રાજકોટમાં રાજ્યમંત્રી પ્રફુલ પાનશેરીયાના હસ્તે સદભાવના ‘વૃદ્ધાશ્રમ લેબોરેટરી અને નિદાન કેન્દ્ર’નું ઉદઘાટન
પૂજ્ય બાપુની વિચારધારા સમર્પણ, સેવા, ત્યાગ, પ્રેમ, કરૂણા અને દયાના ગુણોને આ સંસ્થા ઉજાગર કરી રહી છે : મંત્રી પ્રફુલ પાનશેરીયા
saurashtrabhoomi 
રાજકોટ તા.૩
આરોગ્ય, પરિવાર કલ્યાણ અને તબીબી શિક્ષણ(સ્વતંત્ર હવાલો) વિભાગના રાજ્યકક્ષાના મંત્રી પ્રફુલ પાનશેરીયાએ રાજકોટ શહેરના નાના મવા રોડ ખાતે સદભાવના વૃદ્ધાશ્રમ લેબોરેટરી અને નિદાન કેન્દ્રનું ઉદ્ઘાટન કર્યું હતું. આ પ્રસંગે મંત્રીએ જણાવ્યું હતું કે, સદભાવના સંસ્થાએ સમાજ સેવા અને પર્યાવરણ ક્ષેત્રે ઉત્કૃષ્ટ કામગીરી કરીને રાજકોટનું નામ રોશન કર્યું છે. બીજી ઓક્ટોબરે પૂજ્ય બાપુની વિચારધારા સમર્પણ, સેવા, ત્યાગ, પ્રેમ, કરૂણા અને દયાના ગુણોને આ સંસ્થા સુગંધિત કરી રહી છે. મેડિકલ ક્ષેત્રની કામગીરી અંગે મંત્રીએ સ્પષ્ટ કર્યું હતું કે, મેડિકલ ક્ષેત્ર એ કોઈ ઈન્ડસ્ટ્રી નથી, પરંતુ સેવાનો આધાર છે. વડાપ્રધાન નરેન્દ્ર મોદીએ જ્યારે દવાની કિંમતો બહુ વધારે હતી ત્યારે જેનરિક દવાઓનું ઉત્પાદન શરૂ કરાવ્યું અને દોઢ-બે લાખના સ્ટેન્ટ રૂા.૨૦-૨૫ હજારમાં ઉપલબ્ધ કરાવી ગરીબોની સેવા કરી છે. સરકારની અનેક યોજનાઓ દ્વારા ગંભીર બીમારીઓની સારવાર વિનામૂલ્યે થઈ રહી છે, ત્યારે આવી ટ્રસ્ટની હોસ્પિટલો અને લેબોરેટરીઓ સમાજ માટે આશીર્વાદરૂપ છે . ખાદ્યપદાર્થોમાં ભેળસેળ કરનારાઓ સામે કડક વલણ દાખવતા મંત્રીએ જણાવ્યું હતું કે, મુખ્યમંત્રી ભૂપેન્દ્રભાઈ પટેલની કડક સૂચનાઓ અનુસાર સરકાર ‘ઝીરો ટોલરન્સ’ નીતિ સાથે કામ કરી રહી છે. આરોગ્ય વિભાગની ટીમો દિવસ-રાત કામગીરી કરી રહી છે. લોકોના સ્વાસ્થ્ય સાથે ચેડાં કરતા ભેળસેળિયા માફિયાઓને બક્ષવામાં નહીં આવે. મુખ્ય કાર્યક્રમ બાદ મંત્રીએ સદભાવના મેડિકલ સ્ટોર અને મોટા રામપર ગામે સદભાવના વૃદ્ધાશ્રમની પણ મુલાકાત લીધી હતી. આ તકે ટ્રસ્ટીઓ અને અગ્રણીઓ ઉપસ્થિત રહ્યાં હતાં.
