કાશ્મીરમાં આતંકવાદના ઓનલાઈન નેટવર્ક સામે મોટી કાર્યવાહી, 5 જિલ્લામાં એકસાથે દરોડા

શ્રીનગર તા.8
જમ્મુ-કાશ્મીરમાં આતંકવાદ સામે સુરક્ષા એજન્સીઓએ હવે ઓનલાઈન નેટવર્ક પર પણ નજર વધુ કડક બનાવી છે. કાઉન્ટર ઈન્ટેલિજન્સ કાશ્મીરે શનિવારે ઉત્તર અને દક્ષિણ કાશ્મીરના પાંચ જિલ્લાઓમાં એકસાથે સર્ચ ઓપરેશન હાથ ધરીને આતંકવાદી પ્રવૃત્તિઓ સાથે સંભવિત રીતે જોડાયેલા લોકોની તપાસ શરૂ કરી છે. બારામુલા, શોપિયાં, અનંતનાગ, કુપવાડા અને બાંદીપોરામાં કરવામાં આવેલા આ દરોડા એક FIRના આધારે હાથ ધરાયા હોવાનું અધિકારીઓએ જણાવ્યું છે. તપાસ એજન્સીઓને શંકા છે કે કેટલાક લોકો સોશિયલ મીડિયા અને અન્ય ઓનલાઈન માધ્યમોનો ઉપયોગ કરીને આતંકવાદી સંગઠનોની વિચારધારાનો પ્રચાર કરી રહ્યા હતા અને યુવાનોને કટ્ટર વિચારધારા તરફ પ્રભાવિત કરવાનો પ્રયાસ થઈ રહ્યો હતો. આ ઉપરાંત યુવાનોને આતંકવાદી સંગઠનો સાથે જોડવા માટેની સંભવિત ભરતી પ્રક્રિયા અને સ્લીપર સેલ તથા ઓવરગ્રાઉન્ડ વર્કર્સ સાથેના સંપર્કોની પણ તપાસ કરવામાં આવી રહી છે.
સુરક્ષા એજન્સીઓના જણાવ્યા પ્રમાણે, તાજેતરની આતંકવાદી ઘટનાઓ બાદ કાશ્મીર ઘાટીમાં તપાસનો વ્યાપ વધારવામાં આવ્યો છે. અત્યાર સુધીમાં આશરે 5,000 લોકોની પૂછપરછ કરવામાં આવી હોવાનું અધિકારીઓનું કહેવું છે. આ પૂછપરછ દરમિયાન આતંકવાદી નેટવર્ક સાથે સંભવિત રીતે જોડાયેલા સ્લીપર સેલ અને ઓવરગ્રાઉન્ડ વર્કર્સ અંગે માહિતી મળ્યા બાદ વિવિધ સ્થળોએ સર્ચ કરવામાં આવ્યું હોવાનું જણાવાયું છે. કાઉન્ટર ઈન્ટેલિજન્સ કાશ્મીરે સ્થાનિક પોલીસ સાથે મળીને હાથ ધરેલી આ કાર્યવાહી દરમિયાન કુપવાડામાં બાબર ડારના રહેણાંક સ્થળે પણ તપાસ કરી હતી. તપાસ એજન્સીઓના આરોપ મુજબ, સિમ કાર્ડના કથિત દુરુપયોગ મારફતે સોશિયલ મીડિયા પર ભ્રામક નેરેટિવ ફેલાવવાનો પ્રયાસ કરવામાં આવ્યો હતો. બાંદીપોરામાં અબ્દુલ રશીદ ડારની પુત્રી લાલીના ઘરે, પાટણમાં અબરાર નબી અહેમદના રહેણાંક સ્થળે અને શોપિયાંમાં ગુલઝાર અહેમદ વાની સાથે સંકળાયેલા સ્થળે પણ દરોડા પાડવામાં આવ્યા હતા. અધિકારીઓના જણાવ્યા પ્રમાણે ગુલઝાર અહેમદ વાનીનો પુત્ર ઉસ્માન ગુલઝાર અગાઉથી જ જેલમાં છે અને તેની સામે આર્મ્સ એક્ટ, IPC તથા UAPA હેઠળ કાર્યવાહી કરવામાં આવી હોવાનું જણાવાયું છે. હવે તપાસ એજન્સીઓ કથિત ડિજિટલ રેડિકલાઈઝેશન નેટવર્ક ઉપરાંત આતંકવાદ માટે નાણાંકીય મદદ પહોંચાડતી સંભવિત કડીઓની પણ તપાસ કરી રહી છે.
