માંગરોળમાં દારૂની ખેપમાં ‘ખાખી’નો જ હાથ : રૂા.૪૮.૯૦ લાખના દારૂ રેકેટમાં કોઈ બુટલેગર નહી ખુદ પોલીસ કોન્સ્ટેબલની જ સંડોવણી

(પ્રતિનિધિ દ્વારા)
માંગરોળ તા.૧૧
જૂનાગઢ એલસીબીએ ગત ગુરૂવારે માંગરોળના મકતુપુર નજીક પોરબંદર બાયપાસ રોડ પરથી યુપી પાર્સિંગના એક ટ્રકમાંથી રૂા.૪૮.૯૦ લાખનો વિદેશી દારૂનો જથ્થો ઝડપી પાડયો હતો. અને તેના બીજા જ દિવસે જૂનાગઢ એલસીબીએ એજ વિસ્તારના શીલમાંથી લાખોનો દારૂ ઝડપી પાડ્યો હતો. આ પ્રકરણમાં ઉત્તર પ્રદેશના ટ્રક ચાલક અફઝલઅલી સફાતઅલી મંસુરીની ધરપકડ કરીને તેની વિરૂદ્ધ માંગરોળ મરીન પોલીસ સ્ટેશનમાં પ્રોહીબીશન એક્ટ મુજબ ગુનો દાખલ કરવામાં આવ્યો હતો અને એલસીબી દ્વારા ટ્રક ડ્રાઇવરની ઉંડાણપૂર્વક પૂછપરછ અને ટેકનિકલ સોર્સના આધારે હાથ ધરાયેલી તપાસમાં બહાર આવેલી ગંભીર હકીકતએ સૌને ચોંકાવી દીધા છે. આ દારૂના રેકેટમાં કોઈ બુટલેગર  નહીં, પરંતુ જે પોલીસ સ્ટેશનમાં આ ગુનો દાખલ થયો હતો, તે જ માંગરોળ મરીન પોલીસ સ્ટેશનના એક પોલીસ કોન્સ્ટેબલની સંડોવણી સામે આવી છે. થ્રિલર ફીલ્મની સ્ટોરી જેવી આ સનસની ઘટનાની પોલીસમાથી મળતી માહિતી એવી છે કે, જે સમયે એલસીબીએ દારૂ ભરેલો ટ્રક રોક્યો હતો, તે જ સમયે ડ્રાઇવરનો મોબાઇલ ફોન સ્વીચ ઓફ થઈ ગયો હતો. આથી દારૂ મોકલનાર વ્યક્તિ ટ્રક ડ્રાઇવરનો સંપર્ક કરી શક્યો નહીં. જેથી, દારૂ મોકલનારે ટ્રકમાં લગાવેલ સેટેલાઇટ જીપીએસ સિસ્ટમ દ્વારા ટ્રકનું લોકેશન ટ્રેસ કર્યું. જીપીએસથી જાણવા મળ્યું કે ટ્રક માંગરોળ-પોરબંદર હાઇવે પર ઊભો છે. દારૂ મોકલનારે તે વિસ્તારમાં આવેલી એક ઈંડાની લારી ધારકનો ફોન દ્વારા સંપર્ક કર્યો. દારૂ મોકલનારે લારી ધારકને કહ્યું કે, મારો ટ્રક ત્યાં બંધ થઈ ગયો છે અને ડ્રાઇવરનો ફોન બંધ આવે છે, કૃપા કરીને ડ્રાઇવર સાથે મારી વાત કરાવો. તેના જવાબમાં ઈંડાની લારી ધારકે કહ્યું કે, સાહેબ, ટ્રક તો મારી સામે ઉભો છે, પણ અહીં પોલીસ પણ હાજર છે! આટલું સાંભળતાની સાથે જ દારૂ મોકલનાર વ્યક્તિ ગભરાઈ ગયો અને તેણે તરત જ પોતાનો મોબાઇલ ફોન બંધ કરી દીધો. આ ઘટનાક્રમ બાદ, જૂનાગઢ એલસીબી દ્વારા તાત્કાલિક તે ઈંડાની લારી ધારકને પકડીને સઘન પૂછપરછ કરવામાં આવી. આ પૂછપરછ અને અન્ય ટેકનિકલ તપાસના આધારે એલસીબીને માલુમ પડયું કે આ લાખો રૂપિયાનો દારૂ ટ્રકમાં મંગાવનાર ત્રણ વ્યક્તિઓ હતા. વધુ ઊંડાણપૂર્વક તપાસ કરતાં સૌથી ચોંકાવનારી વિગત સામે આવી કે આ ત્રણેય આરોપીઓ સાથે માંગરોળ મરીન પોલીસ સ્ટેશનનો કોન્સ્ટેબલ અતુલ દયાતર પણ સતત સંપર્કમાં હતો. એલસીબીની તપાસમાં કોન્સ્ટેબલ અતુલ દયાતરની પણ આ લાખો રૂપિયાના દારૂના ગુનામાં સંપૂર્ણ સંડોવણી હોવાનું સ્પષ્ટ થયું હતું. આ રીતે, જૂનાગઢ એલસીબીએ જીપીએસ, ઈંડાની લારીના ફોન કોલ અને ટેકનિકલ પુરાવાઓની મદદથી દારૂના આ રેકેટમાં સંડોવાયેલા પોલીસકર્મી સુધી પહોંચીને મોટી સફળતા મેળવી છે. 

