આમિર ખાનની ‘લલકાર’માં ત્રણ નવા કલાકારોની એન્ટ્રી
વિક્રાંત મેસ્સી, જિતેન્દ્ર કુમાર અને ધૈર્ય કારવા ફિલ્મ સાથે જોડાયા, જાન્યુઆરી 2027થી શૂટિંગ શરૂ થવાની શક્યતા
મુંબઈ તા.19
બોલિવૂડ અભિનેતા આમિર ખાનની આગામી ફિલ્મ ‘લલકાર’માં ત્રણ નવા કલાકારોની એન્ટ્રી થઈ છે. વિક્રાંત મેસ્સી, જિતેન્દ્ર કુમાર અને ધૈર્ય કારવા હવે આ ફિલ્મની સ્ટારકાસ્ટ સાથે જોડાયા છે. ફિલ્મમાં આમિર ખાન ભારતીય ક્રિકેટર લાલા અમરનાથની ભૂમિકા ભજવતા જોવા મળશે. ફિલ્મનું શૂટિંગ જાન્યુઆરી 2027થી શરૂ કરવાની તૈયારી ચાલી રહી છે.
છેલ્લા કેટલાક મહિનાઓથી ફિલ્મની કાસ્ટમાં સતત ફેરફાર જોવા મળી રહ્યા હતા. અગાઉ ફરહાન અખ્તર, સિદ્ધાંત ગુપ્તા અને ડેનિશ પંડોરે તારીખોની સમસ્યાને કારણે આ પ્રોજેક્ટમાંથી બહાર થવાનો નિર્ણય લીધો હતો. હવે ત્રણ નવા કલાકારોની પસંદગી કરવામાં આવતાં ફિલ્મના પ્રોડક્શનની કામગીરી આગળ વધવાની શક્યતા છે.
‘લલકાર’નું નિર્માણ ફરહાન અખ્તર અને રાજકુમાર હિરાણી કરી રહ્યા છે. આ ફિલ્મની વાર્તા ભારતના વિભાજન બાદ વર્ષ 1952માં રમાયેલી પ્રથમ ભારત-પાકિસ્તાન ટેસ્ટ ક્રિકેટ શ્રેણી પર આધારિત છે. આ ઐતિહાસિક ક્રિકેટ શ્રેણી અને તેની સાથે જોડાયેલી ઘટનાઓને ફિલ્મમાં રજૂ કરવામાં આવશે.
ફિલ્મની વાર્તા ‘દંગલ’ સાથે સંકળાયેલા પિયુષ ગુપ્તા અને ‘નીલ બટ્ટે સન્નાટા’ ફેમ નીરજ સિંહે લખી છે. આમિર ખાન લાલા અમરનાથના પાત્રમાં જોવા મળવાના હોવાથી ફિલ્મને લઈને ચાહકોમાં અત્યારથી ઉત્સુકતા જોવા મળી રહી છે. હવે જાન્યુઆરી 2027માં શૂટિંગ શરૂ થયા બાદ ફિલ્મની અન્ય વિગતો અને બાકીની સ્ટારકાસ્ટ અંગે વધુ જાણકારી સામે આવવાની અપેક્ષા છે.


