વંથલીના બંટીયા ખાતે ‘સેવા સેતુ 2.1’ કાર્યક્રમ યોજાયો, 806 ગ્રામજનોએ વિવિધ સરકારી સેવાઓનો લીધો લાભ
‘સેવા સંકલ્પ અભિયાન’ અંતર્ગત ઘરઆંગણે વિવિધ દાખલા, પ્રમાણપત્ર અને યોજનાકીય સેવાઓ ઉપલબ્ધ કરાવાઈ; બંટીયા સહિત આસપાસના વિસ્તારના અરજદારો જોડાયા
saurashtrabhoomi 
જૂનાગઢ, તા.૨૩
રાજ્યભરમાં ચાલી રહેલા ‘સેવા સંકલ્પ અભિયાન’ના ભાગરૂપે જૂનાગઢ જિલ્લાના વંથલી તાલુકાના બંટીયા ગામ ખાતે ‘સેવા સેતુ 2.1’ કાર્યક્રમનું આયોજન કરવામાં આવ્યું હતું. સરકારની વિવિધ સેવાઓ અને કલ્યાણકારી યોજનાઓનો લાભ ગ્રામજનોને ઘરઆંગણે અને સરળતાથી મળી રહે તે હેતુથી યોજાયેલા આ સેવા સેતુ કેમ્પમાં મોટી સંખ્યામાં ગ્રામજનો જોડાયા હતા.
કાર્યક્રમ દરમિયાન વિવિધ સરકારી વિભાગોને લગતી સેવાઓ એક જ સ્થળે ઉપલબ્ધ કરાવવામાં આવી હતી. ગ્રામજનોને જરૂરી દાખલા, પ્રમાણપત્રો તેમજ અન્ય સેવાકીય અને યોજનાકીય લાભ મેળવવા માટે માર્ગદર્શન અને જરૂરી પ્રક્રિયા હાથ ધરવામાં આવી હતી. જેના કારણે વિવિધ સરકારી સેવાઓ માટે અલગ-અલગ કચેરીઓ સુધી જવાની જગ્યાએ લોકોને સ્થાનિક સ્તરે જ સેવાઓ મેળવવાની સુવિધા મળી હતી.
બંટીયા ખાતે યોજાયેલા સેવા સેતુ કેમ્પનો બંટીયા ગામ ઉપરાંત આસપાસના વિસ્તારના લોકોએ પણ લાભ લીધો હતો. કેમ્પમાં કુલ 806 જેટલા અરજદારો અને ગ્રામજનો ઉપસ્થિત રહ્યા હતા અને પોતાની જરૂરિયાત મુજબ વિવિધ સરકારી સેવાઓ તથા યોજનાઓનો લાભ મેળવ્યો હતો.
‘સેવા સેતુ’ કાર્યક્રમનો મુખ્ય ઉદ્દેશ સરકારી સેવાઓને લોકો સુધી સરળ અને સુલભ રીતે પહોંચાડવાનો છે. ખાસ કરીને ગ્રામ્ય વિસ્તારના નાગરિકોને પ્રમાણપત્રો, દાખલાઓ અને વિવિધ યોજનાઓ સંબંધિત કામગીરી માટે ઓછામાં ઓછી મુશ્કેલી પડે તે માટે એક જ સ્થળે વિવિધ સેવાઓ ઉપલબ્ધ કરાવવાનો પ્રયાસ કરવામાં આવે છે.
આ કાર્યક્રમમાં જિલ્લા પંચાયત સભ્ય મટીયાણા, સોનલબેન મહેશભાઈ દિવસરીયા, વંથલી તાલુકા પંચાયત સભ્ય વિજયભાઈ વાળા, બંટીયા ગ્રામ પંચાયતના સરપંચ અને અગ્રણી કીર્તિભાઈ ગોધાણી સહિતના આગેવાનો ઉપસ્થિત રહ્યા હતા.
આમ, સેવા સંકલ્પ અભિયાન અંતર્ગત બંટીયા ખાતે યોજાયેલા ‘સેવા સેતુ 2.1’ કાર્યક્રમમાં 806 જેટલા ગ્રામજનો અને અરજદારોએ ભાગ લઈ વિવિધ સરકારી સેવાઓ, દાખલા, પ્રમાણપત્રો તેમજ યોજનાકીય લાભ મેળવ્યા હતા.
.jpg)
