રણબીર કપૂર-સાઈ પલ્લવીની ‘રામાયણ’નું પહેલું ગીત ‘જય જય રામ’ રિલીઝ, સ્વયંવરથી વનવાસ સુધીની ઝલક
અરિજિત સિંહ અને શ્રેયા ઘોષાલના અવાજ સાથે એ.આર. રહેમાનનું સંગીત; રામ-સીતાના લગ્ન, રાજ્યાભિષેકની તૈયારી અને વનવાસના દૃશ્યોએ ખેંચ્યું ધ્યાન
saurashtrabhoomi 
મુંબઈ, તા.૧૫
રણબીર કપૂર અને સાઈ પલ્લવીની બહુપ્રતિક્ષિત ફિલ્મ ‘રામાયણ’ને લઈને ચાહકોની આતુરતા વચ્ચે ફિલ્મનું પહેલું ગીત ‘જય જય રામ’ રિલીઝ કરવામાં આવ્યું છે. ભક્તિભાવથી ભરપૂર આ ગીતમાં ભગવાન રામની જીવનયાત્રાની સાથે રામ અને સીતાના સંબંધની અનેક મહત્વપૂર્ણ ક્ષણોની ઝલક જોવા મળે છે.
ગીતમાં રણબીર કપૂર ભગવાન રામ અને સાઈ પલ્લવી માતા સીતાના સ્વરૂપમાં જોવા મળે છે. વિઝ્યુઅલ્સમાં રામ-સીતાના સ્વયંવર અને લગ્નથી લઈને રાજ્યાભિષેકની તૈયારીઓ તથા ત્યારબાદ વનવાસ તરફ આગળ વધતી કથાની ઝલક રજૂ કરવામાં આવી છે. ભવ્ય સેટ અને મોટા પાયે તૈયાર કરાયેલા દૃશ્યોને કારણે ગીત સોશિયલ મીડિયા પર પણ ચર્ચામાં આવ્યું છે.
‘જય જય રામ’ને અરિજિત સિંહ અને શ્રેયા ઘોષાલે અવાજ આપ્યો છે, જ્યારે સંગીત એ.આર. રહેમાનનું હોવાનું જણાવાયું છે. ગીતમાં પરંપરાગત ‘રામ સિયા રામ, જય જય રામ’ની અનુભૂતિ કરાવતી ધૂનનો પણ ઉપયોગ કરવામાં આવ્યો છે. નવા સંગીત અને પરંપરાગત ભક્તિભાવના આ મિશ્રણને ચાહકો તરફથી પ્રતિસાદ મળી રહ્યો છે.
ગીતમાં માત્ર રામ અને સીતા જ નહીં, પરંતુ અન્ય મહત્વપૂર્ણ પાત્રોની ઝલક પણ જોવા મળે છે. લક્ષ્મણની ભૂમિકામાં રવિ દુબે અને ભરતના પાત્રમાં આદિનાથ કોઠારે જોવા મળે છે. રામ-સીતાના સંબંધની સાથે અયોધ્યા અને રાજપરિવાર સાથે જોડાયેલા પ્રસંગોને પણ ભવ્ય રીતે રજૂ કરવાનો પ્રયાસ કરવામાં આવ્યો છે.
ગીત રિલીઝ થયા બાદ સોશિયલ મીડિયા પર તેના સંગીત, સિનેમેટોગ્રાફી અને વિઝ્યુઅલ ટ્રીટમેન્ટની ચર્ચા જોવા મળી રહી છે. ખાસ કરીને રણબીર અને સાઈ પલ્લવીના રામ-સીતા અવતાર તેમજ ફિલ્મના ગ્રાન્ડ સેટ્સે ચાહકોનું ધ્યાન ખેંચ્યું છે.
અહેવાલ મુજબ ‘રામાયણ’નો પહેલો ભાગ આ વર્ષે દિવાળી દરમિયાન ૬ નવેમ્બરે રિલીઝ થવાનો છે. પહેલા ભાગમાં કથા વનવાસ સુધી પહોંચે તેવી ચર્ચા છે, જ્યારે હનુમાનના પાત્રની મુખ્ય એન્ટ્રી બીજા ભાગમાં જોવા મળે તેવી માહિતી સામે આવી છે. જોકે કથાના આ વિભાજન અંગે મેકર્સ તરફથી સત્તાવાર વિગતોની રાહ જોવાઈ રહી છે.
