ગુજરાતના મેન્યુફેક્ચરિંગ MSME એકમોનું થશે GIS આધારિત મેપિંગ, PM ગતિ શક્તિ પોર્ટલ સાથે ડેટાનું થશે એકીકરણ

ગાંધીનગર તા.૧૭
ગુજરાતના મેન્યુફેક્ચરિંગ MSME ક્ષેત્રને વધુ સુવ્યવસ્થિત અને ડેટા આધારિત બનાવવાની દિશામાં મહત્વપૂર્ણ પ્રોજેક્ટ હાથ ધરવામાં આવ્યો છે. કેન્દ્ર સરકારના સૂક્ષ્મ, લઘુ અને મધ્યમ ઉદ્યોગ મંત્રાલયની ‘રૅઇઝિંગ એન્ડ એક્સેલરેટિંગ એમએસએમઈ પરફોર્મન્સ’ એટલે કે RAMP યોજના અંતર્ગત ગુજરાત સરકારના MSME કમિશનરેટ દ્વારા ‘PM ગતિ શક્તિ પોર્ટલ સાથે મેન્યુફેક્ચરિંગ MSMEનું મેપિંગ’ પ્રોજેક્ટ અમલમાં મૂકવામાં આવી રહ્યો છે.
આ પ્રોજેક્ટ અંતર્ગત રાજ્યમાં ‘ઉદ્યોગ પોર્ટલ’ પર નોંધાયેલા મેન્યુફેક્ચરિંગ MSME એકમોને GIS એટલે કે જિયોગ્રાફિક ઇન્ફોર્મેશન સિસ્ટમના આધારે મેપ કરવામાં આવશે. દરેક સંબંધિત એકમના ભૌગોલિક સ્થાનને જિયો-ટેગ કરીને તેની જરૂરી વિગતો સાથે ડિજિટલ ડેટાબેઝ તૈયાર કરવાની દિશામાં કામગીરી હાથ ધરવામાં આવશે.
સમગ્ર કામગીરી માટે ગુજરાત ઈન્ફો પેટ્રો લિમિટેડ એટલે કે GIPLને જવાબદારી સોંપવામાં આવી છે. પ્રોજેક્ટના અમલીકરણ દરમિયાન GIPLના અધિકૃત પ્રતિનિધિઓ રાજ્યના મેન્યુફેક્ચરિંગ MSME એકમોની મુલાકાત લેશે. સ્થળ મુલાકાત દરમિયાન એકમના ચોક્કસ ભૌગોલિક સ્થાનનું જિયો-ટેગિંગ કરવાની સાથે પ્રોજેક્ટ માટે જરૂરી માહિતી એકત્ર કરવામાં આવશે અને ઉપલબ્ધ વિગતોની ચકાસણી પણ કરવામાં આવશે.
આ કામગીરીને ધ્યાનમાં રાખીને રાજ્યના સંબંધિત MSME એકમોને GIPLના અધિકૃત પ્રતિનિધિઓને જરૂરી સહકાર આપવા જણાવવામાં આવ્યું છે. જિયો-ટેગિંગ અને મેપિંગ માટે જરૂરી માહિતી ઉપલબ્ધ કરાવવાથી રાજ્યના મેન્યુફેક્ચરિંગ MSME ક્ષેત્રની વધુ વ્યવસ્થિત અને સંકલિત ડિજિટલ માહિતી તૈયાર કરવામાં મદદ મળશે.
GIS આધારિત મેપિંગનો મુખ્ય લાભ એ રહેશે કે રાજ્યના કયા વિસ્તારમાં કેટલા મેન્યુફેક્ચરિંગ MSME એકમો કાર્યરત છે અને તેમનું ભૌગોલિક વિતરણ કેવું છે તેની માહિતી વધુ સુવ્યવસ્થિત રીતે ઉપલબ્ધ થઈ શકશે. આ માહિતીના આધારે MSME ક્ષેત્રની જરૂરિયાતોને ધ્યાનમાં રાખીને ભવિષ્યના આયોજન અને નીતિ ઘડતરમાં ઉપયોગી ડેટા ઉપલબ્ધ થશે.
