શાળા સંચાલકો અને ખાનગી ટ્યુશન ક્લાસિસ વચ્ચે ચાલતા ષડ્યંત્ર બાદ આખરે સરકાર જાગી
કુલ 8 સભ્યોની સમિતિ બનાવવાનો કરાયો નિર્ણય
saurashtrabhoomi 
ગુજરાતમાં શિક્ષણ ક્ષેત્રે એક મોટો ફેરફાર રાજ્ય સરકાર દ્વારા એક મહત્ત્વપૂર્ણ પગલું ભરવામાં આવ્યું. ખાનગી ટ્યુશન અને કોચિંગ ક્લાસીસ પર નિયંત્રણ લાવવા માટે ટૂંક સમયમાં જ એક કાયદો લાગુ કરવામાં આવશે. આ કાયદાનો ડ્રાફ્ટ તૈયાર કરવા માટે ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ(GSEB)ના અધ્યક્ષના વડપણ હેઠળ એક વિશેષ સમિતિની રચના કરાઈ છે. આ સમિતિમાં GSEBના અધ્યક્ષ સિવાયના અન્ય 7 સભ્યોનો સમાવેશ થશે જેમાં શિક્ષણ વિભાગના નાયબ સચિવ, કમિશનર, શાળાઓના નિયામક અને શિક્ષણ ક્ષેત્રના નિષ્ણાત વ્યક્તિઓને સામેલ કરાશે.
આ કાયદો અભ્યાસક્રમ, ટ્યુશન ક્લાસની ફી, સલામતીના ધોરણો અને અન્ય શૈક્ષણિક પ્રવૃત્તિઓને નિયંત્રિત કરવામાં મદદરૂપ થશે. આ કાયદાનો મુખ્ય હેતુ શિક્ષણ ક્ષેત્રમાં પારદર્શકતા અને જવાબદારી લાવવાનો છે, જે સુપ્રીમ કોર્ટના નિર્દેશોને અનુરૂપ હશે. આ કાયદો ખાનગી ટયુશન ક્લાસિસની મનમાની પર લગામ કસશે, સુવ્યવસ્થિત શિક્ષણ પ્રણાલી સ્થાપિત કરવામાં મદદ કરશે અને વિદ્યાર્થીઓ અને વાલીઓને આર્થિક અને શૈક્ષણિક ક્ષેત્રે થતા શોષણથી રક્ષણ આપશે તેવી આશા છે.
