મગફળી, મગ, અડદ અને સોયાબીનની ટેકાના ભાવે ખરીદી માટે નોંધણી શરૂ, ખેડૂતો 9 ઓક્ટોબર સુધી કરી શકશે અરજી

જૂનાગઢ તા.૧૭
ખેડૂતોને તેમની ઉત્પાદિત ખેતપેદાશોના પોષણક્ષમ ભાવ મળી રહે તે હેતુથી ભારત સરકાર દ્વારા વર્ષ 2026-27 માટે ખરીફ પાકોની ટેકાના ભાવે ખરીદીની પ્રક્રિયા હાથ ધરવામાં આવી છે. મગફળી, મગ, અડદ તથા સોયાબીનના ટેકાના ભાવે વેચાણ માટે ખેડૂતોની ઓનલાઈન નોંધણી શરૂ કરવામાં આવી છે. નોંધણીની પ્રક્રિયા 10 સપ્ટેમ્બર, 2026થી શરૂ થઈ છે અને ખેડૂતો 9 ઓક્ટોબર, 2026 સુધી નોંધણી કરાવી શકશે.
જાહેર કરવામાં આવેલા ટેકાના ભાવ મુજબ ખરીફ પાક મગફળી માટે રૂ.7,517 પ્રતિ ક્વિન્ટલ, મગ માટે રૂ.8,780 પ્રતિ ક્વિન્ટલ, અડદ માટે રૂ.8,200 પ્રતિ ક્વિન્ટલ અને સોયાબીન માટે રૂ.5,708 પ્રતિ ક્વિન્ટલ ટેકાનો ભાવ નક્કી કરવામાં આવ્યો છે.
આ ઉપરાંત ચણા માટે રૂ.5,875 પ્રતિ ક્વિન્ટલ અને રાયડા માટે રૂ.6,200 પ્રતિ ક્વિન્ટલ ટેકાનો ભાવ નક્કી કરવામાં આવ્યો હોવાનું જિલ્લા ખેતીવાડી અધિકારીની યાદીમાં જણાવાયું છે.
ખેડૂતો માટે ઓનલાઈન નોંધણીની સમયમર્યાદા કુલ 30 દિવસની રાખવામાં આવી છે. 10 સપ્ટેમ્બરથી શરૂ થયેલી નોંધણી 9 ઓક્ટોબર સુધી ચાલુ રહેશે. ટેકાના ભાવે પોતાની ખેતપેદાશનું વેચાણ કરવા ઈચ્છતા ખેડૂતોને સમયમર્યાદા પૂર્ણ થાય તે પહેલાં જરૂરી પ્રક્રિયા પૂરી કરવાની અપીલ કરવામાં આવી છે.
નોંધણીની પ્રક્રિયા ખેડૂતો માટે સરળ બને તે માટે ગ્રામ્ય કક્ષાના ઈ-ગ્રામ કેન્દ્રો પરથી સુવિધા ઉપલબ્ધ કરવામાં આવી છે. ખેડૂતો પોતાના નજીકના ઈ-ગ્રામ કેન્દ્ર ખાતે જઈને VCE મારફતે વિનામૂલ્યે ઓનલાઈન નોંધણી કરાવી શકશે.
ઓનલાઈન નોંધણી દરમિયાન ખેડૂતની ઓળખની ચકાસણી માટે આધાર ઓથેન્ટિકેશન ફરજિયાત પ્રક્રિયાનો ભાગ રહેશે. આ માટે L1 POS આધારિત બાયોમેટ્રિક મશીન મારફતે થંબ ઇમ્પ્રેશન એટલે કે અંગૂઠાની છાપનો ઉપયોગ કરી શકાશે. આ ઉપરાંત ફેસ ઓથેન્ટિકેશન દ્વારા પણ ઓળખની ચકાસણી કરીને નોંધણી પૂર્ણ કરવાની સુવિધા આપવામાં આવી છે.
ટેકાના ભાવે ખેતપેદાશનું વેચાણ કરવા માટે નોંધણી કરાવતા પહેલાં ફાર્મર રજીસ્ટ્રેશન એટલે કે ખેડૂત નોંધણી કરાવવી ફરજિયાત કરવામાં આવી છે. જેથી જે ખેડૂતોનું ફાર્મર રજીસ્ટ્રેશન હજુ બાકી હોય તેમણે ટેકાના ભાવની ખરીદી માટે નોંધણી કરતાં પહેલાં આ પ્રક્રિયા પૂર્ણ કરવી જરૂરી રહેશે.
ખાસ કરીને ફાર્મર રજીસ્ટ્રેશનમાં નોંધાયેલા સર્વે નંબરના વિસ્તારને જ ટેકાના ભાવની નોંધણી વખતે ધ્યાનમાં લેવામાં આવનાર હોવાનું જણાવાયું છે. આથી ખેડૂતોના ખેતરના એકથી વધુ સર્વે નંબર હોય તો તમામ સંબંધિત સર્વે નંબર ફાર્મર રજીસ્ટ્રેશનમાં સમાવિષ્ટ છે કે નહીં તેની ખાતરી કરવી જરૂરી છે. કોઈ સર્વે નંબર નોંધણીમાં બાકી હોય તો ટેકાના ભાવની ખરીદી માટે નોંધણી કરતાં પહેલાં તેનો સમાવેશ કરાવવાની સૂચના આપવામાં આવી છે.
મગફળી સહિતના ખરીફ પાકનું ઉત્પાદન કરતા જૂનાગઢ જિલ્લાના ખેડૂતો માટે આ નોંધણી મહત્વપૂર્ણ છે. ટેકાના ભાવે વેચાણનો લાભ લેવા ઈચ્છતા ખેડૂતો છેલ્લી તારીખની રાહ જોયા વિના જરૂરી ફાર્મર રજીસ્ટ્રેશન અને પાક સંબંધિત વિગતો તૈયાર રાખીને ઈ-ગ્રામ કેન્દ્ર મારફતે નોંધણી પૂર્ણ કરી શકે છે.
જિલ્લા ખેતીવાડી અધિકારી દ્વારા જિલ્લાના વધુમાં વધુ ખેડૂતો નિર્ધારિત સમયમર્યાદામાં પોતાની નોંધણી પૂર્ણ કરીને સરકાર દ્વારા જાહેર કરવામાં આવેલા ટેકાના ભાવનો લાભ લે તેવી અપીલ કરવામાં આવી છે.