એશિયન ગેમ્સમાં બે સિલ્વર જીતનાર ઇલાવેનિલ વાલારીવનનું ગુજરાત સરકારે કર્યું સન્માન, રૂ.1.33 કરોડનો ખેલપ્રતિભા પુરસ્કાર

ગાંધીનગર તા.28
જાપાનના આઇચી-નાગોયામાં ચાલી રહેલી એશિયન ગેમ્સ 2026માં શાનદાર પ્રદર્શન કરીને બે સિલ્વર મેડલ જીતનાર રાઇફલ શૂટર ઇલાવેનિલ વાલારીવનનું ગુજરાત સરકાર દ્વારા વિશેષ સન્માન કરવામાં આવ્યું છે. નાયબ મુખ્યમંત્રી હર્ષ સંઘવીના હસ્તે ઇલાવેનિલને ખેલપ્રતિભા પુરસ્કાર યોજના અંતર્ગત રૂ.1.33 કરોડનો ચેક અર્પણ કરવામાં આવ્યો હતો. એશિયન ગેમ્સમાં ઇલાવેનિલે મહિલા 10 મીટર એર રાઇફલની વ્યક્તિગત અને ટીમ ઇવેન્ટમાં એક-એક સિલ્વર મેડલ મેળવ્યો છે.
ઇલાવેનિલે મહિલા 10 મીટર એર રાઇફલ ટીમ ઇવેન્ટમાં સોનમ મસ્કર અને વિદર્સા વિનોદ સાથે ભારતનું પ્રતિનિધિત્વ કર્યું હતું. ભારતીય ત્રિપુટીએ 1898.0 પોઇન્ટ સાથે સિલ્વર મેડલ મેળવ્યો હતો. ત્યારબાદ વ્યક્તિગત 10 મીટર એર રાઇફલ ફાઇનલમાં પણ ઇલાવેનિલે જોરદાર પ્રદર્શન કરીને 252.4 પોઇન્ટ સાથે સિલ્વર મેડલ જીત્યો હતો. જાપાનની હિનાતા તાઇચીએ 253.0 પોઇન્ટ સાથે ગોલ્ડ જીત્યો હતો. આમ ઇલાવેનિલે એક જ દિવસે ભારત માટે બે સિલ્વર મેડલ જીતવાની સિદ્ધિ નોંધાવી હતી.
આ સિદ્ધિ બદલ ગુજરાત સરકારે ઇલાવેનિલનું સન્માન કરતાં રૂ.1.33 કરોડનો ખેલપ્રતિભા પુરસ્કાર આપ્યો છે. ઇલાવેનિલને અભિનંદન પાઠવતાં નાયબ મુખ્યમંત્રી હર્ષ સંઘવીએ જણાવ્યું હતું કે રાજ્યની રમત પ્રતિભાઓને પ્રોત્સાહન આપવા અને તેમને વૈશ્વિક સ્પર્ધાઓ માટે તૈયાર કરવા જરૂરી તાલીમ અને સુવિધાઓ પૂરી પાડવા ગુજરાત સરકાર પ્રતિબદ્ધ છે. તેમણે ખેલાડીઓની સફળતામાં માતા-પિતાના યોગદાનને પણ મહત્વપૂર્ણ ગણાવ્યું હતું.
સંઘવીએ ઇલાવેનિલની રમતગમતની સફરમાં સંસ્કારધામનો પણ ઉલ્લેખ કર્યો હતો. રાજ્ય સરકારની DLSS યોજના અંતર્ગત કાર્યરત સંસ્કારધામ સંકુલ સાથે જોડાયેલી ઇલાવેનિલે આંતરરાષ્ટ્રીય સ્તરે મેળવેલી સફળતા ગુજરાત માટે ગૌરવની બાબત હોવાનું તેમણે જણાવ્યું હતું. આવી સિદ્ધિઓ રાજ્યના અન્ય યુવા ખેલાડીઓને પણ રમતગમત ક્ષેત્રે આગળ વધવા માટે પ્રેરણા આપે છે તેમ તેમણે ઉમેર્યું હતું.
રાજ્ય સરકાર દ્વારા આપવામાં આવેલી માહિતી અનુસાર ઇલાવેનિલને તેની રમતગમતની કારકિર્દી દરમિયાન અલગ-અલગ યોજનાઓ હેઠળ સતત પ્રોત્સાહન આપવામાં આવ્યું છે. શક્તિદૂત યોજના, ઓલિમ્પિક પ્રોત્સાહન તેમજ DLSS અને ખેલ મહાકુંભ જેવી યોજનાઓ મારફતે તેને આર્થિક સહાય અને રમતગમત સંબંધિત સપોર્ટ મળતો રહ્યો છે.
અમદાવાદ સાથે જોડાયેલી ઇલાવેનિલ છેલ્લા ઘણા વર્ષોથી રાઇફલ શૂટિંગમાં ભારતનું પ્રતિનિધિત્વ કરી રહી છે. એશિયન ગેમ્સમાં મળેલા આ બંને મેડલ તેની કારકિર્દીના પ્રથમ એશિયન ગેમ્સ મેડલ છે. અગાઉ 2018ની એશિયન ગેમ્સમાં તે ફાઇનલ સુધી પહોંચી શકી નહોતી, પરંતુ આઠ વર્ષ બાદ આઇચી-નાગોયામાં તેણે બે વખત પોડિયમ પર સ્થાન મેળવી પોતાની એશિયન ગેમ્સની મેડલની રાહ પૂરી કરી છે.
ઇલાવેનિલ બે વખત ઓલિમ્પિકમાં પણ ભારતનું પ્રતિનિધિત્વ કરી ચૂકી છે. આંતરરાષ્ટ્રીય શૂટિંગ સ્પર્ધાઓમાં વર્ષોથી સતત ભારત માટે રમતી ઇલાવેનિલે વર્લ્ડ કપ સહિતની વિવિધ સ્પર્ધાઓમાં પણ સફળતા મેળવી છે. એશિયન ગેમ્સ 2026માં મળેલા ડબલ સિલ્વરે હવે તેની આંતરરાષ્ટ્રીય કારકિર્દીમાં વધુ એક મહત્વપૂર્ણ સિદ્ધિ ઉમેરી છે.
ખાસ કરીને વ્યક્તિગત ફાઇનલમાં ઇલાવેનિલ ગોલ્ડ મેડલની ખૂબ નજીક પહોંચી હતી. તેણે ફાઇનલના મોટા ભાગના તબક્કામાં મજબૂત સ્થિતિ જાળવી રાખી હતી, પરંતુ અંતિમ શોટ્સ બાદ જાપાનની હિનાતા તાઇચીએ 253.0 પોઇન્ટ સાથે પ્રથમ સ્થાન મેળવ્યું અને ઇલાવેનિલ 252.4 પોઇન્ટ સાથે માત્ર 0.6 પોઇન્ટના અંતરે સિલ્વર મેડલ પર રહી હતી.
એશિયન ગેમ્સના મંચ પર બે સિલ્વર મેડલ સાથે દેશનું પ્રતિનિધિત્વ કર્યા બાદ ગુજરાત સરકાર દ્વારા રૂ.1.33 કરોડના પુરસ્કારથી કરાયેલું સન્માન ઇલાવેનિલની રમતગમતની સફરમાં વધુ એક મહત્વપૂર્ણ ઉપલબ્ધિ બની છે.