આ દરમિયાન દક્ષિણ કાશ્મીરના કુલગામમાં પ્રવાસી શ્રમિકો પર થયેલા હુમલાએ પણ સુરક્ષા ચિંતામાં વધારો કર્યો છે. શુક્રવારે કુલગામથી આશરે 20 કિલોમીટર દૂર કેલામ વિસ્તારમાં એક ઈંટ-ભઠ્ઠા પર કામ કરતા છત્તીસગઢના બે શ્રમિકોને ગોળી મારવામાં આવી હતી. આ હુમલામાં 24 વર્ષીય દીપક રાત્રેનું મોત થયું હતું, જ્યારે 28 વર્ષીય ભૂપેન્દ્ર ગંભીર રીતે ઘાયલ થયો હતો. ઘાયલ શ્રમિકને સારવાર માટે શ્રીનગરની SKIMS હોસ્પિટલમાં ખસેડવામાં આવ્યો હતો. પોલીસ સૂત્રોના જણાવ્યા અનુસાર, હુમલા પહેલાં આતંકવાદીઓએ ત્યાં હાજર શ્રમિકોના નામ પૂછ્યા હતા અને ત્યારબાદ બે હિંદુ શ્રમિકોને અલગ કરીને તેમના પર ગોળીબાર કર્યો હોવાની પ્રાથમિક માહિતી મળી છે. ઘટનાસ્થળે 3થી 4 રાઉન્ડ ફાયરિંગ થયું હોવાનું પણ સામે આવ્યું છે. હુમલા બાદ સુરક્ષા દળોએ સમગ્ર વિસ્તારને ઘેરી લીધો હતો અને વાહનોની તપાસ સાથે હુમલાખોરોની શોધખોળ શરૂ કરી હતી. પ્રાથમિક તપાસમાં હુમલાખોરોએ ઘટનાસ્થળની અગાઉથી રેકી કરી હોવાની આશંકા પણ વ્યક્ત કરવામાં આવી રહી છે.
તપાસ સાથે જોડાયેલા સૂત્રોના જણાવ્યા પ્રમાણે, આ હુમલામાં એક સ્થાનિક અને એક વિદેશી આતંકવાદીની સંડોવણી હોવાની શક્યતા તપાસવામાં આવી રહી છે અને મોહમ્મદ લતીફ નામના શંકાસ્પદ વ્યક્તિની ભૂમિકા પણ તપાસ હેઠળ હોવાનું જણાવાયું છે. જોકે, આ અંગે હજુ સુધી કોઈ સત્તાવાર પુષ્ટિ કરવામાં આવી નથી. કાશ્મીરમાં ઓગસ્ટથી નવેમ્બર દરમિયાન સફરજનની લણણીની સિઝન રહે છે અને આ સમયગાળા દરમિયાન મોટી સંખ્યામાં પ્રવાસી શ્રમિકો અહીં કામ માટે આવે છે. આવી સ્થિતિમાં શ્રમિકોને નિશાન બનાવતી ઘટનાઓથી બાગાયત ક્ષેત્ર અને બહારથી આવતા કામદારોમાં ચિંતા વધી શકે છે. એક તરફ સુરક્ષા એજન્સીઓ જમીની સ્તરે આતંકવાદી નેટવર્ક અને સંભવિત સ્લીપર સેલ સામે કાર્યવાહી કરી રહી છે, તો બીજી તરફ સોશિયલ મીડિયા મારફતે યુવાનોને પ્રભાવિત કરવાના કથિત પ્રયાસો સામે પણ તપાસનો દોર શરૂ કરવામાં આવ્યો છે. હાલ પાંચ જિલ્લાઓમાં હાથ ધરાયેલી કાર્યવાહી અને કુલગામ હુમલાની તપાસ બંનેમાં સુરક્ષા એજન્સીઓ વધુ કડીઓ મેળવવા માટે તપાસ આગળ ધપાવી રહી છે.