જૂનાગઢ જિલ્લામાં 8.81 લાખ નાગરિકોના આયુષ્માન કાર્ડ નોંધાયા, 98.21 ટકા લક્ષ્યાંક પૂર્ણ

જૂનાગઢ, તા.૧૩
ગંભીર બીમારીની સારવાર પાછળ થતો મોટો ખર્ચ સામાન્ય અને મધ્યમવર્ગીય પરિવારો માટે આર્થિક મુશ્કેલી ઊભી કરતો હોય છે. ખાસ કરીને હૃદયરોગ, કેન્સર અને મોટા ઓપરેશન જેવી સારવાર માટે લાખો રૂપિયાનો ખર્ચ થતો હોવાથી અનેક પરિવારોને આર્થિક સંકટનો સામનો કરવો પડે છે. આવી પરિસ્થિતિમાં આયુષ્માન ભારત-પ્રધાનમંત્રી જન આરોગ્ય યોજના હેઠળ પાત્ર નાગરિકોને કેશલેસ સારવારની સુવિધા ઉપલબ્ધ કરાવવામાં આવી રહી છે. જૂનાગઢ જિલ્લામાં આ યોજના અંતર્ગત અત્યાર સુધીમાં 8,81,030 લાભાર્થીઓની નોંધણી પૂર્ણ કરવામાં આવી છે.
વડાપ્રધાન નરેન્દ્રભાઈ મોદીના નેતૃત્વમાં જનસેવાના 25 વર્ષ નિમિત્તે ચાલી રહેલા સેવા સંકલ્પ અભિયાન અંતર્ગત આરોગ્ય ક્ષેત્રે અમલમાં રહેલી વિવિધ યોજનાઓ અને તેના લાભાર્થીઓની વિગતો જાહેર કરવામાં આવી છે. જિલ્લા આરોગ્ય તંત્ર દ્વારા આપવામાં આવેલી માહિતી અનુસાર જૂનાગઢ જિલ્લામાં આયુષ્માન કાર્ડ નોંધણીની કામગીરી નિર્ધારિત લક્ષ્યાંકના 98.21 ટકા સુધી પહોંચી છે.
વર્ષ 2026 દરમિયાન જિલ્લામાં કુલ 8,97,051 લાભાર્થીઓની નોંધણી કરવાનો લક્ષ્યાંક નક્કી કરવામાં આવ્યો હતો. તેની સામે અત્યાર સુધીમાં 8,81,030 લાભાર્થીઓની નોંધણી પૂર્ણ કરવામાં આવી છે. આમ જિલ્લામાં નોંધણી કામગીરીનો મોટો હિસ્સો પૂર્ણ થયો છે, જ્યારે બાકી રહેલા પાત્ર લાભાર્થીઓને પણ યોજનામાં આવરી લેવાની કામગીરી ચાલુ છે.
જૂનાગઢ જિલ્લા મુખ્ય આરોગ્ય અધિકારી ડો. સાલવીના માર્ગદર્શન હેઠળ યોજનાની કામગીરી કરવામાં આવી રહી છે. આ અંગે યોજનાના નોડલ ઓફિસર અને ડિસ્ટ્રિક્ટ ક્વોલિટી એસ્યોરન્સ મેડિકલ ઓફિસર ડો. ડી. આર. વાછાણીએ જણાવ્યું હતું કે, યોજના હેઠળ પાત્ર પરિવારોને વાર્ષિક રૂ.10 લાખ સુધીની વિનામૂલ્યે સારવારનો લાભ આપવામાં આવે છે.
આરોગ્ય વિભાગની માહિતી મુજબ યોજનામાં વિવિધ પ્રકારની બીમારીઓની સારવાર, નિદાન અને ઓપરેશન સંબંધિત ખર્ચનો સમાવેશ કરવામાં આવ્યો છે. દર્દીને હોસ્પિટલમાં નોંધણી, તબીબી પરામર્શ, લેબોરેટરી તપાસ, સર્જરી, ઓપરેશન બાદની સારવાર, દવાઓ, હોસ્પિટલમાં દાખલ થવાનો ખર્ચ, ખોરાક અને જરૂરી ફોલોઅપ જેવી સેવાઓ નિયત જોગવાઈઓ અનુસાર ઉપલબ્ધ કરાવવામાં આવે છે.
આ ઉપરાંત સારવાર માટે યોજનામાં સંલગ્ન હોસ્પિટલ સુધી આવવા-જવાના ખર્ચમાં રાહત મળે તે હેતુથી મુસાફરી સહાયની જોગવાઈ પણ કરવામાં આવી છે. આરોગ્ય વિભાગના જણાવ્યા મુજબ પાત્ર દર્દીને મુસાફરી ખર્ચ પેટે રૂ.300ની સહાય આપવામાં આવે છે.
