‘ઓસ્કર માટે ખોટી ફિલ્મો પસંદ થાય છે’, ‘ગોંધળ’ની પસંદગી સામે અનુરાગ કશ્યપે ઉઠાવ્યા સવાલ

મુંબઈ, તા.૨૬
99મા એકેડમી એવોર્ડ્સમાં ભારત તરફથી બેસ્ટ ઈન્ટરનેશનલ ફીચર ફિલ્મ કેટેગરી માટે ‘ગોંધળ’ની પસંદગી કરવામાં આવી હોવાના અહેવાલ વચ્ચે ફિલ્મમેકર અનુરાગ કશ્યપે આ પસંદગીની પ્રક્રિયાને લઈને નારાજગી વ્યક્ત કરી છે. અનુરાગ કશ્યપની ટિપ્પણી સામે ‘ગોંધળ’ના દિગ્દર્શક સંતોષ ડાવખરેએ પણ પ્રતિક્રિયા આપતાં કહ્યું છે કે ફિલ્મ જોયા બાદ જ તેના વિશે અભિપ્રાય બાંધવો જોઈએ.
એક મુલાકાત દરમિયાન અનુરાગ કશ્યપે ભારત તરફથી ઓસ્કર માટે મોકલવામાં આવતી ફિલ્મોની પસંદગી અને ત્યારબાદ તેના આંતરરાષ્ટ્રીય પ્રચારને લઈને સવાલ ઉઠાવ્યા હતા. તેમના કહેવા પ્રમાણે ઘણી વખત ઓસ્કર માટે યોગ્ય ફિલ્મની પસંદગી થતી નથી અને જો સારી ફિલ્મ પસંદ થઈ પણ જાય તો તેના આંતરરાષ્ટ્રીય સ્તરના પ્રચાર અને કેમ્પેઇનમાં જરૂરી અસરકારકતા જોવા મળતી નથી.
‘ગોંધળ’નો ઉલ્લેખ કરતાં અનુરાગ કશ્યપે કહ્યું હતું કે જો ફિલ્મને સિલ્વર પિકોક એવોર્ડ મળ્યો હોય તો NFDC જેવી સંસ્થાઓએ પ્રાદેશિક સ્તરે સફળ અથવા પુરસ્કૃત થયેલી ફિલ્મોને આંતરરાષ્ટ્રીય ફિલ્મ ફેસ્ટિવલ સુધી પહોંચાડવામાં વધુ સક્રિય ભૂમિકા ભજવવી જોઈએ.
કશ્યપના મતે કોઈ ફિલ્મના નિર્માણની સાથે તેના પ્રદર્શન અને જાહેરાત પાછળ પણ નોંધપાત્ર ખર્ચ કરવામાં આવે છે. આવી ફિલ્મોને યોગ્ય આંતરરાષ્ટ્રીય ફિલ્મ ફેસ્ટિવલમાં મોકલવામાં ન આવે તો તેના માટે કરવામાં આવેલા પ્રયાસ અને ખર્ચનો પૂરતો લાભ મળી શકતો નથી. તેમણે ભારતીય ફિલ્મોને વૈશ્વિક સ્તરે પહોંચાડવા માટે પસંદગી બાદ તેના યોગ્ય પ્રચાર અને ફેસ્ટિવલ સર્કિટમાં રજૂઆતને પણ એટલી જ મહત્વપૂર્ણ ગણાવી હતી.
અનુરાગ કશ્યપની આ ટિપ્પણીઓ સામે ‘ગોંધળ’ના દિગ્દર્શક સંતોષ ડાવખરેએ પોતાની વાત રજૂ કરી હતી. ડાવખરેના જણાવ્યા પ્રમાણે 26 એપ્રિલે બેંગલુરુથી મુંબઈ આવતી ફ્લાઇટ દરમિયાન તેમની અનુરાગ કશ્યપ સાથે મુલાકાત થઈ હતી. તે સમયે તેમણે કશ્યપને ‘ગોંધળ’ વિશે જણાવ્યું હતું અને કશ્યપે ફિલ્મ જોવાની ખાતરી આપી હતી.
ડાવખરેના કહેવા પ્રમાણે ત્યારબાદ મુંબઈમાં ફિલ્મનું કોઈ સ્ક્રીનિંગ યોજાયું ન હોવાથી અનુરાગ કશ્યપ ફિલ્મ જોઈ શક્યા નથી. આ સંદર્ભમાં તેમણે ફિલ્મ અંગે અંતિમ અભિપ્રાય વ્યક્ત કરતાં પહેલાં તેને જોવાની અપીલ કરી છે.
સંતોષ ડાવખરેએ દર્શકોને પણ અપીલ કરી હતી કે ‘ગોંધળ’ ફરીથી રિલીઝ થાય ત્યારે તેઓ થિયેટરમાં જઈને ફિલ્મ જુએ અને ત્યારબાદ તેના વિશે પોતાનો અભિપ્રાય બનાવે. તેમણે કહ્યું કે તેમની ટીમ ઓસ્કર સમારોહમાં ભારતનું પ્રતિનિધિત્વ કરવા સાથે જોડાયેલી જવાબદારીથી સંપૂર્ણપણે વાકેફ છે અને દેશને નિરાશ ન થાય તે માટે જરૂરી પ્રયાસ કરવામાં આવશે.
આમ, ‘ગોંધળ’ની ઓસ્કર એન્ટ્રીને લઈને એક તરફ અનુરાગ કશ્યપે ભારતીય ફિલ્મોની પસંદગી અને આંતરરાષ્ટ્રીય પ્રચારની વ્યવસ્થા અંગે સવાલ ઉઠાવ્યા છે, જ્યારે બીજી તરફ ફિલ્મના દિગ્દર્શક સંતોષ ડાવખરેએ ફિલ્મ જોયા વિના તેના વિશે અભિપ્રાય ન બાંધવાની વાત કરી પોતાની ફિલ્મ અને તેની પસંદગીનો બચાવ કર્યો છે.