પ્રિયંકા ચોપરા હવે રસેલ ક્રો સાથે ‘બ્લુફ્લાય’માં જોવા મળશે, સાયન્સ-ફિક્શન થ્રિલરમાં લીડ રોલ
ઓસ્કાર વિજેતા રસેલ ક્રો સાથે પ્રિયંકા ચોપરાની નવી હોલિવૂડ ફિલ્મ, વર્ષના અંતમાં ઓસ્ટ્રેલિયામાં શરૂ થઈ શકે છે શૂટિંગ
saurashtrabhoomi 
મુંબઈ, તા. 12
વૈશ્વિક સ્તરે પોતાની ઓળખ બનાવી ચૂકેલી અભિનેત્રી પ્રિયંકા ચોપરા જોનાસ હવે વધુ એક મોટા હોલિવૂડ પ્રોજેક્ટમાં જોવા મળવાની છે. પ્રિયંકા આગામી સાયન્સ-ફિક્શન એક્શન થ્રિલર ફિલ્મ ‘બ્લુફ્લાય’માં ઓસ્કાર વિજેતા અભિનેતા રસેલ ક્રો સાથે મુખ્ય ભૂમિકામાં નજરે પડશે. આ ફિલ્મ સાથે પ્રિયંકાની આંતરરાષ્ટ્રીય ફિલ્મ કારકિર્દીમાં વધુ એક મહત્વપૂર્ણ પ્રોજેક્ટનો ઉમેરો થયો છે.
‘બ્લુફ્લાય’નું દિગ્દર્શન નિમરોડ એન્ટલ કરશે, જેઓ ‘પ્રેડેટર્સ’ અને ‘સ્ટ્રેન્જર થિંગ્સ’ જેવા પ્રોજેક્ટ્સ સાથે સંકળાયેલા રહી ચૂક્યા છે. ફિલ્મની વાર્તા ડેવિડ ફ્રિગેરિયો, વિલિયમ યુબેન્ક અને કાર્લાઇલ યુબેન્કે લખી છે. ફિલ્મનું શૂટિંગ આ વર્ષના અંતમાં ઓસ્ટ્રેલિયાના ગોલ્ડ કોસ્ટ ખાતે શરૂ થવાની શક્યતા છે.
ફિલ્મની વાર્તા એક સંયુક્ત રાષ્ટ્રની અનુવાદકની આસપાસ ફરે છે, જે અંગત દુઃખમાંથી પસાર થઈ રહી છે. તેને એવા રહસ્યમય વિમાનને શોધવાના ગુપ્ત મિશનમાં સામેલ કરવામાં આવે છે, જેનું સત્તાવાર રીતે કોઈ અસ્તિત્વ જ નથી. મિલેશિયાના કબજાવાળા વિસ્તારમાં સ્પેશિયલ ઓપરેશન્સ ટીમ સાથે આગળ વધતી આ ટીમને તપાસ દરમિયાન અનેક ચોંકાવનારા રહસ્યોનો સામનો કરવો પડે છે. અંતે વિમાનના અસ્તિત્વ પાછળનું રહસ્ય વધુ ગંભીર સ્વરૂપ ધારણ કરે છે અને ખુલાસો થાય છે કે તેને ક્યારેય પરત લાવવા માટે બનાવવામાં આવ્યું જ નહોતું.
આ ફિલ્મનું નિર્માણ માઇકલ જેફરસન, ડેવિડ ફ્રિગેરિયો, ડેબોરા ગ્લોવર, એરિયાને ફ્રેઝર, ડેલ્ફિન પેરિયર અને વેનેસા યાઓ ગુઓ કરી રહ્યા છે. ફિલ્મના વૈશ્વિક વિતરણ અધિકારો હાઇલેન્ડ ફિલ્મ ગ્રુપ પાસે છે અને ટોરોન્ટો ઇન્ટરનેશનલ ફિલ્મ ફેસ્ટિવલ દરમિયાન આંતરરાષ્ટ્રીય ખરીદદારો સમક્ષ ફિલ્મ રજૂ કરવાની યોજના છે.
પ્રિયંકા છેલ્લા કેટલાક સમયથી એક પછી એક મોટા આંતરરાષ્ટ્રીય પ્રોજેક્ટ્સ સાથે જોડાઈ રહી છે. તાજેતરમાં જ ઓર્લાન્ડો બ્લૂમ સાથેની સર્વાઇવલ થ્રિલર ‘રીસેટ’માં તેના અભિનયની જાહેરાત થઈ હતી. આ ઉપરાંત તેની પ્રાઇમ વિડિયો ફિલ્મ ‘ધ બ્લફ’ને પણ વૈશ્વિક સ્તરે સારો પ્રતિસાદ મળ્યો હતો. ઇદ્રિસ એલ્બા અને જોન સીના સાથેની એક્શન-કોમેડી ‘હેડ્સ ઓફ સ્ટેટ’માં પણ તે જોવા મળી હતી, જે પ્રાઇમ વિડિયોની સૌથી વધુ જોવાયેલી ફિલ્મોમાં સ્થાન મેળવી ચૂકી છે.
પ્રિયંકા ચોપરાના આગામી પ્રોજેક્ટ્સમાં એસ.એસ. રાજામૌલીની ‘વારાણસી’ પણ સામેલ છે. આ ફિલ્મમાં તે મુખ્ય ભૂમિકામાં જોવા મળશે અને ફિલ્મ 7 એપ્રિલ, 2027ના રોજ રિલીઝ થવાની છે. હવે ‘બ્લુફ્લાય’માં રસેલ ક્રો સાથેની તેની જોડી જોવા મળવાની હોવાથી ફિલ્મને લઈને હોલિવૂડ તેમજ ભારતીય દર્શકોમાં ઉત્સુકતા વધી છે.
દિગ્દર્શક નિમરોડ એન્ટલે ફિલ્મ અંગે જણાવ્યું છે કે ‘બ્લુફ્લાય’ એક પાત્રકેન્દ્રિત અને ગંભીર થ્રિલર છે, જે સાયન્સ-ફિક્શનના અલગ પ્રકારના આધાર પર આધારિત છે. પ્રિયંકા અભિનયની સાથે નિર્માણ અને આંતરરાષ્ટ્રીય પ્રોજેક્ટ્સ વચ્ચે સંતુલન જાળવી રહી છે, ત્યારે ‘બ્લુફ્લાય’ તેની વૈશ્વિક કારકિર્દીમાં વધુ એક નોંધપાત્ર ઉમેરો બની શકે છે.
