હેલોવીન પર જાન્હવી કપૂરનો અનોખો અંદાજ વાયરલ, માતા શ્રીદેવીનો ‘નગીના’ લૂક રીક્રિએટ કરી આપી ભાવભીની ટ્રિબ્યુટ
ઓરીએ ઋષિ કપૂરનો લૂક અપનાવ્યો; તસવીરો અને વીડિયોએ સોશિયલ મીડિયા પર ખેંચ્યું ધ્યાન, બહેન ખુશીએ પણ કરી પ્રશંસા
saurashtrabhoomi 
મુંબઈ, તા. ૨
હેલોવીનના અવસરે બોલિવૂડ અભિનેત્રી જાન્હવી કપૂરે પોતાની દિવંગત માતા અને દિગ્ગજ અભિનેત્રી શ્રીદેવીને અનોખી રીતે યાદ કરી છે. જાન્હવીએ શ્રીદેવીની સુપરહિટ ફિલ્મ ‘નગીના’નો આઇકોનિક લૂક રીક્રિએટ કરીને માતાને ખાસ ટ્રિબ્યુટ આપી છે. તેના આ ખાસ અંદાજની તસવીરો અને વીડિયો સોશિયલ મીડિયા પર ઝડપથી વાયરલ થઈ રહ્યાં છે.
જાન્હવીએ પોતાના ઈન્સ્ટાગ્રામ એકાઉન્ટ પર આ લૂકની તસવીરો શેર કરી હતી. આ પ્રસંગે તેની સાથે સોશિયલ મીડિયા પર જાણીતા ઓરી પણ જોવા મળ્યો હતો, જેણે ફિલ્મમાં ઋષિ કપૂરે ભજવેલા પાત્રને અનુરૂપ લૂક અપનાવ્યો હતો. બંનેએ ફિલ્મની કેટલીક યાદગાર ક્ષણોને ફરી જીવંત કરવાનો પ્રયાસ કર્યો હતો. આ તસવીરો અને વીડિયોને ચાહકો તરફથી પણ સારો પ્રતિસાદ મળી રહ્યો છે.
જાન્હવીએ જણાવ્યું હતું કે તે ફિલ્મની સૌથી યાદગાર ક્ષણોમાંથી એકને ફરીથી રજૂ કરવા માગતી હતી. તેના આ લૂક દ્વારા તેણે માત્ર પોતાની માતા શ્રીદેવીને જ નહીં, પરંતુ ફિલ્મ સાથે જોડાયેલા ઋષિ કપૂર અને અમરીશ પુરીને પણ યાદ કર્યા હતા. હેલોવીન પર હવે લોકો માત્ર ડરામણાં પોશાક જ નથી પહેરતા, પરંતુ પોતાના મનપસંદ ફિલ્મી પાત્રો અને યાદગાર દૃશ્યોને પણ ફરીથી રજૂ કરે છે.
જાન્હવીની આ તસવીરો પર તેની બહેન ખુશી કપૂરે પણ પ્રતિક્રિયા આપી હતી. ખુશીએ કોમેન્ટમાં લખ્યું હતું, “તેં હેલોવીન જીતી લીધું.” આ પ્રતિક્રિયા બાદ સોશિયલ મીડિયા પર જાન્હવીના લૂકની વધુ ચર્ચા થઈ રહી છે.
ઉલ્લેખનીય છે કે ફિલ્મ ‘નગીના’ ૨૮ નવેમ્બર, ૧૯૮૬ના રોજ રિલીઝ થઈ હતી. હરમેશ મલ્હોત્રાના નિર્દેશનમાં બનેલી આ ફિલ્મમાં શ્રીદેવીએ રજની નામની ઈચ્છાધારી નાગિનની ભૂમિકા ભજવી હતી, જ્યારે ઋષિ કપૂરે રાજીવનું પાત્ર ભજવ્યું હતું. ફિલ્મમાં અમરીશ પુરી, સુષમા સેઠ અને પ્રેમ ચોપરા પણ મહત્ત્વની ભૂમિકામાં હતાં. રિલીઝ બાદ ફિલ્મને દર્શકોનો સારો પ્રતિસાદ મળ્યો હતો અને તે વર્ષની સૌથી વધુ કમાણી કરનારી ભારતીય ફિલ્મોમાં સ્થાન પામી હતી.
ફેબ્રુઆરી ૨૦૧૮માં દુબઈમાં શ્રીદેવીનું નિધન થયું હતું. જોકે, તેમની ફિલ્મો અને યાદગાર પાત્રો આજે પણ ચાહકોના દિલમાં જીવંત છે. જાન્હવી કપૂરે હેલોવીન પર ‘નગીના’નો લૂક અપનાવીને માતાની યાદોને ફરી તાજી કરી છે.