યોજનાનો લાભ માત્ર સરકારી હોસ્પિટલ પૂરતો મર્યાદિત નથી. જૂનાગઢ જિલ્લાના વિવિધ તાલુકાઓમાં આવેલી યોજના સાથે જોડાયેલી ખાનગી અને ટ્રસ્ટ સંચાલિત હોસ્પિટલોમાં પણ પાત્ર દર્દીઓને સારવારની સુવિધા ઉપલબ્ધ છે. આ ઉપરાંત નિષ્ણાત તબીબી સારવાર આપતી હોસ્પિટલોને પણ યોજનામાં આવરી લેવામાં આવી છે.
વરિષ્ઠ નાગરિકોને આરોગ્ય સુરક્ષા મળી રહે તે માટે આયુષ્માન વય વંદના યોજનાનો પણ અમલ કરવામાં આવી રહ્યો છે. આ યોજના હેઠળ 70 વર્ષ કે તેથી વધુ વયના વરિષ્ઠ નાગરિકોને આવકની મર્યાદા વિના આરોગ્ય કવચનો લાભ આપવામાં આવે છે. આધાર કાર્ડમાં દર્શાવેલી જન્મતારીખના આધારે વયની ચકાસણી કરીને પાત્ર નાગરિકોને વય વંદના કાર્ડ આપવામાં આવે છે.
જિલ્લા આરોગ્ય વિભાગે આપેલી માહિતી અનુસાર વય વંદના યોજના હેઠળ પાત્ર લાભાર્થીઓને રૂ.10 લાખ સુધીની કેશલેસ સારવારનો લાભ ઉપલબ્ધ કરાવવામાં આવે છે. વરિષ્ઠ નાગરિકોને મોટી ઉંમરે સર્જાતી ગંભીર આરોગ્ય સમસ્યાઓની સારવારમાં આ યોજનાથી આર્થિક રાહત મળી રહી હોવાનું આરોગ્ય તંત્રએ જણાવ્યું છે.
આયુષ્માન કાર્ડ મેળવવા ઇચ્છતા પાત્ર નાગરિકો સરકારની અધિકૃત આયુષ્માન ભારત એપનો ઉપયોગ કરી શકે છે. આ ઉપરાંત નજીકના સરકારી આરોગ્ય કેન્દ્રનો સંપર્ક કરીને કાર્ડ નોંધણી, પાત્રતા અને સારવારની સુવિધા અંગે માર્ગદર્શન મેળવી શકાય છે.
જૂનાગઢ જિલ્લામાં યોજનાનો લાભ મેળવનારા દર્દીઓના અનુભવો પણ આરોગ્ય વિભાગ દ્વારા રજૂ કરવામાં આવ્યા છે. જેમાં વડાલ ગામના 72 વર્ષીય પ્રફુલાબેન દોમડીયા, વિસાવદરના ભરતભાઈ નિમાવત અને કેશોદ તાલુકાના મેસવણ ગામના ગિરિશભાઈ ગોરિયાના કિસ્સાઓનો સમાવેશ થાય છે.
જૂનાગઢ તાલુકાના વડાલ ગામમાં રહેતા 72 વર્ષીય પ્રફુલાબેન દોમડીયાને પગમાં અસહ્ય દુખાવો થતો હોવાથી તેઓ સારવાર માટે જૂનાગઢની હોસ્પિટલમાં પહોંચ્યા હતા. તબીબી તપાસ દરમિયાન ડૉક્ટરોએ તેમને ઓપરેશન કરાવવાની સલાહ આપી હતી. આ ઓપરેશનનો અંદાજિત ખર્ચ રૂ.1 લાખ જેટલો થતો હોવાથી પરિવાર સામે આર્થિક મુશ્કેલી ઊભી થઈ હતી.
જોકે આયુષ્માન યોજના હેઠળ પ્રફુલાબેનના ડાબા પગનો ગોળો બદલવાનું ઓપરેશન વિનામૂલ્યે કરવામાં આવ્યું હતું. સારવાર માટે પરિવારને પોતાની પાસેથી ખર્ચ કરવો પડ્યો નહોતો. સફળ ઓપરેશન અને સારવાર મળતાં પ્રફુલાબેન તથા તેમના પરિવારજનોએ સરકાર અને આરોગ્ય તંત્ર પ્રત્યે આભાર વ્યક્ત કર્યો હતો.
આવી જ રીતે વિસાવદરના ભરતભાઈ નિમાવતને છાતીમાં દુખાવો થતાં તેઓ સારવાર માટે રાજકોટની હોસ્પિટલમાં ગયા હતા. ત્યાં એન્જિયોગ્રાફી કરાવતાં તેમના હૃદયની ત્રણ નળીઓમાં બ્લોકેજ હોવાનું સામે આવ્યું હતું. ગંભીર હૃદયરોગની સારવાર માટે ઓપરેશન જરૂરી બન્યું હતું.
