કેશોદમાં જૂની અદાવતમાં હુમલાથી ઘવાયેલા વૃદ્ધનું ચાર મહિના બાદ મોત, આરોપી સામે હત્યાની કલમ ઉમેરવા તજવીજ

જુનાગઢ તા.21
કેશોદ તાલુકામાં જૂની અદાવતને લઈને થયેલા કથિત જીવલેણ હુમલામાં ગંભીર રીતે ઘવાયેલા વૃદ્ધનું લાંબી સારવાર બાદ મૃત્યુ થતાં હવે સમગ્ર કેસમાં મહત્વપૂર્ણ વળાંક આવ્યો છે. બામણાસા ઘેડ ગામના દેવાયતભાઈ મંગાભાઈ માકડીયા પર જૂન મહિનામાં હુમલો થયો હતો. ત્યારથી તેમની અલગ-અલગ હોસ્પિટલોમાં સારવાર ચાલી રહી હતી. આશરે ચાર મહિનાની સારવાર બાદ તેમનું મૃત્યુ થતાં કેશોદ પોલીસે અગાઉ નોંધાયેલા હત્યાની કોશિશના ગુનામાં હવે હત્યાની કલમ BNS-103 ઉમેરવા કોર્ટમાં રિપોર્ટ કરવાની કાર્યવાહી હાથ ધરી છે.
આ બનાવ 7 જૂન 2026ના રોજ કેશોદ તાલુકાના જોનપુર અને જવાહરનગર ગામ વચ્ચે બન્યો હતો. ફરિયાદ મુજબ દેવાયતભાઈ કેશોદ કોર્ટમાં ચાલી રહેલા કેસની તારીખની કાર્યવાહી પૂર્ણ કરીને છકડો રિક્ષામાં પોતાના ઘરે પરત ફરી રહ્યા હતા. આ દરમિયાન જૂની અદાવતના કારણે તેમના પર હુમલો કરવામાં આવ્યો હોવાનો આરોપ છે.
ફરિયાદમાં આરોપ મૂકવામાં આવ્યો હતો કે ઇન્ડિયન આર્મીમાં ફરજ બજાવતા ઈન્દ્રજીત ઉર્ફે ઇન્દ્રેશ અર્જણભાઈ વડીયાતરે મોટરસાઇકલ રિક્ષાની આગળ ઊભી રાખી હતી. ત્યારબાદ દેવાયતભાઈને રિક્ષામાંથી નીચે ઉતારી લોખંડના પાઇપ, સરિયા અને છરી જેવા હથિયારોથી હુમલો કરવામાં આવ્યો હોવાનો આરોપ છે.
હુમલામાં દેવાયતભાઈને હાથ-પગ સહિત શરીરના વિવિધ ભાગોમાં ગંભીર ઈજાઓ પહોંચી હતી. માથાના ભાગે પણ ગંભીર ઈજા થઈ હોવાનું ફરિયાદમાં જણાવાયું હતું. હુમલા બાદ તેમને ગંભીર હાલતમાં રસ્તા નજીક છોડીને આરોપી ત્યાંથી ચાલ્યો ગયો હોવાનો પણ આક્ષેપ કરવામાં આવ્યો હતો.
આ ઘટના અંગે દેવાયતભાઈના પુત્ર લલિતભાઈ દ્વારા કેશોદ પોલીસ સ્ટેશનમાં ફરિયાદ નોંધાવવામાં આવી હતી. ગંભીર રીતે ઘવાયેલા દેવાયતભાઈને સારવાર માટે અલગ-અલગ હોસ્પિટલોમાં ખસેડવામાં આવ્યા હતા. જૂનાગઢ સિવિલ હોસ્પિટલ બાદ રાજકોટ અને ત્યારબાદ વધુ સારવાર માટે અમદાવાદ સિવિલ હોસ્પિટલ લઈ જવામાં આવ્યા હતા. લાંબા સમય સુધી સારવાર ચાલુ રહ્યા બાદ તેમનું મૃત્યુ થયું હોવાનું પોલીસે જણાવ્યું છે.
ડીવાયએસપી હિતેશ ધાંધલિયાના જણાવ્યા મુજબ, આ કેસમાં મૃતક દેવાયતભાઈ અને આરોપી વચ્ચે અગાઉના વિવાદની બાબત પણ તપાસમાં સામે આવી હતી. પોલીસના જણાવ્યા પ્રમાણે દેવાયતભાઈએ અગાઉ આરોપીના પિતા અર્જણભાઈ વિરુદ્ધ ગુનો નોંધાવ્યો હતો. આ બાબતનું મનદુઃખ રાખીને હુમલો કરવામાં આવ્યો હોવાનો આરોપ ફરિયાદ અને તપાસમાં કરવામાં આવ્યો છે.
ઘટના બાદ કેશોદ પોલીસ સ્ટેશનમાં શરૂઆતમાં હત્યાની કોશિશ સહિતની લાગુ પડતી કલમો હેઠળ ગુનો નોંધવામાં આવ્યો હતો. આરોપી ઈન્દ્રજીત અર્જણભાઈ વડીયાતર આર્મીમાં ફરજ બજાવતો હોવાથી કેસમાં જરૂરી પ્રક્રિયા અને પુરાવા એકત્ર કરીને પોલીસ દ્વારા કોર્ટમાં ચાર્જશીટ પણ રજૂ કરી દેવામાં આવી હોવાનું ડીવાયએસપીએ જણાવ્યું છે. આરોપી હાલમાં જેલમાં હોવાનું પણ પોલીસે જણાવ્યું છે.
હવે હુમલામાં ઘવાયેલા દેવાયતભાઈનું સારવાર દરમિયાન મૃત્યુ થતાં કેસની કાનૂની સ્થિતિ બદલાઈ છે. કેશોદ પોલીસના તપાસ અધિકારી દ્વારા અગાઉ નોંધાયેલા ગુનામાં ભારતીય ન્યાય સંહિતાની હત્યા સંબંધિત કલમ BNS-103નો ઉમેરો કરવા માટે કોર્ટ સમક્ષ રિપોર્ટ રજૂ કરવાની કાર્યવાહી હાથ ધરવામાં આવશે.
આ સાથે દેવાયતભાઈના મૃત્યુ અને અગાઉ થયેલા હુમલા વચ્ચેના સંબંધ સહિત જરૂરી તબીબી અને અન્ય પુરાવાઓને તપાસનો ભાગ બનાવી આગળની કાયદેસરની કાર્યવાહી કરવામાં આવશે. આરોપી સામેના તમામ આક્ષેપો હાલ ન્યાયિક પ્રક્રિયાનો વિષય છે અને અંતિમ નિર્ણય કોર્ટ દ્વારા કરવામાં આવશે.