જૂનાગઢના ખેડૂતોને FASAL સાધન ખરીદી પર 50% સુધી સહાય, 25 સપ્ટેમ્બરથી i-Khedut પોર્ટલ પર અરજી શરૂ
સ્માર્ટ અને પ્રીસીઝન ફાર્મિંગ યોજના હેઠળ મહત્તમ રૂ.75 હજાર સુધીની સહાય; સિંચાઈ, હવામાન તેમજ જીવાત-રોગની આગોતરી જાણકારી માટે IoT આધારિત ટેક્નોલોજીનો ઉપયોગ
saurashtrabhoomi 
જૂનાગઢ,તા.૨૪
જૂનાગઢ જિલ્લાના ખેડૂતો માટે વર્ષ 2026-27ની સ્માર્ટ અને પ્રીસીઝન ફાર્મિંગ યોજના હેઠળ અરજીઓ મંગાવવામાં આવી છે. યોજના અંતર્ગત IoT આધારિત FASAL સાધનની ખરીદી માટે ખેડૂતોને 50 ટકા સુધીની નાણાકીય સહાય આપવામાં આવશે. આ યોજનાનો લાભ મેળવવા માટે i-Khedut પોર્ટલ 25 સપ્ટેમ્બર, 2026થી 24 ઓક્ટોબર, 2026 સુધી ખુલ્લું રહેશે.
આધુનિક ટેક્નોલોજીને ખેતી સાથે જોડવાના હેતુથી અમલમાં મુકાયેલી આ યોજનામાં ઇન્ટરનેટ ઓફ થિંગ્સ એટલે કે IoT અને પ્રીસીઝન ફાર્મિંગના સાધનોના ઉપયોગને પ્રોત્સાહન આપવામાં આવી રહ્યું છે. ટેક્નોલોજીની મદદથી પાક વ્યવસ્થાપન વધુ સચોટ બનાવવા તેમજ ખેડૂતોની આવક વધારવાના હેતુ સાથે યોજના અમલમાં મૂકવામાં આવી છે.
યોજના હેઠળ પાક વ્યવસ્થાપન માટે પ્રીસીઝન ફાર્મિંગના ઘટક તરીકે IoT આધારિત FASAL સાધનની ખરીદી પર સહાય મળશે. આ સાધન ખેડૂતોને સિંચાઈ માટે યોગ્ય સમય અંગે ચેતવણી આપવા, હવામાનની આગાહી મેળવવા તેમજ પાકમાં સંભવિત જીવાત અને રોગ અંગે આગોતરી જાણકારી મેળવવામાં ઉપયોગી હોવાનું જણાવાયું છે.
FASAL સાધન ખરીદનાર લાભાર્થી ખેડૂતને સાધનની કુલ કિંમતના 50 ટકા અથવા મહત્તમ રૂ.75,000 પૈકી જે રકમ ઓછી હશે તેટલી સહાય મળવાપાત્ર રહેશે. આ સહાય મહત્તમ બે એકરની મર્યાદામાં આપવામાં આવશે. સાથે જ એક ખાતા દીઠ પાંચ વર્ષના સમયગાળામાં માત્ર એક વખત આ યોજનાનો લાભ મેળવી શકાશે.
યોજનાનો લાભ લેવા ઇચ્છતા ખેડૂતોએ નિર્ધારિત સમયમર્યાદામાં i-Khedut પોર્ટલ મારફતે અરજી કરવાની રહેશે. અરજી અથવા નોંધણી માટે આધારકાર્ડ સાથે લિંક કરેલા મોબાઇલ નંબર પર મળતા OTPનો ઉપયોગ કરી શકાશે. આ ઉપરાંત બાયોમેટ્રિક પદ્ધતિથી પણ નોંધણી અને અરજી કરવાની સુવિધા ઉપલબ્ધ રહેશે.
ખેડૂતોએ અરજી કરતાં પહેલાં જરૂરી વિગતો અને દસ્તાવેજો તૈયાર રાખવા જણાવાયું છે. યોજના અને અરજી પ્રક્રિયા અંગે વધુ માર્ગદર્શન મેળવવા માટે ગ્રામ્ય કક્ષાએ ગ્રામ સેવક તથા તાલુકા કક્ષાએ વિસ્તરણ અધિકારી (ખેતી)નો સંપર્ક કરી શકાશે.
જૂનાગઢ જિલ્લાના ખેડૂતો માટે અરજીની પ્રક્રિયા 25 સપ્ટેમ્બરથી શરૂ થઈ રહી છે અને 24 ઓક્ટોબર સુધી પોર્ટલ ખુલ્લું રહેશે. જેથી FASAL સાધન માટે સહાય મેળવવા ઇચ્છતા પાત્ર ખેડૂતોને સમયમર્યાદામાં અરજી કરવા અનુરોધ કરવામાં આવ્યો છે.
