‘ગણેશ ચતુર્થી આશા અને આનંદ લઈને આવે છે’, શ્રીયા પિલગાંવકરે યાદ કરી પરિવારની વર્ષો જૂની પરંપરાઓ
સિદ્ધિવિનાયકની આરતીથી લઈને પરિવાર સાથે ‘ઉકડીચે મોદક’ બનાવવા સુધીની યાદો શેર કરી; કહ્યું—‘બાપ્પા અમારા માટે શુભ શરૂઆતનું પ્રતીક’
saurashtrabhoomi 
મુંબઈ, તા.૧૯
મહારાષ્ટ્રીયન પરિવારમાં ઉછરેલી અભિનેત્રી શ્રીયા પિલગાંવકર માટે ગણેશ ચતુર્થી માત્ર ધાર્મિક તહેવાર નહીં, પરંતુ પરિવાર, પરંપરા અને સંસ્કૃતિ સાથે જોડાવાનો ખાસ અવસર છે. ગણેશોત્સવ અંગે વાત કરતાં શ્રીયાએ પોતાના બાળપણની યાદો અને પરિવારમાં વર્ષોથી ચાલી આવતી પરંપરાઓ શેર કરી છે. તેના મતે ગણેશ ચતુર્થી મહારાષ્ટ્રની સંસ્કૃતિ, ઇતિહાસ, સમુદાય અને સામૂહિક ભાવનાની ઉજવણીનો પણ મહત્વપૂર્ણ પ્રસંગ છે.
આ વર્ષે ‘મિર્ઝાપુરઃ ધ મૂવી’ અને ‘હૈવાન’ જેવી બે ફિલ્મોની રિલીઝ બાદ ગણેશોત્સવ તેના માટે વધુ ખાસ બન્યો હોવાનું શ્રીયાએ જણાવ્યું છે. મુંબઈમાં ગણેશોત્સવ દરમિયાન જોવા મળતા માહોલ અંગે તેણે કહ્યું કે આ સમયે આખું શહેર એકસાથે આવીને ગણપતિ સાથે જોડાયેલી ઉજવણીમાં સામેલ થાય છે. તેના મતે ગણેશ ચતુર્થી પોતાની સાથે ઊર્જા, આશા, ઉજવણી અને આનંદ લઈને આવે છે.
અભિનેતા સચિન પિલગાંવકર અને સુપ્રિયા પિલગાંવકરની પુત્રી શ્રીયાના પરિવારમાં ગણેશોત્સવની અનેક પરંપરાઓ વર્ષોથી ચાલી આવી રહી છે. શ્રીયાના જણાવ્યા પ્રમાણે તહેવારના દિવસની શરૂઆત સિદ્ધિવિનાયક મંદિરમાં આરતીથી થાય છે. ત્યારબાદ પરિવાર દાદરમાં સચિન પિલગાંવકરના પક્ષના સંબંધીઓ સાથે ઉજવણી કરે છે અને પછી સુપ્રિયા પિલગાંવકરના પરિવાર સાથે સમય વિતાવે છે.
બાળપણની યાદો શેર કરતાં શ્રીયાએ જણાવ્યું કે ગણેશ ચતુર્થી દરમિયાન આખો પરિવાર એક સ્થળે એકત્ર થતો હતો. ઘરમાં વિવિધ વાનગીઓ અને સંગીત સાથે ઉત્સવનો માહોલ રહેતો, જ્યારે પરિવારના વડીલો પોતાના બાળપણ અને જૂની પરંપરાઓ સાથે જોડાયેલી વાતો નવી પેઢીને સંભળાવતા હતા. શ્રીયાના મતે આ રીતે પારિવારિક અને સાંસ્કૃતિક પરંપરાઓ એક પેઢીમાંથી બીજી પેઢી સુધી પહોંચતી રહે છે.
ગણેશોત્સવ દરમિયાન પરિવારના તમામ કઝિન્સ સાથે મળીને ‘ઉકડીચે મોદક’ બનાવવાની પણ તેમની ખાસ પરંપરા છે. બાળપણમાં મિત્રો અને કઝિન્સ સાથે અલગ-અલગ ગણેશ પંડાલોની મુલાકાત લેવાનું તેને ખૂબ ગમતું હતું અને આજે પણ તે મિત્રો સાથે પંડાલોમાં જવાનું પસંદ કરે છે.
શ્રીયાએ ગણપતિ બાપ્પાને શુભ શરૂઆતનું પ્રતીક ગણાવતાં જણાવ્યું કે તેમના પરિવારમાં કોઈ પણ વ્યક્તિ દરરોજ ઘરની બહાર નીકળે ત્યારે ‘ગણપતિ બાપ્પા મોરિયા’ કહેવાની પરંપરા છે. ફિલ્મના સેટ પર પણ પહેલો શોટ શરૂ કરતાં પહેલાં ‘ગણપતિ બાપ્પા મોરિયા’ કહેવામાં આવતું હોવાનું તેણે જણાવ્યું.
શ્રીયાના મતે કોઈ પણ તહેવાર માત્ર વિધિ અને પરંપરાઓનું પાલન કરવા પૂરતો સીમિત ન રહેવો જોઈએ. તહેવાર પાછળ રહેલા મૂલ્યો અને તેના અર્થને સમજવો અને તેને રોજિંદા જીવનમાં ઉતારવો વધુ મહત્વપૂર્ણ છે. આ જ ભાવના સાથે ગણેશ ચતુર્થી તેના માટે પરિવાર, સંસ્કૃતિ, નવી શરૂઆત અને આનંદ સાથે જોડાયેલો વિશેષ તહેવાર છે.
)