ભરતભાઈને આયુષ્માન યોજના હેઠળ હોસ્પિટલમાં વિનામૂલ્યે સારવાર આપવામાં આવી હતી. તેમના હૃદયની નળીઓમાં રહેલા બ્લોકેજની સારવાર કરવામાં આવી હતી અને ઓપરેશનના 15 દિવસ બાદ જરૂરી ફોલોઅપ તપાસ પણ નિઃશુલ્ક કરવામાં આવી હતી. આરોગ્ય વિભાગના જણાવ્યા મુજબ ભરતભાઈને કુલ રૂ.1.60 લાખની સારવારનો લાભ મળ્યો હતો.
સારવાર બાદ ભરતભાઈએ જણાવ્યું હતું કે યોજનાને કારણે તેમને મોટી આર્થિક રાહત મળી છે. હોસ્પિટલના તબીબો અને કર્મચારીઓની કામગીરી પ્રત્યે સંતોષ વ્યક્ત કરતાં તેમણે કહ્યું હતું કે હવે તેઓ ફરી પોતાની રોજિંદી પ્રવૃત્તિઓ કરી રહ્યા છે.
જિલ્લાના કેશોદ તાલુકાના મેસવણ ગામના ગિરિશભાઈ ગોરિયાનો કિસ્સો પણ યોજનાના લાભનું ઉદાહરણ છે. ગિરિશભાઈને કોલોન કેન્સરનું નિદાન થયું હતું. આ ગંભીર બીમારીની સારવાર પાછળ અંદાજે રૂ.5 લાખ જેટલો ખર્ચ થવાનો હોવાથી પરિવાર માટે આટલી મોટી રકમની વ્યવસ્થા કરવી મુશ્કેલ હતી.
આ દરમિયાન ગિરિશભાઈએ આયુષ્માન કાર્ડ મેળવ્યું હતું અને ત્યારબાદ અમદાવાદની સિવિલ કેન્સર હોસ્પિટલમાં સારવાર કરાવી હતી. આરોગ્ય વિભાગના જણાવ્યા અનુસાર તેમનું કેન્સરનું ઓપરેશન અને સંબંધિત સારવાર યોજના હેઠળ સંપૂર્ણપણે વિનામૂલ્યે કરવામાં આવી હતી.
સારવાર બાદ થયેલી તબીબી તપાસના રિપોર્ટ સામાન્ય આવ્યા હોવાનું ગિરિશભાઈએ જણાવ્યું હતું. હાલમાં તેમની તબિયત સારી હોવાનું જણાવતાં તેમણે મુશ્કેલ સમયમાં મળેલી આર્થિક અને તબીબી સહાય બદલ વડાપ્રધાન નરેન્દ્રભાઈ મોદી તથા સરકારનો આભાર વ્યક્ત કર્યો હતો.
આ ત્રણેય કિસ્સાઓમાં અલગ-અલગ પ્રકારની ગંભીર બીમારીઓની સારવાર માટે દર્દીઓને મોટા ખર્ચમાંથી રાહત મળી છે. પ્રફુલાબેનને પગના ઓપરેશનમાં, ભરતભાઈને હૃદયરોગની સારવારમાં અને ગિરિશભાઈને કેન્સરની સારવારમાં આયુષ્માન કાર્ડ ઉપયોગી બન્યું છે.
જિલ્લા આરોગ્ય તંત્રના જણાવ્યા મુજબ આયુષ્માન ભારત-PMJAY અને વય વંદના યોજના દ્વારા પાત્ર નાગરિકોને ગંભીર બીમારીઓની સારવાર માટે આર્થિક સુરક્ષા પૂરી પાડવાનો પ્રયાસ કરવામાં આવી રહ્યો છે. ખાસ કરીને વૃદ્ધો અને આર્થિક રીતે નબળા પરિવારોને હોસ્પિટલના મોટા ખર્ચનો સામનો ન કરવો પડે તે માટે યોજનાની સેવાઓ ઉપલબ્ધ કરાવવામાં આવી રહી છે.
જૂનાગઢ જિલ્લામાં 8.81 લાખથી વધુ લાભાર્થીઓની નોંધણી સાથે આયુષ્માન કાર્ડની કામગીરી 98.21 ટકા સુધી પહોંચી છે. હવે બાકી રહેલા પાત્ર નાગરિકોને પણ યોજનામાં આવરી લેવા અને જરૂરિયાતમંદ દર્દીઓ સુધી સારવારની સુવિધા પહોંચાડવા જિલ્લા આરોગ્ય વિભાગ દ્વારા કામગીરી આગળ વધારવામાં આવી રહી છે.