નશામુક્ત ભારત માટે સાથે મળીને કામ કરવા વડાપ્રધાનનું આહવાન

નશામુક્ત ભારત માટે સાથે મળીને કામ કરવા વડાપ્રધાનનું આહવાન

(એજન્સી)     નવી દિલ્હી તા.૨૦
પ્રધાનમંત્રી નરેન્દ્ર મોદીએ ગુરુવારે દિલ્હીના સુષમા સ્વરાજ ભવનમાં સામાજિક ન્યાય અને અધિકારિતા વિભાગના સંમેલનના સમાપન સત્રની અધ્યક્ષતા કરી. આ સંમેલનમાં રાજ્યો અને કેન્દ્રશાસિત પ્રદેશોના મંત્રીઓ તથા વરિષ્ઠ અધિકારીઓ સામેલ થયા હતા. તેમાં સામાજિક સમાનતા, દિવ્યાંગજનોની મદદ, માદક દ્રવ્યોના વ્યસનને રોકવા અને લોકોની ભાગીદારી વધારવા અંગે ચર્ચા થઈ.
મોદીએ કહ્યું કે, નશા સામે માત્ર દેખાડા પૂરતું કામ ન થવું જોઈએ. નશામુક્ત ભારત બનાવવા માટે સામાન્ય લોકો, આધ્યાત્મિક સંગઠનો, શાળાઓ અને સરકારી વિભાગોએ સાથે મળીને પ્રયાસ કરવો પડશે. તેમણે બાળકોમાં દિવ્યાંગતાની સમયસર ઓળખ કરવા અને તેનાથી સંબંધિત ભેદભાવ દૂર કરવા માટે પણ લોકોની ભાગીદારી વધારવા પર ભાર મૂક્યો.
મોદીએ કહ્યું કે, શાળાઓમાં નશાના નુકસાન અંગે નિબંધ, ભાષણ અને વાદ-વિવાદ સ્પર્ધાઓ યોજવી જોઈએ. તેનાથી બાળકો અને યુવાનોને નશાથી દૂર રહેવા માટે જાગૃત કરી શકાશે.
તેમણે નશાની લત છોડી ચૂકેલા લોકોની વાર્તાઓ અને અનુભવો અન્ય લોકો સાથે વહેંચવાનું સૂચન પણ કર્યું. પ્રધાનમંત્રીએ કહ્યું કે, નશામુક્ત ભારત માટે સમુદાયો, આધ્યાત્મિક સંગઠનો, શૈક્ષણિક સંસ્થાઓ અને સરકારી વિભાગોએ આગળ આવવું પડશે. લોકોની સક્રિય ભાગીદારીથી જ તેમની આદતોમાં પરિવર્તન લાવી શકાય છે.