લાલ કિલ્લાની સ્વાતંત્ર્ય પર્વની ઉજવણીમાં પહેલીવાર ગૂંજ્યું ‘વંદે માતરમ્’
સત્તાવાર સમારોહમાં અત્યાર સુધી ‘જન ગણ મન’ને જ મળતું હતું સ્થાન, આ વર્ષે પરંપરામાં જોવા મળ્યો નવો ઉમેરો
saurashtrabhoomi 
નવી દિલ્હી, તા. 15:
દેશના 80મા સ્વાતંત્ર્ય પર્વની ઉજવણી દરમિયાન દિલ્હીના ઐતિહાસિક લાલ કિલ્લા પરથી આ વર્ષે એક ખાસ ઘટના જોવા મળી હતી. સ્વાતંત્ર્ય દિવસના મુખ્ય સત્તાવાર સમારોહમાં પહેલીવાર ‘વંદે માતરમ્’ની રજૂઆત કરવામાં આવી હતી.
લાલ કિલ્લાની પ્રાચીર પરથી યોજાતા સ્વાતંત્ર્ય દિવસના મુખ્ય કાર્યક્રમના ઈતિહાસમાં આ એક મહત્વપૂર્ણ ઉમેરો માનવામાં આવી રહ્યો છે. અત્યાર સુધીના સત્તાવાર સમારોહોમાં રાષ્ટ્રીય પ્રોટોકોલ મુજબ રાષ્ટ્રગાન ‘જન ગણ મન’ને જ મુખ્ય સ્થાન આપવામાં આવતું હતું.
પરંતુ આ વર્ષે સ્વાતંત્ર્ય પર્વના કાર્યક્રમ દરમિયાન ‘વંદે માતરમ્’નું ગાન થતાં સમારોહમાં દેશભક્તિનો માહોલ વધુ ગાઢ બન્યો હતો. ‘વંદે માતરમ્’ ભારતના સ્વાતંત્ર્ય સંગ્રામ સાથે ઊંડે જોડાયેલું રાષ્ટ્રગીત સમાન મહત્વ ધરાવતું દેશભક્તિનું પ્રતીક રહ્યું છે.
લાલ કિલ્લા પરથી પ્રથમવાર સ્વાતંત્ર્ય દિવસના મુખ્ય સમારોહમાં ‘વંદે માતરમ્’ની રજૂઆત થવી આઝાદીના ઉજવણીના ઈતિહાસમાં નોંધપાત્ર ઘટના બની છે. આ સાથે આ વર્ષના સ્વાતંત્ર્ય પર્વના કાર્યક્રમમાં એક નવી પરંપરાનો ઉમેરો થયો છે.
