નોરા ફતેહીએ એક શરતે લીધી હતી ‘બિગ બોસ 9’માં એન્ટ્રી, કહ્યું- ‘ઝલક દિખલા જા આપો તો બિગ બોસ કરીશ’

મુંબઈ, તા.૨૧
બોલિવૂડ અભિનેત્રી અને ડાન્સર નોરા ફતેહીએ પોતાના કરિયરના શરૂઆતના દિવસોને લઈને રસપ્રદ ખુલાસો કર્યો છે. આજે ફિલ્મો, મ્યુઝિક વીડિયો અને ડાન્સના કારણે જાણીતી બનેલી નોરાએ જણાવ્યું કે લગભગ 11 વર્ષ પહેલાં જ્યારે તેને ‘બિગ બોસ 9’માં ભાગ લેવાની ઓફર મળી હતી ત્યારે શરૂઆતમાં તે આ રિયાલિટી શો કરવા માટે તૈયાર નહોતી. જોકે મેકર્સ સાથે થયેલી વાતચીત બાદ તેણે એક ખાસ શરત મૂકી અને ત્યારબાદ વાઇલ્ડ કાર્ડ કન્ટેસ્ટન્ટ તરીકે શોમાં એન્ટ્રી લીધી હતી.
નોરા ફતેહીએ વર્ષ 2015માં ‘બિગ બોસ 9’માં વાઇલ્ડ કાર્ડ કન્ટેસ્ટન્ટ તરીકે પ્રવેશ કર્યો હતો. શોમાં તેનો પ્રવાસ લાંબો રહ્યો નહોતો અને થોડા અઠવાડિયા બાદ તે બહાર થઈ ગઈ હતી. જોકે આ ટૂંકા સમયગાળામાં તેને દેશભરમાં મોટી ઓળખ મળી હતી. શોમાં પ્રિન્સ નરુલા સાથે તેની મિત્રતા અને નજીકતા પણ તે સમયે ખાસ ચર્ચામાં રહી હતી. પ્રિન્સ નરુલા બાદમાં આ સિઝનના વિજેતા બન્યા હતા.
‘અનટ્રિગર્ડ’ પોડકાસ્ટ દરમિયાન નોરાએ પોતાના ‘બિગ બોસ’ના અનુભવ વિશે વાત કરતાં જણાવ્યું કે તે સમયે તે પોતાના કરિયરના સ્ટ્રગલિંગ ફેઝમાંથી પસાર થઈ રહી હતી. કેટલાક પ્રોજેક્ટ્સમાં કામ કર્યા બાદ પણ પેમેન્ટ મેળવવામાં મુશ્કેલી પડી રહી હોવાનું તેણે જણાવ્યું હતું.
નોરાના જણાવ્યા પ્રમાણે તેણે કેટલાક ગીતોમાં કામ કર્યું હતું, પરંતુ તેના પૈસા મેળવવા માટે રાહ જોવી પડી રહી હતી. આ જ સમયગાળા દરમિયાન તેને ‘બિગ બોસ’ તરફથી ઓફર મળી હતી. જોકે રિયાલિટી શોને લઈને તે સમયે તેનો અભિગમ અલગ હોવાથી તેણે શરૂઆતમાં ઓફર નકારી દીધી હતી.
બાદમાં જ્યારે મેકર્સ તરફથી તેને મળનારી રકમ અંગે વાત કરવામાં આવી ત્યારે તેણે ફરી વિચાર કર્યો હતો. પરંતુ નોરાની નજર અન્ય એક ડાન્સ રિયાલિટી શો ‘ઝલક દિખલા જા’ પર હતી. બંને કાર્યક્રમો એક જ ચેનલ સાથે જોડાયેલા હોવાથી નોરાએ મેકર્સ સમક્ષ એક શરત મૂકી હતી.
નોરાએ પોતાના ખુલાસામાં જણાવ્યું કે તેણે મેકર્સને કહ્યું હતું કે જો તેને ‘ઝલક દિખલા જા’ કરવાની તક આપવામાં આવે તો તે બદલામાં ‘બિગ બોસ’માં ભાગ લેવા તૈયાર છે. તેના જણાવ્યા પ્રમાણે મેકર્સ આ વાત માટે તૈયાર થઈ ગયા અને ત્યારબાદ તેને ‘બિગ બોસ 9’માં વાઇલ્ડ કાર્ડ એન્ટ્રી મળી હતી.
રિયાલિટી શો અંગે પોતાનો બદલાયેલો અભિગમ જણાવતાં નોરાએ કહ્યું કે જો કોઈ કલાકાર આ પ્રકારના પ્લેટફોર્મનો સમજદારીપૂર્વક ઉપયોગ કરે તો તે ખૂબ જ ઝડપથી તેને ઘરે-ઘરે ઓળખ અપાવી શકે છે. વાઇલ્ડ કાર્ડ એન્ટ્રી હોવાને કારણે પોતાનો પ્રવાસ બહુ લાંબો નહીં હોય તે અંગે પણ તેને પહેલેથી અંદાજ હતો.
નોરા માટે ‘બિગ બોસ 9’માં ભાગ લેવાનો નિર્ણય કરિયરની દૃષ્ટિએ મહત્વપૂર્ણ સાબિત થયો હતો. આ શો બાદ તેને મોટી સંખ્યામાં દર્શકો સુધી પહોંચવાની તક મળી. આગળ જતાં નોરાએ પોતાના ડાન્સ અને સ્ક્રીન પ્રેઝન્સના આધારે મ્યુઝિક વીડિયો અને ફિલ્મોમાં પોતાની અલગ ઓળખ ઊભી કરી.
નોરાનો આ ખુલાસો એ પણ દર્શાવે છે કે શરૂઆતમાં જે રિયાલિટી શોમાં જવા માટે તે તૈયાર નહોતી, એ જ પ્લેટફોર્મ તેના કરિયરના શરૂઆતના તબક્કામાં વ્યાપક ઓળખ મેળવવાનું એક મહત્વપૂર્ણ માધ્યમ બન્યું હતું.