‘દિલ ચાહતા હૈ’ના એક સીન માટે આમિર ખાને ખાધી હતી 17 થપ્પડ, ફરહાન અખ્તરે સંભળાવ્યો રસપ્રદ કિસ્સો

મુંબઈ, તા.૨૪
બોલિવૂડ અભિનેતા આમિર ખાન પોતાના અભિનયમાં પરફેક્શન માટે જાણીતા છે. કોઈ સીનને શક્ય તેટલો વાસ્તવિક બનાવવા માટે તેઓ અનેક ટેક આપવા પણ તૈયાર રહે છે. વર્ષ 2001માં આવેલી ફિલ્મ ‘દિલ ચાહતા હૈ’ના શૂટિંગ દરમિયાન પણ આવો જ એક રસપ્રદ કિસ્સો બન્યો હતો. ફિલ્મના એક સીનને પરફેક્ટ બનાવવા માટે આમિર ખાને સહકલાકાર અક્ષય ખન્નાના હાથે એક-બે નહીં પરંતુ કુલ 17 વખત થપ્પડ ખાધી હતી.
ફિલ્મના દિગ્દર્શક ફરહાન અખ્તરે ‘દિલ ચાહતા હૈ’ના 25 વર્ષ પૂર્ણ થવાના પ્રસંગે એક ઇવેન્ટ દરમિયાન આ કિસ્સો યાદ કર્યો હતો. ખાસ વાત એ હતી કે આ દરમિયાન આમિર ખાન પણ હાજર હતા. ફરહાનના જણાવ્યા પ્રમાણે વારંવાર થપ્પડ મારવાનું કારણ અક્ષય ખન્નાની કોઈ ભૂલ નહોતી, પરંતુ સીનમાં યોગ્ય રિએક્શન મેળવવા માટે આમિર પોતે ફરી ટેક આપવા તૈયાર થતા હતા.
‘દિલ ચાહતા હૈ’માં અક્ષય ખન્નાએ સિદ્ધાર્થ એટલે કે સિડ અને આમિર ખાને આકાશનું પાત્ર ભજવ્યું હતું. ફિલ્મના એક મહત્વના દૃશ્યમાં ગુસ્સે થયેલો સિડ આકાશને થપ્પડ મારે છે. ફરહાન ઇચ્છતા હતા કે થપ્પડ બાદ આમિરના ચહેરા પર જોવા મળતું રિએક્શન એકદમ સ્વાભાવિક હોય. આ માટે અક્ષય ખન્નાને સીનના અંતે વાસ્તવિક રીતે થપ્પડ મારવાનું કહેવામાં આવ્યું હતું.
આમિરને અગાઉથી જ જાણ કરવામાં આવી હતી કે સીનમાં ખરેખર થપ્પડ મારવામાં આવશે અને તેમણે પણ તેના માટે સંમતિ આપી હતી. શરૂઆતમાં એવું માનવામાં આવ્યું હતું કે અચાનક પડેલી થપ્પડથી આમિરના ચહેરા પર આવતું રિએક્શન કેમેરામાં સ્વાભાવિક રીતે કેદ થઈ જશે. જોકે સીન માટે આમિર જે પ્રકારનું રિએક્શન ઇચ્છતા હતા તે મેળવવા માટે એક પછી એક ટેક લેવામાં આવ્યા.
ફરહાન અખ્તરના જણાવ્યા અનુસાર આમિર પોતે જ ફરી એક ટેક કરવાની વાત કરતા રહ્યા હતા. પરિણામે અક્ષય ખન્નાએ સીન દરમિયાન તેમને વારંવાર થપ્પડ મારવી પડી. અંતે શોટ ફાઇનલ થયો ત્યાં સુધીમાં આમિર કુલ 17 વખત થપ્પડ ખાઈ ચૂક્યા હતા.
સતત ટેકના કારણે આમિરના ચહેરાની એક બાજુનો ગાલ સૂજી ગયો હતો અને થપ્પડના નિશાન પણ દેખાવા લાગ્યા હતા. ઇવેન્ટ દરમિયાન આ કિસ્સાની ચર્ચા થતાં સૈફ અલી ખાને પણ મજાકિયા અંદાજમાં આમિરને પૂછ્યું હતું કે શું તેમને ખરેખર અસલી થપ્પડ મારવામાં આવી હતી.
વર્ષ 2001માં રિલીઝ થયેલી ‘દિલ ચાહતા હૈ’માં આમિર ખાન, અક્ષય ખન્ના અને સૈફ અલી ખાને ત્રણ મિત્રોની ભૂમિકા ભજવી હતી. ત્રણ મિત્રોની જિંદગી, મિત્રતા અને સંબંધોમાં આવતા બદલાવની આસપાસ ફિલ્મની વાર્તા આગળ વધતી હતી. પ્રીતિ ઝિન્ટા, સોનાલી કુલકર્ણી અને ડિમ્પલ કાપડિયા પણ ફિલ્મમાં મહત્વપૂર્ણ ભૂમિકામાં જોવા મળ્યાં હતાં.
ફરહાન અખ્તરના દિગ્દર્શનમાં બનેલી આ ફિલ્મ સમય જતાં હિન્દી સિનેમાની યાદગાર ફિલ્મોમાં સ્થાન મેળવવામાં સફળ રહી. હવે ફિલ્મના 25 વર્ષ પૂર્ણ થવાના પ્રસંગે સામે આવેલો 17 થપ્પડનો આ કિસ્સો ફરી એકવાર આમિર ખાનના સીનને પરફેક્ટ બનાવવાના અભિગમને લઈને ચર્ચામાં આવ્યો છે.