ગ્રીસ, સ્પેન, ફ્રાન્સમાં વ્યાપક દેખાવો : હજારોની ધરપકડ
saurashtrabhoomi 
(એજન્સી) એથેન્સ, તા. ૨૨ :
ગ્રીસની રાજધાની એથેન્સ સહિત અનેક શહેરોમાં હજારો વિદ્યાર્થીઓ, શિક્ષકો અને નાગરિકોએ શિક્ષણ વ્યવસ્થાની સમસ્યાઓ સામે વિરોધપ્રદર્શન યોજ્યાં હતાં. જોકે એથેન્સમાં મોટા પાયે હિંસા અને પોલીસ સાથે વ્યાપક અથડામણ થઈ હોવાના સોશિયલ મીડિયાના દાવાને તાજા વિશ્વસનીય અહેવાલો સમર્થન આપતા નથી.
યુરોપમાં મોંઘવારી અને શિક્ષણ વ્યવસ્થાને લઈને વધી રહેલા અસંતોષ વચ્ચે ગ્રીસમાં બુધવારે હજારો વિદ્યાર્થીઓ અને શિક્ષકો રસ્તા ઉપર ઊતર્યા હતા. રાજધાની એથેન્સમાં અંદાજે ૧૦ હજાર લોકોએ સંસદ સુધી રેલી યોજી હતી.
વિરોધપ્રદર્શન દરમિયાન શિક્ષણ પાછળ સરકારી ખર્ચ વધારવા, શિક્ષકોની ખાલી જગ્યાઓ ભરવા, શાળાની ઇમારતોમાં સુધારા કરવા અને શિક્ષકોના પગારમાં વધારો કરવાની માંગણી કરવામાં આવી હતી.
સ્પેનના આ કોરુન્યા શહેરમાં વોક્સ પક્ષના નેતા સાન્તિયાગો અબાસ્કલના કાર્યક્રમ સામે હજારો લોકો એકત્ર થયા હતા. વિરોધપ્રદર્શન દરમિયાન પોલીસ અને કેટલાક પ્રદર્શનકારીઓ વચ્ચે અથડામણ થતાં પોલીસે કાર્યવાહી કરી હતી. બેની ધરપકડ કરવામાં આવી હતી.
સ્પેનના ગેલિસિયા પ્રદેશના આ કોરૂન્યા શહેરમાં બુધવારે રાજકીય તણાવ વચ્ચે હિંસક અથડામણોની ઘટના બની હતી.
ફ્રાન્સમાં ૧૭ ઓક્ટોબરે થયેલી વ્યાપક હિંસા બાદ સુરક્ષા વ્યવસ્થા સઘન બનાવવામાં આવી છે. અત્યાર સુધીમાં હજારો લોકોની ધરપકડના અહેવાલ છે. આગામી વિરોધપ્રદર્શન દરમિયાન ફરી હિંસા ન થાય તે માટે સરકાર તૈયારી કરી રહી છે.
ફ્રાન્સના વિવિધ શહેરોમાં થયેલી હિંસાને પગલે રાષ્ટ્રપતિ મેક્રોનની સરકાર સામે કાયદો અને વ્યવસ્થા જાળવવાનો મોટો પડકાર ઊભો થયો છે.
મોંઘવારી, શિક્ષણની સમસ્યાઓ અને જાહેર સેવાઓમાં કાપ સામે શરૂ થયેલા વિરોધપ્રદર્શનો દરમિયાન પેરિસ સહિત અનેક શહેરોમાં પોલીસ અને વિરોધીઓ વચ્ચે અથડામણો થઈ હતી. અનેક વાહનો તથા જાહેર મિલકતોને આગ ચાંપવામાં આવી હતી અને દુકાનોમાં લૂંટફાટની ઘટનાઓ નોંધાઈ હતી.
