હવે વિદેશ પ્રવાસ માટે પાસપોર્ટ બતાવવો નહીં પડે પાંચ એરપોર્ટ પર ડીજી યાત્રા સીસ્ટમ લાગુ થશે
saurashtrabhoomi 
(એજન્સી) નવી દિલ્હી તા.૨૧:
એરપોર્ટ પર લાંબી લાઈનો અને પ્રક્રિયાઓ ટાળવા માટે, સરકાર ડિજી યાત્રા દ્વારા બોડિર્ગને સરળ બનાવવા માટે કામ કરી રહી છે. ઓક્ટોબરથી ડિસેમ્બર સુધી દેશના મુખ્ય એરપોર્ટ પર તેનું પરીક્ષણ કરવામાં આવશે. અહેવાલો અનુસાર, સ્થાનિક મુસાફરો ઉપરાંત, ડિજી યાત્રા હવે આંતરરાષ્ટ્રીય પ્રસ્થાનો માટે પણ ઉપલબ્ધ થશે. તે દિલ્હી, મુંબઈ, બેંગલુરુ, કોચી અને હૈદરાબાદ એરપોર્ટ પર શરૂ કરવામાં આવી રહી છે. દિલ્હી અને મુંબઈ લાગુ થનારા પ્રથમ હોઈ શકે છે.
અહેવાલો અનુસાર, મુસાફરો શરૂઆતમાં પ્રસ્થાનો સમયે આ સેવાનો ઉપયોગ કરી શકશે. તેનો ઉપયોગ ટમિર્નલ પ્રવેશ, સુરક્ષા અને બોડિર્ગ ગેટ જેવા ઓછા સંવેદનશીલ વિસ્તારોમાં કરવામાં આવશે. ઇમિગ્રેશન કાઉન્ટર રાબેતા મુજબ કાર્ય કરવાનું ચાલુ રાખશે. આમાં કોઈ ફેરફાર કરવામાં આવી રહ્યો નથી. નાગરિક ઉડ્ડયન મંત્રાલય જણાવે છે કે સ્થાનિક ફલાઇટ્સ માટે આધારનો ઉપયોગ થાય છે, જ્યારે આંતરરાષ્ટ્રીય ફલાઇટ્સ માટે, બોડિર્ગ પ્રક્રિયા ઇ-પાસપોર્ટનો ઉપયોગ કરીને પૂર્ણ કરવામાં આવશે.
અહેવાલ મુજબ, ઇ-પાસપોર્ટ ધારક પ્રથમ પૃષ્ઠને સ્કેન કરશે અને તેમાં એમ્બેડ કરેલી ચિપને તેમના ફોન દ્વારા વાંચશે. ત્યારબાદ ચિપમાં સંગ્રહિત ફોટોગ્રાફને પેસેન્જરનું ડિજિટલ ઓળખપત્ર બનાવવા માટે સેલ્ફી સાથે મેચ કરવામાં આવશે. આ પછી, પેસેન્જરની ઓળખ માન્યતા પૂર્ણ થશે.
