ડીપફેક અને નકલી કન્ટેન્ટ સામે શ્રુતિ હસન કોર્ટમાં, બોમ્બે હાઈકોર્ટમાં દાખલ કરી અરજી
નામ, તસવીર અને ઓળખના ગેરકાયદે ઉપયોગ સામે કાર્યવાહી કરવાની માંગ; સોશિયલ મીડિયા પ્લેટફોર્મ્સ સહિત અનેક પક્ષકારોને બનાવ્યા પ્રતિવાદી
saurashtrabhoomi 
મુંબઈ, તા. 6
અભિનેત્રી શ્રુતિ હસને પોતાની ઓળખ અને વ્યક્તિત્વના ગેરકાયદે ઉપયોગ સામે કાનૂની લડત શરૂ કરી છે. અભિનેત્રીએ બોમ્બે હાઈકોર્ટમાં અરજી દાખલ કરીને એઆઈ આધારિત ડીપફેક વીડિયો, નકલી બ્રાન્ડ એન્ડોર્સમેન્ટ અને પોતાની મંજૂરી વિના નામ તથા તસવીરોના વ્યાવસાયિક ઉપયોગ પર રોક લગાવવાની માંગ કરી છે.
અરજીમાં શ્રુતિ હસને જણાવ્યું છે કે છેલ્લા કેટલાક સમયથી તેના ચહેરાનો ઉપયોગ કરીને ડીપફેક અને મોર્ફ્ડ કન્ટેન્ટ બનાવવામાં આવી રહ્યો છે. તેમાં ખોટા રોમેન્ટિક વીડિયો, નકલી તસવીરો તેમજ અન્ય ભ્રામક સામગ્રીનો સમાવેશ થાય છે, જેનાથી તેની છબી અને પ્રતિષ્ઠાને નુકસાન પહોંચે છે.
આ કેસમાં અનેક ભારતીય અને વિદેશી સંસ્થાઓ, સોશિયલ મીડિયા પ્લેટફોર્મ્સ તેમજ અજાણ્યા વ્યક્તિઓને પ્રતિવાદી બનાવવામાં આવ્યા છે. અભિનેત્રીનો આરોપ છે કે આ પ્લેટફોર્મ્સ પર તેની ઓળખનો અનધિકૃત ઉપયોગ કરતી સામગ્રી હોસ્ટ અથવા પ્રસારિત કરવામાં આવી રહી છે.
જસ્ટિસ અભય આહુજાએ કેસ દાખલ કરવાની મંજૂરી આપ્યા બાદ હવે આ મામલે વચગાળાની રાહત અંગે વધુ સુનાવણી થવાની શક્યતા છે. શ્રુતિ હસને અદાલતને વિનંતી કરી છે કે તેના નામ, તસવીર અને ઓળખનો ગેરકાયદે ઉપયોગ કરતી તમામ સામગ્રી તાત્કાલિક દૂર કરવામાં આવે.
અરજીમાં વધુમાં જણાવાયું છે કે ફિલ્મો, સંગીત અને બ્રાન્ડ એન્ડોર્સમેન્ટ્સ દ્વારા શ્રુતિ હસને પોતાની આગવી ઓળખ અને વ્યાવસાયિક મૂલ્ય બનાવ્યું છે. તેથી તેની મંજૂરી વિના કોઈપણ વ્યાવસાયિક ઉપયોગ તેના વ્યક્તિત્વ અને પબ્લિસિટી અધિકારોનું ઉલ્લંઘન ગણાય છે.
અભિનેત્રીએ કોર્ટ સમક્ષ કાયમી પ્રતિબંધ, નુકસાનની ભરપાઈ અને ગેરકાયદે રીતે તેના નામ અને ઓળખનો ઉપયોગ કરીને મેળવાયેલા નફાનો હિસાબ રજૂ કરવાનો આદેશ આપવા પણ માંગ કરી છે.
.jpg)
)
