શ્રીલીલાની એક ઝલક માટે ચાહકોની ભીડ, થિયેટરની બહાર સેલ્ફી માટે પડાપડી

ચેન્નઈના કમલા સિનેમામાં ‘ઓમ : ઓપરેશન મોલ’નો પ્રથમ શો જોવા પહોંચી અભિનેત્રી, ફિલ્મ પૂરી થયા બાદ સુરક્ષાકર્મીઓએ ભીડમાંથી સુરક્ષિત બહાર કાઢી

શ્રીલીલાની એક ઝલક માટે ચાહકોની ભીડ, થિયેટરની બહાર સેલ્ફી માટે પડાપડી

મુંબઈ, તા. 21
દક્ષિણ ભારતીય અભિનેત્રી શ્રીલીલાની લોકપ્રિયતાનો નજારો ચેન્નઈના એક સિનેમાઘરમાં જોવા મળ્યો હતો. ધનુષ અભિનીત ફિલ્મ ‘ઓમ : ઓપરેશન મોલ’નો પ્રથમ દિવસનો પ્રથમ શો જોવા માટે શ્રીલીલા ચેન્નઈના કમલા સિનેમા પહોંચી હતી. ફિલ્મનું સ્ક્રીનિંગ પૂર્ણ થયા બાદ તે થિયેટરની બહાર આવતાં જ તેને જોવા અને તેની સાથે સેલ્ફી લેવા ચાહકોની મોટી ભીડ એકઠી થઈ ગઈ હતી. પરિસ્થિતિ એવી બની હતી કે અભિનેત્રીને સુરક્ષિત રીતે બહાર લઈ જવા માટે સુરક્ષાકર્મીઓએ દરમિયાનગીરી કરવી પડી હતી.
ધનુષની ફિલ્મ ‘ઓમ : ઓપરેશન મોલ’ 20 નવેમ્બરથી વિશ્વભરના સિનેમાઘરોમાં પ્રદર્શિત થઈ રહી છે. રાજકુમાર પેરિયાસામીના નિર્દેશનમાં બનેલી આ એક્શન-સ્પાય થ્રિલર ફિલ્મમાં ધનુષ ઉપરાંત સાઈ પલ્લવી, મામૂટી, નસીરુદ્દીન શાહ અને શ્રીલીલા પણ મહત્વની ભૂમિકામાં છે. ફિલ્મની રિલીઝ પહેલાંથી જ દર્શકોમાં ઉત્સુકતા જોવા મળી રહી હતી.
શ્રીલીલા ફિલ્મનો પ્રથમ શો જોવા માટે સામાન્ય દર્શકોની વચ્ચે થિયેટરમાં પહોંચી હતી. તેના આગમનથી સિનેમાઘરમાં હાજર ચાહકોનો ઉત્સાહ વધી ગયો હતો. ફિલ્મ પૂરી થયા બાદ જ્યારે અભિનેત્રી બહાર નીકળી ત્યારે મોટી સંખ્યામાં લોકો તેની આસપાસ એકઠા થઈ ગયા હતા. કેટલાક ચાહકો તેની સાથે સેલ્ફી લેવા તો કેટલાક નજીકથી તેની એક ઝલક જોવા માટે આગળ વધવા લાગ્યા હતા.
આ ઘટનાના વીડિયો સોશિયલ મીડિયા પર પણ વાયરલ થયા છે. વીડિયોમાં શ્રીલીલા ભીડમાંથી બહાર નીકળવાનો પ્રયાસ કરતી જોવા મળે છે. વધતી ભીડને ધ્યાનમાં રાખીને સુરક્ષાકર્મીઓએ આગળ આવીને રસ્તો ખાલી કરાવ્યો હતો અને અભિનેત્રીને સુરક્ષિત રીતે તેની કાર સુધી પહોંચાડી હતી.
થિયેટરની અંદરના વીડિયોમાં શ્રીલીલા દર્શકોનું અભિવાદન કરતી અને તેમની સાથે સમય વિતાવતી પણ જોવા મળી હતી. ફિલ્મ જોયા બાદ મીડિયા સાથે વાતચીત દરમિયાન તેણે આ અનુભવને અદભૂત અને યાદગાર ગણાવ્યો હતો. દર્શકોની વચ્ચે બેસીને પોતાની ફિલ્મ જોવી તેના માટે સ્વપ્ન સાકાર થવા સમાન હોવાનું તેણે જણાવ્યું હતું. સાથે જ શ્રીલીલાએ ચાહકોને ફિલ્મ જોવા અને તેને પ્રેમભર્યો પ્રતિસાદ આપવા અપીલ પણ કરી હતી.