જૂનાગઢની ૧૪ વર્ષની દીકરી જેન્સી કાનાબારે ઓસ્ટ્રેલિયામાં ભારતનો ડંકો વગાડ્યો : અભિનંદનની વર્ષા
જેન્સી કાનાબારે ઓસ્ટ્રેલિયન ઓપન ેં-૧૪ ટાઇટલ જીત્યું : આ ખિતાબ જીતનાર પહેલી ભારતીય પ્લેયર બની
saurashtrabhoomi 
જૂનાગઢ તા. ૩૧
ગઈકાલે જૂનાગઢ માટે ગૌરવ લેવા જેવી બાબત બની હતી અને જેમાં ૧૪ વર્ષની દિકરીએ ઈતિહાસ સર્જયો છે. આ અંગે પ્રાપ્ત વિગત અનુસાર ઓસ્ટ્રેલિયન ઓપન U-14 ટાઇટલ જીતીને જૂનાગઢની દીકરીએ સમગ્ર ભારતનું નામ રોશન કર્યું છે. તેણે ઓસ્ટ્રેલિયન ઓપન એશિયા પેસિફીક એલિટ અંડર ૧૪ વુમન્સ ટાઇટલ જીતનાર પહેલી ભારતીય પ્લેયર બની છે. ૧૪ વર્ષની આ ખેલાડીએ ફાઈનલમાં ખૂબ જ દૃઢ નિશ્ચય દર્શાવ્યો અને ઓસ્ટ્રેલિયાની જ મુસેમ્મા સિલેકને ૩-૬, ૬-૪, ૬-૧થી હરાવીને ખિતાબ જીત્યો હતો.
અગાઉ, શરૂઆતનો સેટ ગુમાવ્યા પછી અને બીજા સેટમાં ૦-૨થી પાછળ રહી ગયા પછી, જેન્સી શાંત રહી અને હાર ન માની. તેણે ધીમે ધીમે પોતાની લય શોધી, વધુ આત્મવિશ્વાસ સાથે રમી અને પ્રભાવશાળી કમબેક કરીને જીત મેળવવા માટે મેચને સંપૂર્ણપણે ફેરવી દીધી. જેન્સી કાનાબારે ૨૦૨૬ ઓસ્ટ્રેલિયન ઓપન એશિયા-પેસિફિક એલીટ ૧૪ અને અંડર ટ્રોફીમાં ઉત્કૃષ્ટ પ્રદર્શન કર્યું, મેલબોર્ન પાર્ક ખાતે રાઉન્ડ-રોબિન સ્ટેજ પર પ્રભુત્વ મેળવ્યું. તેણે તેની બધી મેચ સીધા સેટમાં જીતીને ગ્રુપ-છમાં ૩-૦ના સંપૂર્ણ રેકોર્ડ સાથે પ્રથમ સ્થાન મેળવ્યું છે.
નોકઆઉટ રાઉન્ડમાં જેન્સીનો કોન્ફિડન્સ વધતો ગયો. જાપાનની આઓઈ યોશિદા વિરુદ્ધ સેમીફાઈનલમાં જેન્સીએ ટુર્નામેન્ટનું પોતાનું સૌથી શાંત પ્રદર્શન કર્યું. પહેલા સેટનો ટાઈબ્રેકર ૭-૬(૩) થી જીત્યો અને પછી મેચ ૬-૨ થી જીતીને ફાઈનલમાં જગ્યા બનાવી. ત્યારબાદ તેણે સિલેક વિરુદ્ધ શાનદાર વાપસી કરીને ઐતિહાસિક ખિતાબ સાથે પોતાનું અભિયાન પૂર્ણ કર્યું હતું. અત્રે નોંધનીય છે કે, જેન્સી કાનાબાર ભારતની સૌથી પ્રતિભાશાળી યુવા ટેનિસ ખેલાડીઓમાંથી એક છે અને તે જુનિયર રેન્કીંગમાં ખૂબ જ ઝડપથી આગળ વધી રહી છે. તે જૂનાગઢની વતની છે અને તેણે નાની ઉંમરથી જ ટ્રેનિંગ લેવાની શરૂઆત કરી દીધી હતી. છેલ્લા કેટલાક વર્ષોમાં, તેણે જુનિયર સર્કિટ પર તેની મજબૂત નિષ્ઠા અને સતત સુધારાનું શાનદાર પ્રદર્શન કર્યું છે. જેન્સીની સફળતા તેના રેન્કીંગમાં પણ પ્રતિબિંબિત થાય છે, જેમાં તેણે AITA ગર્લ્સ અંડર-૧૪ અને અંડર-૧૬ બંને કેટેગરીમાં નંબર-૧નું સ્થાન મેળવ્યું છે. વર્ષ ૨૦૨૬ની શરૂઆત સુધીમાં, તેણે AITA વુમન્સ સિંગલ્સ રેન્કિંગમાં પણ પોતાની જગ્યા બનાવી લીધી હતી. જુનિયર ઇવેન્ટ્સ ઉપરાંત, જેન્સીએ સિનિયર લેવલ પર પણ પ્રભાવ પાડ્યો છે. માત્ર ૧૪ વર્ષની વયે, તેણે ITF વુમન્સ સર્કિટ પર ડેબ્યૂ કર્યું અને સ્ટ્રેટ-સેટમાં જીત મેળવીને ઉ૧૫ ટૂર્નામેન્ટના મેઈન ડ્રો માટે ક્વોલિફાય કર્યું. મેદાન પર તેની શિસ્ત, એકાગ્રતા અને મજબૂત માનસિકતા તેને ભારતીય ટેનિસની સૌથી તેજસ્વી યુવા આશાઓમાંની એક તરીકે સ્થાપિત કરી છે ત્યારે આ દિકરીને સર્વત્રથી અભિનંદન સાથે શુભકામના પાઠવવામાં આવી રહી છે.
