અમરેલીમાં 80મા સ્વાતંત્ર્ય પર્વની ભવ્ય ઉજવણી, CM ભૂપેન્દ્ર પટેલે કર્યું ધ્વજવંદન
પોલીસ પરેડથી લઈને યોગ, બાઈક સ્ટંટ અને ડોગ-શો સુધી વિવિધ કાર્યક્રમોએ સમારોહમાં ઉમેર્યો રોમાંચ
saurashtrabhoomi 
અમરેલી, તા. 15:
દેશના 80મા સ્વાતંત્ર્ય પર્વ નિમિત્તે અમરેલીમાં રાજ્યકક્ષાની ભવ્ય ઉજવણી કરવામાં આવી રહી છે. પોલીસ પરેડ ગ્રાઉન્ડ ખાતે યોજાયેલા મુખ્ય સમારોહમાં મુખ્યમંત્રી ભૂપેન્દ્ર પટેલે રાષ્ટ્રધ્વજ ફરકાવી ધ્વજવંદન કર્યું હતું. આ પ્રસંગે મોટી સંખ્યામાં લોકો અને મહાનુભાવો ઉપસ્થિત રહ્યા હતા.
ધ્વજવંદન બાદ મુખ્યમંત્રીએ પોતાના સંબોધનમાં ગુજરાતની જનશક્તિ અને એકતાનો ઉલ્લેખ કરતાં જણાવ્યું હતું કે રાજ્યના લોકો એકજૂથ બનીને સંકલ્પ સાથે કાર્ય કરે તો કોઈપણ લક્ષ્ય અશક્ય નથી. સાથે જ તેમણે નાગરિકોની સુવિધા અને સુખાકારીને ધ્યાનમાં રાખીને મહત્વપૂર્ણ જાહેરાતો પણ કરી હતી.
રાજ્યકક્ષાના આ કાર્યક્રમમાં ગુજરાત પોલીસની શિસ્ત અને સજ્જતાનું પણ પ્રદર્શન જોવા મળ્યું હતું. પોલીસ જવાનો દ્વારા શિસ્તબદ્ધ પરેડ યોજાઈ હતી, જ્યારે મહિલા પોલીસ જવાનોએ રાઇફલ ડ્રીલ રજૂ કરીને સૌનું ધ્યાન ખેંચ્યું હતું.
સમારોહ દરમિયાન દેશભક્તિ અને સાંસ્કૃતિક ભાવનાને ઉજાગર કરતી વિવિધ કૃતિઓ પણ રજૂ કરવામાં આવી હતી. આ ઉપરાંત યોગ પ્રદર્શન, રોમાંચક બાઈક સ્ટંટ, પ્રશિક્ષિત ડોગ-શો તેમજ માઉન્ટેડ અશ્વ-શો જેવા કાર્યક્રમોએ ઉપસ્થિત લોકોમાં ખાસ આકર્ષણ ઊભું કર્યું હતું.
સ્વાતંત્ર્ય પર્વના આ રાજ્યકક્ષાના સમારોહમાં દેશભક્તિ, શૌર્ય, સંસ્કૃતિ અને સાહસનો અનોખો સમન્વય જોવા મળ્યો હતો. વિવિધ પ્રસ્તુતિઓ દ્વારા સ્વાતંત્ર્ય પર્વની ઉજવણીને યાદગાર બનાવવાનો પ્રયાસ કરવામાં આવ્યો હતો.
.jpg)
