દેશમાં ૯ ટકા વિદ્યાર્થીઓ ઘણીવાર આત્મહત્યા કરવાનું વિચારે છે : ચોંકાવનારો અહેવાલ
saurashtrabhoomi 
(એજન્સી) નવી દિલ્હી તા.૩૦
દેશભરની ઉચ્ચ શિક્ષણ સંસ્થાઓમાં અભ્યાસ કરતા ૯ ટકા વિદ્યાર્થીઓને ઘણીવાર આત્મહત્યાનો વિચાર આવે છે. ત્યાં જ, ૩૪ ટકા વિદ્યાર્થીઓ પોતાના જ કેમ્પસમાં પોતાને બહારના લોકો જેવા અનુભવે છે. સુપ્રીમ કોર્ટ દ્વારા રચિત નેશનલ ટાસ્ક ફોર્સ (એનટીએફ) દ્વારા દેશભરમાં કરાયેલા સર્વેમાં આ ખુલાસો થયો છે.
સર્વેમાં આશરે ૧૫ ટકા વિદ્યાર્થીઓએ જણાવ્યું કે છેલ્લા ૬ મહિનામાં એવો સમય આવ્યો હતો, જ્યારે તેઓ ખૂબ જ તણાવમાં રહ્યા હતા અથવા કેટલાંક અઠવાડિયાં સુધી ચિંતાગ્રસ્ત રહ્યા હતા. જોકે, ૫૬ ટકા વિદ્યાર્થીઓએ સર્વેમાં જણાવ્યું કે ગંભીર મુદ્દાઓને નિષ્પક્ષ રીતે સંભાળવા માટે તેમને પ્રશાસન પર વિશ્વાસ છે.
એનટીએફના આ સર્વેમાં ૨.૪૩ લાખથી વધુ વિદ્યાર્થીઓના જવાબો સામેલ છે. તેમાં ૬૭ ટકા વિદ્યાર્થીઓ એસસી, એસટી અને ઓબીસી શ્રેણીના હતા. ટાસ્ક ફોર્સનો અહેવાલ ૩૧ ઓક્ટોબર સુધીમાં સુપ્રીમ કોર્ટમાં રજૂ થવાની અપેક્ષા છે.
એનટીએફની રચના સુપ્રીમ કોર્ટે માર્ચ ૨૦૨૫માં વિદ્યાર્થીઓની આત્મહત્યાના વધતા બનાવો અને ઉચ્ચ શિક્ષણ સંસ્થાઓમાં વિદ્યાર્થીઓના માનસિક સ્વાસ્થ્ય તથા સુખાકારી સાથે જોડાયેલા મુદ્દાઓની તપાસ માટે કરી હતી. ટાસ્ક ફોર્સના પ્રમુખ જસ્ટિસ એસ. રવીન્દ્ર ભટ્ટ છે.
