“ઝુકેગા નહીં ભારત” - ટ્રમ્પને સ્પષ્ટ સંદેશો આપી દેવાયો હતો
અમેરીકા સાથેની બહુચર્ચીત ટ્રેડ ડીલ પાછળની વાસ્તવિક સ્ટોરી : ભારતના રાષ્ટ્રીય સુરક્ષા સલાહકાર અજીત ડોભાલે સપ્ટેમ્બર-ર૦રપમાં અમેરીકાના વિદેશમંત્રી માર્કો રૂબીયો સાથે બેઠક યોજી સ્પષ્ટ જણાવી દીધું હતું કે ભારત સરકાર ટ્રમ્પ કે તેમના ટોચના સહાયકોથી ડરશે નહીં
saurashtrabhoomi 
(એજન્સી) નવી દિલ્હી તા.૫:
અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં ભારત પર લાદવામાં આવેલા વેપાર ટેરિફમાં ૧૮ ટકા કરવાની જાહેરાત કરી હતી. આ ભારતના રાષ્ટ્રીય હિતો સાથે સમાધાન ન કરવાના મક્કમ વલણને કારણે હતું.એક મીડિયા રિપોર્ટ અનુસાર, ગયા વર્ષે સપ્ટેમ્બરમાં રાષ્ટ્રીય સુરક્ષા સલાહકાર અજિત ડોભાલે અમેરિકાના વિદેશ સચિવ માર્કો રુબિયો માટે સંદેશ સાથે અમેરિકાની મુલાકાત લીધી હતી. આ મુલાકાત દરમિયાન, અજિત ડોભાલે રુબિયોને કહ્યું હતું કે ભારત રાષ્ટ્રપતિ ટ્રમ્પ અને તેમના ટોચના સહાયકોની ધમકીઓ સામે ઝૂકશે નહીં. ભારતે ભૂતકાળમાં પ્રતિકૂળ અમેરિકન સરકારોનો સામનો કર્યો છે અને વર્તમાન રાષ્ટ્રપતિના કાર્યકાળના અંતની રાહ જોશે, નહીં કે ઝૂકશે.
અમેરિકાના રાષ્ટ્રપતિ ડોનાલ્ડ ટ્રમ્પ અને તેમના સાથીઓ ભારત-અમેરિકા વેપાર કરારને એક મોટી જીત ગણાવી રહ્યા છે, પરંતુ એક નવા અહેવાલમાં આ દાવા પર પ્રશ્નો ઉભા થયા છે. બ્લૂમબર્ગના મતે, મોદી સરકારે વોશિગ્ટનને સ્પષ્ટપણે કહ્યું છે કે તે વેપાર કરાર પર પહોંચવા માટે ટ્રમ્પના રાષ્ટ્રપતિ કાર્યકાળના અંત સુધી રાહ જોવા તૈયાર છે.
ભારત અમેરિકા સાથેના વેપાર કરારને અંતિમ સ્વરૂપ આપી રહ્યું છે. પરંતુ એક નવો અહેવાલ બહાર આવ્યો છે જેમાં કહેવામાં આવ્યું છે કે વડાપ્રધાન મોદીની સરકાર વોશિગ્ટન સાથે કરાર કરવા માટે રાષ્ટ્રપતિ ડોનાલ્ડ ટ્રમ્પનો કાર્યકાળ પૂરો થાય ત્યાં સુધી રાહ જોવા તૈયાર છે. અમેરિકાને પણ આ વાતની જાણ કરવામાં આવી હતી. બ્લૂમબર્ગના અહેવાલ મુજબ, ભારતના રાષ્ટ્રીય સુરક્ષા સલાહકાર અજિત ડોભાલે સપ્ટેમ્બર ૨૦૨૫માં યુએસ સેક્રેટરી ઓફ સ્ટેટ માર્કો રુબિયો સાથે બેઠક યોજી હતી, આ બેઠકમાં તેમણે કહ્યું હતું કે ભારત ટ્રમ્પ કે તેમના ટોચના સહાયકોથી ડરશે નહીં.
