ખોટા રોકાણથી રાતોરાત કંગાળ થયા હતા અનુપમ ખેરના ભાઈ રાજુ ખેર, કહ્યું- ‘રસ્તા પર આવી ગયો, ભાઈ પાસે પણ પૈસા નહોતા’

મુંબઈ, તા.૫
જાણીતા અભિનેતા અનુપમ ખેરના નાના ભાઈ અને અભિનેતા-દિગ્દર્શક રાજુ ખેરે પોતાના જીવનના અત્યંત મુશ્કેલ સમય અંગે ખુલાસો કર્યો છે. ફિલ્મો અને ટેલિવિઝન સીરિયલ્સમાં કામ કરી ચૂકેલા રાજુ ખેરે તાજેતરના એક પોડકાસ્ટમાં જણાવ્યું કે એક ખોટા રોકાણના નિર્ણયને કારણે તેમની જીવનભરની જમાપૂંજી ડૂબી ગઈ હતી અને તેઓ એવી આર્થિક મુશ્કેલીમાં મુકાયા હતા કે નવા ઘરના હપ્તા ભરવા માટે પણ પૈસા બચ્યા નહોતા.
રાજુ ખેરના જણાવ્યા પ્રમાણે તે સમયે એક નવી ટીવી ચેનલ શરૂ થવાની તૈયારી ચાલી રહી હતી. આ પ્રોજેક્ટ સાથે ઘણા મોટા લોકો જોડાઈ રહ્યા હોવાથી તેમને પણ તેમાં સારી તક દેખાઈ હતી. આ દરમિયાન તેમણે પોતાનું જૂનું ઘર વેચી દીધું હતું અને એક નવા ફ્લેટનું બુકિંગ પણ કરાવ્યું હતું.
જૂનું ઘર વેચ્યા બાદ તેમની પાસે જે જમાપૂંજી બચી હતી તેનો મોટો હિસ્સો તેમણે નવી ચેનલ માટે તૈયાર થઈ રહેલા એક કાર્યક્રમમાં રોકી દીધો હતો. રાજુ ખેરના જણાવ્યા પ્રમાણે આ કાર્યક્રમનું નામ ‘લાઈફ કે લિયે કુછ ભી કરેગા’ હતું.
તે સમયે તેમને વિશ્વાસ હતો કે કાર્યક્રમ સફળ થશે તો તેમની આર્થિક સ્થિતિ સંપૂર્ણપણે બદલાઈ જશે. તેઓ એક મોટા ઘરમાં પરિવાર સાથે રહેવાનું સપનું જોઈ રહ્યા હતા, જ્યાં પરિવારના દરેક સભ્ય માટે અલગ રૂમ હોય અને લાંબા સમયથી ચાલી રહેલી આર્થિક મુશ્કેલીઓનો પણ અંત આવે.
જોકે તેમની અપેક્ષાથી બિલકુલ વિપરીત ઘટના બની. રાજુ ખેરના જણાવ્યા પ્રમાણે ચેનલ શરૂ થાય તે પહેલાં જ અચાનક બંધ થઈ ગઈ અને તેમણે કરેલું રોકાણ ડૂબી ગયું. આ ઘટનાએ તેમની આર્થિક સ્થિતિને ગંભીર રીતે અસર કરી. નવા ફ્લેટના હપ્તા કેવી રીતે ભરવા તે સૌથી મોટો પ્રશ્ન બની ગયો હતો.
આ મુશ્કેલ સમયમાં રાજુ ખેરને લાગ્યું હતું કે તેમના મોટા ભાઈ અનુપમ ખેર તેમને આર્થિક સંકટમાંથી બહાર કાઢી શકશે. પરંતુ તેમના કહેવા પ્રમાણે તે સમયે અનુપમ ખેરની પોતાની આર્થિક સ્થિતિ પણ સારી નહોતી અને તેમની પાસે મદદ કરવા માટે પૂરતા પૈસા નહોતા.
રાજુએ સ્વીકાર્યું કે શરૂઆતમાં તેમને આ વાતનું દુઃખ થયું હતું. સગા ભાઈ હોવા છતાં મુશ્કેલીના સમયે મદદ ન મળી રહી હોવાની લાગણી તેમના મનમાં હતી. જોકે થોડા સમય બાદ બનેલી એક ઘટનાએ અનુપમ ખેર અને તેમની પરિસ્થિતિ પ્રત્યેનો રાજુનો દૃષ્ટિકોણ બદલી નાખ્યો હતો.
રાજુ ખેરના જણાવ્યા પ્રમાણે એક દિવસ તેઓ એક મેગેઝિન વાંચી રહ્યા હતા. તેમાં અનુપમ ખેરનો એક ઇન્ટરવ્યૂ પ્રકાશિત થયો હતો. આ મુલાકાતમાં અનુપમ ખેરે પોતાનું સંતાન ન હોવા અંગેની લાગણી વ્યક્ત કરી હતી. આ વાત વાંચ્યા બાદ રાજુને પહેલીવાર સમજાયું કે તેઓ પોતાના સંકટમાં એટલા વ્યસ્ત હતા કે મોટા ભાઈના અંગત જીવનમાં ચાલી રહેલી લાગણીઓ અને મુશ્કેલીઓ વિશે તેમણે ક્યારેય વિચાર્યું જ નહોતું.
રાજુ ખેરે કહ્યું કે પરિવારના સભ્યો તરીકે તેઓ અનુપમને ઘણી બાબતોમાં સ્વાભાવિક રીતે ઉપલબ્ધ માની લેતા હતા. અનુપમ ખેર સિકંદર ખેરને પોતાના પુત્રની જેમ જ માને છે, પરંતુ મેગેઝિનમાં વાંચેલી તેમની અંગત લાગણીએ રાજુને જીવન અને સંબંધોને અલગ દૃષ્ટિથી જોવાની પ્રેરણા આપી હતી.
પોતાના આ અનુભવમાંથી મળેલી શીખ અંગે રાજુ ખેરે જણાવ્યું કે માણસે મુશ્કેલીના સમયમાં માત્ર પોતાની પરિસ્થિતિ અને જરૂરિયાતો વિશે જ વિચારવું જોઈએ નહીં. જે વ્યક્તિ પાસેથી આપણે મદદની અપેક્ષા રાખીએ છીએ તે પોતે કઈ પરિસ્થિતિમાંથી પસાર થઈ રહી છે, તેની પોતાની સમસ્યાઓ શું છે અને તેના મનમાં શું ચાલી રહ્યું છે તે સમજવાનો પ્રયાસ પણ કરવો જોઈએ.
આર્થિક રીતે અત્યંત મુશ્કેલ સમય અને મોટા ભાઈ અનુપમ ખેરના અંગત જીવન અંગે જાણેલી વાતને યાદ કરતાં રાજુ ખેરે આ સમગ્ર ઘટનાને પોતાના જીવનનો મહત્વપૂર્ણ અનુભવ ગણાવ્યો છે. તેમના કહેવા પ્રમાણે આ તબક્કાએ તેમને માત્ર આર્થિક નિર્ણય અંગે જ નહીં, પરંતુ પરિવાર, સંબંધો અને અન્ય વ્યક્તિની પરિસ્થિતિને સમજવા અંગે પણ મોટી શીખ આપી હતી.