પશ્ચિમ એશિયા વિસ્તારમાં યુધ્ધના વાદળો ઘેરાયા ક્રુડ ઓઈલના ભાવમાં ભડકો : શેરબજારમાં કડાકો
saurashtrabhoomi 
નવી દિલ્હી તા.18:
પશ્ચિમ એશિયામાં વધતા તણાવ અને ક્રૂડ ઓઇલના ભાવમાં વધારાને કારણે આજે સ્થાનિક શેરબજારમાં ભારે ઘટાડો થયો છે. શરૂઆતના કારોબારમાં સેન્સેક્સ 1,036 પોઈન્ટથી વધુ ઘટ્યો હતો, જ્યારે નેશનલ સ્ટોક એક્સચેન્જ નિફટી 321 પોઈન્ટથી વધુ ઘટ્યો હતો. આ દરમિયાન, ડોલર સામે રૂપિયો પણ અત્યાર સુધીના સૌથી નીચા સ્તરે પહોંચી ગયો હતો. સવારે 10 વાગ્યે, સેન્સેક્સ 1,036 પોઈન્ટ અથવા 1.34% ઘટીને 74,201 પર ટ્રેડ કરી રહ્યો હતો. નિફટી 321 પોઈન્ટ અથવા 1.28% ઘટીને 23,322 પર ટ્રેડ કરી રહ્યો હતો. આ ઘટાડાને કારણે, લિસ્ટેડ કંપનીઓનું માર્કેટ કેપ 7 લાખ કરોડ રૂપિયા ઘટીને 454 લાખ કરોડ રૂપિયા થઈ ગયું. શરૂઆતના કારોબારમાં, સેન્સેક્સના 30 માંથી 27 શેરોમાં ઘટાડો થયો હતો, જેમાં પાવરગ્રીડને 3.81%નો સૌથી મોટો ઘટાડો જોવા મળ્યો હતો. ટાટા સ્ટીલ, મારુતિ, ટાઇટન, બજાજ ફાઇનાન્સ, એચડીએફસી બેંક, બજાજ ફિનસર્વ અને મહિન્દ્રા એન્ડ મહિન્દ્રાના શેરમાં પણ નોંધપાત્ર ઘટાડો થયો હતો. આ દરમિયાન, ઇન્ફોસિસ, ટેક મહિન્દ્રા અને ટીસીએસના શેરમાં વધારો જોવા મળ્યો હતો.
