તીર્થધામમાં ભક્તિમય માહોલ સર્જાય છે. મંદિર વિસ્તાર ઉપરાંત બજાર વિસ્તારમાં પણ મેળા જેવો માહોલ જોવા મળે છે. વિવિધ નાના-મોટા વેપારીઓ દ્વારા ચીજવસ્તુઓના સ્ટોલ તથા દુકાનો ઉભી કરવામાં આવતા બજારમાં પણ ખાસ ચહલપહલ જોવા મળે છે. અગાઉ પણ ભાદરવી અમાસ અને પિતૃકાર્યના દિવસોમાં પ્રાચી તીર્થ ખાતે મોટી સંખ્યામાં યાત્રિકો ઉમટતા હોવાના અહેવાલો પ્રસિદ્ધ થયા છે.
આમ, અમાસના પવિત્ર અવસરે પ્રાચી તીર્થ ખાતે પિતૃ તર્પણ અને મોક્ષ પીપળે પાણી અર્પણ કરવા માટે ભક્તોની મોટી ભીડ ઉમટવાની સાથે સમગ્ર પ્રાચી તીર્થ ધર્મમય વાતાવરણથી ગુંજી ઊઠશે. પિતૃઓના સ્મરણ સાથે શ્રદ્ધાળુઓ પૂજા-અર્ચના, તર્પણ, પ્રદક્ષિણા અને દાન-દક્ષિણા કરી પોતાના પૂર્વજોની આત્મશાંતિ માટે પ્રાર્થના કરશે.
(તસ્વીર : જાદવભાઈ ચુડાસમા)
