‘કજરા રે 2.0’ માટે તૈયાર અભિષેક બચ્ચન, કહ્યું- ‘પહેલા ઐશ્વર્યા અને પિતાને મનાવવા પડશે’
‘બંટી ઔર બબલી’ના સુપરહિટ ગીતના શૂટિંગની યાદો અભિષેકે કરી તાજી; કહ્યું- ચાર કલાક સુધી ડાન્સ પાર્ટી જેવો હતો માહોલ, સેટ પર જ ઉજવાયો હતો જન્મદિવસ
saurashtrabhoomi 
મુંબઈ, તા.૩
અમિતાભ બચ્ચન, અભિષેક બચ્ચન અને ઐશ્વર્યા રાય બચ્ચન પર ફિલ્માવવામાં આવેલું વર્ષ 2005ની ફિલ્મ ‘બંટી ઔર બબલી’નું લોકપ્રિય ગીત ‘કજરા રે’ આજે પણ દર્શકોમાં એટલું જ લોકપ્રિય છે. હવે અભિષેક બચ્ચને આ ગીતના શૂટિંગ સાથે જોડાયેલી કેટલીક યાદો શેર કરતાં રસપ્રદ ખુલાસા કર્યા છે. એટલું જ નહીં, તેણે ‘કજરા રે 2.0’ માટે પણ પોતાની તૈયારી દર્શાવી છે.
અભિષેકના જણાવ્યા પ્રમાણે ‘કજરા રે’નું શૂટિંગ તેના માટે અત્યાર સુધીના સૌથી મજેદાર શૂટિંગ અનુભવ પૈકીનું એક હતું. સેટ પર એવો માહોલ હતો કે કલાકારોને એવું લાગતું જ નહોતું કે તેઓ કોઈ ફિલ્મના ગીતનું શૂટિંગ કરી રહ્યા છે. તેના બદલે જાણે કલાકો સુધી ડાન્સ પાર્ટી ચાલી રહી હોય તેવો અનુભવ થયો હતો.
અભિષેકે યાદ કરતાં જણાવ્યું કે ગીતના શૂટિંગ દરમિયાન તેનો જન્મદિવસ પણ આવ્યો હતો અને સેટ પર જ તેની ઉજવણી કરવામાં આવી હતી. દિગ્દર્શક શાદ અલીએ ગીત વગાડ્યું અને કલાકારોને લગભગ ચાર કલાક સુધી પોતાની રીતે ડાન્સ અને મસ્તી કરવાની તક આપી હતી. આ દરમિયાન કરવામાં આવેલી મસ્તી અને ડાન્સની કેટલીક ક્ષણોને બાદમાં ગીતના ફાઇનલ વર્ઝનમાં પણ સામેલ કરવામાં આવી હતી.
આ જ સહજતા ‘કજરા રે’માં અમિતાભ, અભિષેક અને ઐશ્વર્યાની ઓનસ્ક્રીન કેમિસ્ટ્રીમાં પણ જોવા મળી હતી. અભિષેક માટે આ અનુભવ એટલો યાદગાર રહ્યો કે બે દાયકા બાદ પણ તેણે ગીતના શૂટિંગને ડાન્સ પાર્ટી સાથે સરખાવ્યું છે.
આ દરમિયાન અભિષેકને ‘કજરા રે 2.0’ અંગે પણ પૂછવામાં આવ્યું હતું. શું તે અમિતાભ બચ્ચન અને ઐશ્વર્યા રાય સાથે ફરી આ પ્રકારનું ગીત કરવા તૈયાર છે તેવા સવાલના જવાબમાં અભિષેકે સકારાત્મક પ્રતિક્રિયા આપી હતી. તેણે કહ્યું કે તેને આવું કરવું ચોક્કસ ગમશે, પરંતુ તેના માટે પહેલાં ઐશ્વર્યા અને પોતાના પિતા અમિતાભ બચ્ચનને મનાવવા પડશે.
‘કજરા રે’ના નિર્માણ સાથે જોડાયેલી કેટલીક જૂની વાતો પણ રસપ્રદ રહી છે. ગીતને શંકર-એહસાન-લોયે સંગીત આપ્યું હતું, જ્યારે અલિશા ચિનોય, શંકર મહાદેવન અને જાવેદ અલીએ તેને અવાજ આપ્યો હતો. ગીતની કોરિયોગ્રાફી વૈભવી મર્ચન્ટે કરી હતી.
જોકે બાદમાં આ ગીત જબરદસ્ત લોકપ્રિય બન્યું, પરંતુ શરૂઆતમાં મેકર્સને પણ તેની સફળતા અંગે એટલો વિશ્વાસ નહોતો. આપેલી માહિતી પ્રમાણે માર્કેટિંગ ટીમના આંતરિક મૂલ્યાંકનમાં પણ શરૂઆતમાં ગીતને ટોચનું સ્થાન મળ્યું નહોતું. દિગ્દર્શક શાદ અલીએ અગાઉ જણાવ્યું હતું કે અમિતાભ બચ્ચન પણ શરૂઆતમાં ગીતને લઈને સંપૂર્ણપણે સહમત નહોતા અને તેમણે તેને શૂટ ન કરવાની સલાહ આપી હતી.
જોકે આખરે ગીતનું શૂટિંગ કરવામાં આવ્યું અને પરિણામે ‘કજરા રે’ ફિલ્મના સૌથી યાદગાર ગીતોમાં સ્થાન મેળવવામાં સફળ રહ્યું. ગીતમાં ત્રણેય કલાકારોનો અલગ અંદાજ પણ તેની ખાસિયત રહ્યો હતો. અભિષેક બચ્ચનની મસ્તી, ઐશ્વર્યા રાયની ડાન્સ સ્ટાઇલ અને અમિતાભ બચ્ચનની આગવી હાજરીએ ગીતને વિશેષ ઓળખ આપી હતી.
વર્ષ 2005માં રિલીઝ થયેલી ‘બંટી ઔર બબલી’ને બે દાયકાથી વધુ સમય થઈ ગયો હોવા છતાં ‘કજરા રે’ની લોકપ્રિયતા યથાવત છે. હવે અભિષેક બચ્ચને ‘કજરા રે 2.0’ માટે પોતાની તૈયારી દર્શાવતાં ફરી એકવાર અમિતાભ, અભિષેક અને ઐશ્વર્યાની આ યાદગાર ત્રિપુટીને એકસાથે જોવા મળશે કે નહીં તેને લઈને ચાહકોમાં ઉત્સુકતા વધી શકે છે.