જૂનાગઢ ડીવાયએસપી હિતેશ ધાંધલીયાએ આ સમગ્ર મામલે જણાવ્યું હતું કે ગત ૪ ડિસેમ્બરની ૨૦૨૫ની રેડ બાદ એલસીબી દ્વારા ટેકનિકલ સોર્સ અને ખાનગી બાતમીદારોના આધારે આ ગુનાની ઊંડાણપૂર્વક તપાસ શરૂ કરવામાં આવી હતી. આ તપાસના અંતે, દારૂની હેરફેરમાં સંડોવાયેલા અન્ય ચાર ઇસમોના નામ ખુલ્યા હતા અને તેમના વિરૂદ્ધ પૂરતા પુરાવા મળતા માંગરોળ મરીન પોલીસ સ્ટેશનમાં ફરજ બજાવતા અતુલ દાના દયાતર, અસલમ પટેલીયા, મિતુલ ડોલુભાઈ દયાતર અને દેવશી નથુ નંદાણીયાની ધરપકડ કરવામાં આવી છે. દારૂની રેડ કરવામાં આવી તે સમયે કોન્સ્ટેબલના કોલ ડિટેલ અને મોબાઇલ લોકેશનનું પૃથ્થકરણ કરવામાં આવ્યું હતું. 

પોલીસ કોન્સ્ટેબલ અતુલ દયાતર 

આ ટેકનિકલ પુરાવાના આધારે સાબિત થયું કે અતુલ દયાતર આ ગેરકાયદેસર પ્રવૃત્તિમાં પૂરી રીતે સંડોવાયેલો હતો. કોન્સ્ટેબલે અન્ય આરોપીઓ સાથે મળીને દારૂનો આ મોટો જથ્થો ક્યાંથી આવ્યો અને ક્યાં પહોંચાડવાનો હતો, તેમાં મદદગારી કરી હતી. પોલીસ કોન્સ્ટેબલ દ્વારા જ કાયદાનું રક્ષણ કરવાને બદલે ગુનાહિત પ્રવૃત્તિમાં સંડોવાવું એ અત્યંત ગંભીર બાબત છે. જૂનાગઢ એલસીબીએ આ તમામ ચાર આરોપીઓની ધરપકડ કરી છે અને સમગ્ર રેકેટના મૂળ સુધી પહોંચવા માટે તેમના રિમાન્ડની માંગણી કરી છે, જેથી આ પ્રવૃત્તિમાં સંડોવાયેલા અન્ય કોઈ મોટા માથા હોય તો તેમને પણ ઝડપી શકાય. આ કાર્યવાહીથી પોલીસ વિભાગમાં સફાયાના સંકેતો મળી રહ્યા છે. અત્રે ઉલ્લેખનીય છે કે ત્રણ મહિના અગાઉ પણ શેરીયાજ બારામાંથી લાખો રૂપિયાના વિદેશી દારૂ ભરેલી બે હોડીઓ પકડાઈ હતી જેનો કોઈ તાગ હજુ સુધી બહાર આવ્યો નથી.