ખાસ કરીને ઔદ્યોગિક વિસ્તારોમાં જરૂરી માળખાકીય સુવિધાઓના આયોજન માટે પણ આ પ્રકારનો ડેટાબેઝ ઉપયોગી બની શકે છે. MSME એકમોના ચોક્કસ સ્થાન અને સંબંધિત માહિતી એક જ વ્યવસ્થામાં ઉપલબ્ધ થવાથી વિવિધ યોજનાઓ અને વિકાસલક્ષી કામગીરી માટે ડેટા આધારિત આયોજનને વધુ અસરકારક બનાવવાનો હેતુ છે.
પ્રોજેક્ટનું વધુ એક મહત્વપૂર્ણ પાસું MSME ક્ષેત્રના આ GIS આધારિત ડેટાને PM ગતિ શક્તિ પોર્ટલ સાથે સંકલિત કરવાનું છે. આ એકીકરણ બાદ MSME એકમોના ભૌગોલિક સ્થાન અને સંબંધિત વિગતોને અન્ય આયોજનલક્ષી માહિતી સાથે વધુ વ્યવસ્થિત રીતે ઉપયોગમાં લઈ શકાશે. તેના આધારે અલગ-અલગ વિસ્તારોની જરૂરિયાતો ઓળખવા અને તે મુજબ આયોજન કરવામાં મદદ મળી શકે છે.
MSME એકમોનું જિયો-ટેગિંગ થવાથી રાજ્ય સ્તરે મેન્યુફેક્ચરિંગ એકમોની ભૌગોલિક સ્થિતિનું વધુ સ્પષ્ટ ચિત્ર તૈયાર થઈ શકશે. કોઈ ચોક્કસ વિસ્તારમાં ઉદ્યોગોની સંખ્યા, તેમનું વિતરણ અને ઉપલબ્ધ માળખાકીય સુવિધાઓ જેવી બાબતોને ડેટા સાથે જોડવાથી ભવિષ્યમાં જરૂરિયાત આધારિત સુવિધાઓ અને સહાય માટે આયોજન કરવામાં ઉપયોગી માહિતી મળી શકશે.
આ ઉપરાંત સરકારની વિવિધ MSMEલક્ષી યોજનાઓના અમલીકરણમાં પણ સંકલિત ડેટાબેઝ ઉપયોગી બનવાનો હેતુ છે. ચોક્કસ અને વ્યવસ્થિત માહિતી ઉપલબ્ધ હોવાથી આયોજન અને નિર્ણય પ્રક્રિયામાં ડેટાનો વધુ અસરકારક ઉપયોગ થઈ શકશે.
પ્રોજેક્ટ અંતર્ગત થનારી સ્થળ મુલાકાત દરમિયાન MSME એકમોએ GIPLના અધિકૃત પ્રતિનિધિઓને જિયો-ટેગિંગ અને માહિતીની ચકાસણી માટે જરૂરી સહયોગ આપવાનો રહેશે. આ કામગીરી માટે રાજ્યના ઉદ્યોગ સંગઠનોને પણ સંબંધિત એકમો સુધી માહિતી પહોંચાડવા અને પ્રોજેક્ટના અમલીકરણમાં સહકાર આપવા અનુરોધ કરવામાં આવ્યો છે.
ગુજરાતના મેન્યુફેક્ચરિંગ MSME ક્ષેત્ર માટે GIS આધારિત મેપિંગ દ્વારા તૈયાર થનારો સંકલિત ડેટાબેઝ આગામી સમયમાં માળખાકીય સુવિધાઓના આયોજન, નીતિ ઘડતર અને વિવિધ યોજનાઓના અમલીકરણ માટે મહત્વપૂર્ણ માહિતીનો આધાર બની શકે છે. PM ગતિ શક્તિ પોર્ટલ સાથે આ ડેટાનું એકીકરણ કરીને રાજ્યના MSME ક્ષેત્ર માટે ડેટા આધારિત આયોજન અને નિર્ણય પ્રક્રિયાને વધુ સુદૃઢ બનાવવાનો પ્રયાસ કરવામાં આવી રહ્યો છે.
આ પ્રોજેક્ટના સફળ અમલીકરણ માટે રાજ્યના તમામ સંબંધિત મેન્યુફેક્ચરિંગ MSME એકમો અને ઉદ્યોગ સંગઠનોને GIPL તથા તેના અધિકૃત પ્રતિનિધિઓને જરૂરી સહકાર આપવા અને માંગવામાં આવતી જરૂરી માહિતી ઉપલબ્ધ કરાવવા MSME કમિશનરની કચેરીની યાદીમાં જણાવાયું છે.