ઉપરકોટ રામ મંદિરના પૂજારી સામે મહિલાઓનો આક્રોશ, ગંભીર આક્ષેપો સાથે ‘એ’ ડિવિઝન પોલીસમાં અરજી
ગાળાગાળી, હેરાનગતિ, ખોટી ફરિયાદો અને નશીલા પદાર્થો અંગે મહિલાઓએ લગાવ્યા આરોપ; આક્ષેપોની સ્વતંત્ર પુષ્ટિ બાકી, પૂજારી પક્ષનો જવાબ સામે આવ્યો નથી
saurashtrabhoomi 
જૂનાગઢ તા.14
જૂનાગઢના ઉપરકોટ વિસ્તારમાં આવેલા રામ મંદિરના પૂજારી અને તેમના પરિવારજનો સામે સ્થાનિક મહિલાઓ તથા ઉપરકોટમાં ફરજ બજાવતી મહિલા કર્મચારીઓએ ગંભીર આક્ષેપો કર્યા છે. મહિલાઓએ કથિત ગાળાગાળી, હેરાનગતિ, ધમકી અને ખોટી ફરિયાદો સહિતના મુદ્દે જૂનાગઢના ‘એ’ ડિવિઝન પોલીસ સ્ટેશનમાં લેખિત અરજી આપી તપાસ અને કાર્યવાહી કરવાની માંગ કરી છે.
સ્થાનિક રહીશ અને કર્મચારી પૂજાબેન ગોસ્વામીએ આક્ષેપ કર્યો છે કે તેઓ રામ મંદિર નજીક રહે છે અને નિયમિત દર્શન માટે મંદિરે જાય છે. તેમના દાવા મુજબ પૂજારી ભકાબાપુ અને પ્રતીકભાઈ દ્વારા મહિલાઓ સાથે અયોગ્ય વર્તન અને ગાળાગાળી કરવામાં આવે છે. પૂજાબેને મંદિર પરિસરમાં ચરસ-ગાંજાના સેવન અને વેચાણ અંગે પણ ગંભીર આરોપ લગાવ્યો છે. જોકે આ આરોપોની પોલીસ કે અન્ય સત્તાવાર તંત્ર દ્વારા પુષ્ટિ થઈ હોવાનું હાલ ઉપલબ્ધ માહિતીમાં સામે આવ્યું નથી.
પૂજાબેને વધુમાં એવો પણ આક્ષેપ કર્યો છે કે તેમના પરિવાર પર મંદિરની થાળીના રૂપિયા અને ચાંદીના છત્તરની ચોરીના ખોટા આરોપ મૂકવામાં આવ્યા છે. સાથે જ પ્રસાદીનો અનાદર થતો હોવા તથા તેમના દિયર સામે ખોટી ફરિયાદ કરવામાં આવી હોવાના આરોપ પણ તેમણે લગાવ્યા છે.
બીજી તરફ ઉપરકોટ ખાતે સફાઈ કર્મચારી તરીકે ફરજ બજાવતા કોમલ પરમારે પણ પૂજારી સામે હેરાનગતિના આક્ષેપ કર્યા છે. તેમના જણાવ્યા પ્રમાણે મહિલા સફાઈ કર્મચારીઓ સવારે સાડા છ વાગ્યાથી પોતાના પોઇન્ટ પર પહોંચી કામગીરી પૂર્ણ કરે છે, તેમ છતાં તેઓ કામ કરતા નથી તેવી ફરિયાદ ઉપરી અધિકારીઓ સમક્ષ કરવામાં આવતી હોવાનો તેમનો દાવો છે.
કોમલ પરમારે એવો પણ આક્ષેપ કર્યો છે કે મહિલા કર્મચારીઓને નોકરીમાંથી કાઢી મૂકવા કે અન્ય જગ્યાએ બદલી કરવાની ધમકીઓ આપવામાં આવે છે. સતત હેરાનગતિથી કંટાળીને મહિલા કર્મચારીઓ અને સ્થાનિક મહિલાઓએ એકત્ર થઈ ‘એ’ ડિવિઝન પોલીસ સ્ટેશન ખાતે લેખિત અરજી આપી હોવાનું તેમણે જણાવ્યું હતું.
મહિલાઓ દ્વારા કરવામાં આવેલા આ તમામ આક્ષેપો ગંભીર પ્રકૃતિના છે. જોકે આક્ષેપોની સત્યતા અંગે પોલીસ તપાસનું પરિણામ હજુ સામે આવ્યું નથી અને ઉપલબ્ધ માહિતીમાં પૂજારી ભકાબાપુ અથવા તેમના પરિવારજનોનો પક્ષ પણ સામેલ નથી. તેથી આક્ષેપોને હાલ ફરિયાદી મહિલાઓના દાવા તરીકે જ જોવાના રહેશે.
